كەشە قالالىق ءماسليحاتتا ونەركاسىپ پەن كاسىپكەرلىك, بيۋدجەت, ەكونوميكا ماسەلەلەرى بويىنشا تۇراقتى كوميسسيانىڭ كەزەكتى جيىنى ءوتتى.
كۇن تارتىبىندە بىرنەشە ماسەلە قارالدى. جيىنعا ءماسليحات دەپۋتاتى ءۋاليحان دوساەۆ توراعالىق ەتتى. ءماسليحات حاتشىسى سانسىزباي ەسىلوۆ باستاعان بىرقاتار دەپۋتاتتار مەن كەيبىر باسقارما وكىلدەرى قاتىسىپ, ەلورداعا قاتىستى وزەكتى ساۋالداردى تارازى باسىنا تارتتى.
العاشقى ماسەلە سالىق جونىندە ءوربىدى. وسى تۇيتكىل حاقىندا بايانداما جاساعان سالىق دەپارتامەنتى باستىعىنىڭ ورىنباسارى نۇر جارتىباەۆتىڭ قوسىمشا سالىق كوزدەرىن ىزدەۋ ماقساتىنداعى ساۋالى قايتا قاراۋعا جىبەرىلدى. ويتكەنى, ولار قوسىمشا سالىق كوزدەرى نىسانىنا تابيعي رەسۋرستاردى پايدالانۋدىڭ ەميسسياسىن كوبەيتۋدى ۇسىنعان ەدى. بۇعان «استانا قالاسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى» مم باستىعى بولات احمەتوۆ ءالى دە ەرتەرەك ەكەنىن, ولاردى تولىققاندى ويلاستىرۋ قاجەتتىگىن العا تارتى. سوندىقتان سانسىزباي ەسىلوۆتىڭ ايتۋىنشا, ءماسليحاتتا قارالماس بۇرىن مۇنداي الەۋمەتتىك ماڭىزى زور ماسەلەلەر الدىمەن قالالىق اكىمدىكتە جەتە تەكسەرىلىپ, جان-جاقتى باعامدالىپ, تولىق زەرتتەلىپ بارىپ حالىق قالاۋلىلارىنا جەتكەرىلۋى ءتيىس. بۇل ماسەلە قايتا پىسىقتاۋعا قالدىرىلدى.
ەكىنشى ءتۇيىندى تاقىرىپ كاسىپكەرلىك تۋراسىندا بولدى. ناقتىراق ايتقاندا, ماۋسىمارالىق ساۋدا پاۆيلوندارىن شىعارۋ جايىندا بىرقاتار شاعىمدار تۇسكەن. بۇعان جاۋاپتى – استانا قالاسىنىڭ ساۋلەت جانە قالا قۇرىلىسى باسقارماسى. بىرنەشە كاسىپكەر ساۋدا پاۆيلوندارىن شىعارۋعا رۇقسات الا الماي جۇرگەندەرىنە ارىزدانعان. سول ارىزدانۋشى 45 كاسىپكەرگە اتالمىش باسقارما جەر تەلىمدەرىن ۇسىنۋى قاجەت-ءتى. الايدا, ەلباسىنىڭ تاپسىرماسىمەن ءماسليحات قولداعان ساۋدا پاۆيلوندارىن اشۋ – تۇراقتى تۇردە جۇرگىزىلىپ كەلە جاتقان شارۋانىڭ ءبىرى. وسى كۇنگە دەيىن وسىنداي ساۋدا ورىندارىن اشۋعا قۇلىقتى, بىراق قول جەتكىزە الماي كەلە جاتقان كاسىپكەردىڭ مۇڭ-زارىنا قۇلاق اسقان دەپۋتاتتار وسى ماسەلەنىڭ تەز ارادا شەشىلۋىن تالاپ ەتتى. «استاناگورارحيتەكتۋرا» جشس-ءنىڭ قىزمەتكەرى زاۋرەش بايازيتوۆانىڭ بايانداماسىنان تۇسىنگەنىمىز, قازىرگى تاڭدا 45 كاسىپكەر اتالمىش مەكەمەنىڭ ۇسىنعان جەر اۋماعىنا ءوز پاۆيلونىن اشۋعا بەيىلدى بولماعان. بىراق رايىنان قايتقان وسى تىزىمدەگى كاسىپكەرلەر ەندىگى جەردە كەز كەلگەن اۋماققا حوش دەي وتىرىپ, ءوز ءىسىن اشپاقشى. تەك رۇقسات كەرەك-ءتى. «ءبىز بۇل شارۋانى جەر قاتىناستارى باسقارماسىمەن بىرلەسە وتىرىپ, جۋىردا شەشەمىز. تىزىمدەگى ادامداردىڭ سۇرانىسىن ورىندايمىز» دەپ ناقتى ۋادە بەردى باسقارما باستىعىنىڭ ورىنباسارى قايرات قوجامجاروۆ.
بۇعان بارلىق قالاۋلىلار توقايلاسىپ, بۇل ماسەلەنىڭ ەندىگى ۋاقىتتا كۇن تارتىبىنە قايتا ورالماۋىن قاداعالاۋدى تاپسىردى.
شىنار ءابىلدا
