قازاقستاندىق سوفتۆەرلiك كومپانيالار قاۋىمداستىعىنىڭ «ادەبيەت-Olympic» شىعارماشىلىق جوبالارى اياسىندا ءبىر ايدان استام ۋاقىت بويى وتكەن جاس اقىنداردىڭ «مەنىڭ دوسىم» اتتى حالىقارالىق پوەزيا بايقاۋى ءوز مارەسىنە جەتتى.
دوستىق سەزىمىنە ارنالىپ جانە ونلاين رەجيمدە وتۋىمەن ەرەكشەلەنگەن جىر دوداسىنا ەلىمىزدىڭ بارلىق ايماعىنان, وزبەكستاننان, قىتايدان, موڭعوليادان, رەسەيدەن حات جولداعان 84 اۆتوردان 140-قا جۋىق ولەڭ ءتۇستى. اۆتورلاردىڭ جاسى 10 جاستان 55 جاسقا دەيىنگى ارالىقتى قۇرادى.
پوەزيا بايقاۋى ءوز ۇدەسىنەن شىقتى. دوستىق ءۇشىن دەپ قالام تەربەگەن جاس اقىنداردىڭ تاقىرىپتى جان-جاقتى جىرلاۋى, شىنايى سەزىمگە قۇرىلعان, دوستىق رۋحىن اسقاقتاتقان ولەڭدەردىڭ بيىك تە نازىكتىگى, دوس ۇعىمىنىڭ تەرەڭ ءمان-ماعىناسىن جەتىك سەزىنۋلەرى قازاق قوعامىنداعى رۋحاني-ەستەتيكالىق جانە مورالدىق تاربيەنىڭ جاڭا دەڭگەيگە كوتەرىلگەنىنىڭ كورىنىسى بولسا كەرەك.
بايقاۋعا كەلىپ تۇسكەن بارلىق شىعارمالار «دوستار جىرلايدى» دەگەن اتپەن جيناق بولىپ جارىق كورەدى.
دوستىق تاقىرىبىنداعى ءمۇشايرادا دوستار اراسىنا جىك تۇسپەۋى ءۇشىن توپ جارعان 9 ولەڭ جانە ۇزدىك 25 ولەڭ ىرىكتەلدى. توپ جارعان توعىز ولەڭ اۆتورلارى: اسلان تىلەگەنوۆ, جاقسىلىق قازىمۇراتۇلى, ايان ورىباەۆ, قايرات سەيىتقازين, بالتابەك نۇرعاليەۆ, شەرحان تالاپ, ايبول يسلامعاليەۆ, نۇرتاس تۇرعانبەكۇلى, اقگۇل تۇرسىنباي.
اسحات رايقۇل
