قازاقستاندا ە.حەمين-گۋەيدىڭ «شال مەن تەڭىز» پوۆەسى ەكرانيزاتسيالاندى. فيلم «شال» دەگەن اتاۋمەن كورەرمەنگە جول تارتتى. رەجيسسەرى – ەرمەك تۇرسىنوۆ. اۆتور ايدالادا ءومىر ءسۇرىپ جاتقان شاعىن وتباسى ارقىلى قازاقى بولمىستى اشۋعا تىرىسقان. ءتۇز تاعىسىمەن ارپالىسا ءجۇرىپ, ومىرلىك ۇستانىمدارىنا بەرىك جاي عانا ءبىر شالدىڭ ازاپتى ءومىرى باياندالادى. ۇلان-بايتاق دالانى مەكەن ەتكەن ۇلكەن ۇلتتىڭ ءبىر بولشەگى ىسپەتتى. كينو كەيىپكەرى بوي تۇزەپ كەلە جاتقان ۇرپاعىنا كيەلى دالانى مەكەن ەتكەن اتا-باباسىنىڭ ونەگە-ۇلاعاتىن ميراس ەتۋدى كوزدەگەن اسقاق مۇراتپەن جانتالاس ءومىر شىنايى كورىنىس تاپقان.
باستى ءرولدى سومداعان ەربولات توعۇزاقوۆ ۇلى دالانىڭ ءيسى سىڭگەن قاتپا قارا شالدىڭ شويىنداي بەرىك ومىرلىك ۇستانىمىن ءدال بەينەلەي بىلگەن. ول بۇعان دەيىن «ستالينگە سىيلىق», «بالالىق شاعىمنىڭ اسپانى», «قىزعىلت قويان تۋرالى ەرتەگى» فيلمدەرىمەن تانىلىپ ۇلگەرگەن اكتەر.
ال ءفيلمنىڭ رەجيسسەرى ەرمەك تۇرسىنوۆ: «جىرتقىشتىڭ اتى جىرتقىش ەمەس پە, شامالى قيىندىقتار بولدى. اكتەر جىرتقىشپەن جالاڭ قولمەن كۇرەستى. جەكپە-جەك الىسقاندا بەت-ءجۇزى انىق كورىنىپ قالاتىندىقتان, دۋبلەردى ويناتا المادىق. ارينە, كۇرەستىرمەس بۇرىن ولارعا السىرەتەتىن ءدارى ەككىزدىك. قايتكەنمەن دە, مۇنداي جىرتقىشپەن كۇرەسۋ ءۇشىن ۇلكەن جۇرەك كەرەك. وسىنداي قيىندىقتارعا قاراماستان, ەربولات اعا ءوز ءرولىن جاقسى الىپ شىقتى» دەيدى.
استانا كينوتەاترلارىندا كورسەتىلە باستاعان «قازاقفيلمنىڭ» كەزەكتى تۋىندىسىنا قىزىعۋشىلار سانى كۇن ساناپ كوبەيىپ كەلەدى.
