«نۇرجول» ساياجولىندا بەيسەنبى سايىن جينالىپ, ءان شىرقاپ, كۇي تارتىپ, جىر توگىپ, تەرمە ايتاتىن ءبىر توپ استانالىق جاس ءوز باستامالارىن ءدال وسىلاي اتايدى. ياعني, «دومبىرا كەشى».
كەشكە جينالاتىن جاستار اراسىندا بىردە-ءبىر كاسىبي ءانشى جوق. ارقايسىسى ءوز دارگەيىندەگى «كۇمىس كومەي». ەلىمىزدىڭ ءار تۇكپىرىنەن ەلورداعا جينالعان جاستاردىڭ بۇل باستاماسىنىڭ باستى ماقساتى – بىرىنشىدەن, ءوز ۋاقىتتارىن كوڭىلدى وتكىزۋ بولسا, ەكىنشىدەن – قازاق ونەرىن ناسيحاتتاۋ.
«ادەتتە, كوشەدە گيتارا تارتىپ وتىرادى. نەگە جينالىپ دومبىرا تارتپاسقا دەگەن وي بولدى» دەيدى اتالعان شارانى ۇيىمداستىرۋعا مۇرىندىق بولعانداردىڭ ءبىرى – ارشات ورازوۆ, «وسىلايشا استانانىڭ تورىندە دومبىرا تارتايىق دەگەن ۇسىنىس تاستالدى. ماقسات – دومبىرانى, قازاق ءتىلىن, قازاقىلىقتى قالالىق جەردە ناسيحاتتاۋ. باستاپقىدا جۇرتقا تاڭسىق بولعانى راس. دومبىرا تارتىپ وتىرعان جاستاردى حالىق تەك قىزىقتاپ قاراپ كەتەتىن. ال قازىر تىڭداۋعا جانە ءوز ونەرىن كورسەتۋگە كەلىپ جۇرگەن تۇراقتى تىڭدارماندار بار. مۇنداي ءۇردىس باسقا قالالارعا دا تارايتىن سياقتى. بۇعان تەك قۋانامىز».
قازاق دالاسىنىڭ ارقيلى ءان مەكتەبىنىڭ تۋىندىلارىن, ودان قالسا, قازاقتىڭ امبەگە ايان ولەڭدەرىن «بايتەرەك» ماڭىندا اۋەلەتكەن جاستار تىڭدارمانداردىڭ قوشەمەتىنە بولەنەدى.
«استانانىڭ اسەم كەشىندە دومبىرادان اۋەلەتە توگىلگەن اسەم ءان تىڭداپ, جينالعان قىز-جىگىتتەرمەن ەركىن اڭگىمە دۇكەن قۇرعانعا نە جەتسىن, شىركىن؟! بۇكىل شارشاۋىڭدى ۇمىتىپ, ءبىر سەرگىپ قالاسىڭ. قازىر اپتانىڭ بەيسەنبىسىن اسىعا كۇتەتىن بولدىم» دەيدى استانالىق جاناسىل بولاتبەك.
مۇنداي ءار بوسقوسۋدىڭ بەلگىلى ءبىر تاقىرىبى بولادى. ياعني, سول كۇنى شىرقالاتىن تۋىندىلار تاقىرىپ اياسىنداعى ءان مەن جىر بولۋى كەرەك. بۇگىنگى بەيسەنبى, تاعى دا «دومبىرا PARTY». ادەتتەگىشە, «نۇرجول» ساياجولى, ساعات كەشكى سەگىزدە. بۇل جولى اۋەسقوي انشىلەر حالىق اندەرىن شىرقاماق.
وسىلايشا, استانانىڭ اسپانىندا اسقاق ءان اۋەلەمەك…
نۇربەرگەن ماقىم
