باتىس افريكا ەلدەرىندە, اتاپ ايتساق, گۆينەيا, سەررا-لەونە جانە ليبەريادا ەبولا بەزگەگى تارالدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرى بويىنشا, اعىمداعى جىلدىڭ 13 تامىزىندا 1848 اۋرۋ تىركەلىپ, 1013 ادام كوز جۇمعان. قاۋىپتى دەرت ەۋروپاعا دا جەتىپ ۇلگەردى. رۋمىنيا استاناسىندا 51 جاستاعى ەر ادام وسىنداي دياگنوزبەن اۋرۋحاناعا تۇسكەن. جاقىندا ول نيگەريادان ورالعان ەكەن. وسىعان وراي قازاقستان رەسپۋبليكاسى تۇتىنۋشىلاردىڭ قۇقىقتارىن قورعاۋ اگەنتتىگىنىڭ كولىكتەگى تۇتىنۋشىلاردىڭ قۇقىقتارىن قورعاۋ دەپارتامەنتى ساقتىق شارالارىن قولدانۋدى ۇسىنادى. وسى ماسەلەگە وراي ءبىزدىڭ ساۋالىمىزعا دەپارتامەنتتىڭ مەملەكەتتىك شەكارادا سانيتارلىق قورعاۋ ءبولىمىنىڭ باسشىسى گۇلنار تەرلىكباەۆا جاۋاپ بەردى.
– قاۋىپتى دەرتتەن قازاقستاندىقتار قالاي ساقتانا الادى؟
– ەبولا گەمورراگيالىق بەزگەگىن الدىن الۋ ماقساتىندا ءبىزدىڭ دەپارتامەنت قازاقستان رەسپۋبليكاسى ازاماتتارىن باتىس افريكا ەلىنە بارماۋعا شاقىرادى. سەبەبى, بۇل – جۇقتىرعان جاعدايدا جاپپاي ءولىمگە سوقتىراتىن ىندەت. اۋرۋ ادامنان اينالاسىنداعىلارعا ءتۇرلى ءبولىنىستەر نەمەسە قان ارقىلى جۇعادى. سوندىقتان ەبولا تارالعان ەلدەرگە بارا قالعان جاعدايدا بەتپەردەلەردى پايدالانىپ, دەنە قىزۋى جوعارىلاعان ادامدارعا جولاماعان ءجون. ادامدار كوپ جينالاتىن جەرلەرگە بارماۋعا تىرىسقان ابزال.
– اۋرۋدىڭ بەلگىلەرى قانداي؟
– ۆيرۋس اعزاعا تۇسكەننەن كەيىن 21 تاۋلىك ىشىندە قوزادى. ونىڭ العاشقى بەلگىلەرى 8-10 كۇن ارالىعىندا بايقالادى. اۋرۋ وتە جىلدام, ءبىر نەمەسە بىرنەشە بەلگىلەردەن بايقالادى. ماسەلەن, باس اۋىرىپ, ادام قان قۇسادى, ۇلكەن دارەتپەن بىرگە قان شىعادى, بۇلشىق ەت اۋىرىپ, كوزدەن, مۇرىننان, قۇلاقتان قان اعا باستايدى. دەنە قىزۋى 39-40 گرادۋسقا دەيىن كوتەرىلەدى.
– دەرتتى الدىن الۋ ءۇشىن تاعى قانداي كەڭەس بەرەسىز؟
– اۋرۋدىڭ الدىن الۋ ءۇشىن بولمەنى جاقسىلاپ جەلدەتىپ, جەكە باستىڭ گيگيەناسىن ساقتاۋ, تاماقتى كەز كەلگەن جەردەن ساتىپ الماۋ كەرەك.
باتىس افريكا ەلدەرىنەن كەلگەن سوڭ اۋرۋدىڭ بەلگىلەرى بايقالسا, جەدەل تۇردە مەديتسينالىق قىزمەتكە جۇگىنگەن ءجون.