«پارىز» – جاۋاپكەرشىلىككە نەگىزدەلگەن

ەلوردالىق كاسىپكەرلەردەن بيزنەستىڭ الەۋمەتتىك جاۋاپكەرشىلىگى جونىندەگى «پارىز» بايقاۋىنا قاتىسۋعا وتىنىمدەر قابىلداۋ باستالدى. وسى تۇرعىدا استانا قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ولگا دەمۋشكاننان بيىلعى بايقاۋ ەرەجەلەرىندەگى وزگەرىستەر تۋرالى سۇراپ بىلگەن ەدىك.

– جىل سايىن ءداستۇرلى وتكىزىلىپ كەلە جاتقان «پارىز» كونكۋرسى تۋرالى ايتىپ بەرسەڭىز؟

– بۇل بايقاۋ الدىمەن بيزنەستىڭ كورپوراتيۆتىك الەۋمەتتىك جاۋاپكەرشىلىگىن قالىپتاستىرۋعا باعىتتالعان. جەكە كاسىپكەرلىك سۋبەكتىلەرىنىڭ الەۋمەتتىك ماسەلەلەردى شەشۋىنە نازار اۋدارۋ, وسى سالاداعى وڭ تاجىريبەنى كورسەتۋ جانە كەڭىنەن تاراتۋ – بايقاۋدىڭ باستى ماقساتى بولىپ تابىلادى. «پارىز» بايقاۋى 2008 جىلدان بەرى ايماقتىق جانە رەسپۋبليكالىق دەڭگەيلەردە جىل سايىن وتكىزىلىپ كەلەدى.

-بيىلعى بايقاۋ ەرەجەلەرىندە قانداي وزگەرىستەر بار؟

-بايقاۋعا قاتىسۋعا وتىنىمدەردى قابىلداۋ 1 تامىزعا دەيىن عانا جالعاسادى. وسىعان دەيىن جەلتوقسانعا دەيىن قابىلدانىپ كەلگەن بولاتىن. سودان كەيىن كەلىپ تۇسكەن مالىمەتتەردىڭ شىنايىلىعى تەكسەرىلىپ, ۇمىتكەرلەردى ساراپتاۋ كەزەڭى باستالادى. ال جەلتوقساندا بايقاۋ قورىتىندىسى شىعارىلىپ, جەڭىمپازداردى ماراپاتتاۋ ءراسىمى ۇيىمداستىرىلادى.

-بايقاۋعا كىمدەر قاتىسىپ, جەڭىمپازدار قالاي انىقتالادى؟

-ەكى سانات بويىنشا – شاعىن جانە ورتا كاسىپكەرلىك, سونداي-اق ءىرى كاسىپكەرلىك سۋبەكتىلەرى بايقاۋعا قاتىسا الادى. ال, ۇزدىكتەر ءتورت اتالىم بويىنشا انىقتالادى. ياعني, «ۇزدىك الەۋمەتتىك جاۋاپتى كاسىپورىن», «ۇزدىك ۇجىمدىق شارت», «ەكولوگياعا قوسقان ۇلەسى ءۇشىن» جانە «ەڭبەكتى قورعاۋ سالاسىنداعى ۇزدىك كاسىپورىن» ماراپاتتالادى.

– ۇمىتكەرلەرگە قانداي تالاپ قويىلادى؟

– ەڭ باستى تالاپ: جەكە كاسىپكەرلىك سۋبەكتىسىنىڭ ءال-اۋقاتىن جاقسارتۋعا باعىتتالعان الەۋمەتتىك باعدارلامالار تۇرىندەگى وزدەرىنىڭ كورپوراتيۆتىك الەۋمەتتىك جاۋاپكەرشىلىگىنىڭ ەڭ ۇزدىك ۇلگىلەرىن جاريا ەتۋ كەرەك. سونىمەن قاتار, قازاقستان اۋماعىندا قايىرىمدىلىق جانە الەۋمەتتىك قىزمەتپەن اينالىسۋى شارت. ۇيىمنىڭ جۇمىسكەرلەرى الدىندا ەشقانداي قارىزى بولماۋى ءتيىس جانە بۇرىن-سوڭدى ۇجىمدىق ەڭبەك داۋلارى تىركەلمەۋى قاجەت.

كونكۋرس جونىندە تولىق اقپاراتتى 21-29-88 (استانا قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسى), 55-54-80 (استانا قالاسىنىڭ ەڭبەك ينسپەكتسياسى جونىندەگى باسقارماسى) جانە 22-65-95 (استانا قالاسىنىڭ ەكولوگيا دەپارتامەنتى) تەلەفوندارى ارقىلى الۋعا بولادى.

ايگۇل ۋايسوۆا