پرەزيدەنت جانىنداعى ايەلدەر ىستەرى جانە وتباسى-دەموگرافيا ساياساتى جونiندەگi ۇلتتىق كوميسسيانىڭ 25 جىلدىعىنا ارنالعان قازاقستان ايەلدەر فورۋمىنا ەلدىڭ ءار وڭىرىنەن 500-دەن اسا دەلەگات كەلدى.
استانا قالاسى اكىمدىگى ۇيىمداستىرعان فورۋمدا ايەلدەردىڭ قوعامداعى ءرولى, ءوزىن-ءوزى رۋحاني-مادەني جاقتان دامىتۋى مەن ساياسي-قوعامدىق جۇمىستارعا بەلسەندى ارالاسۋى تالقىلاندى.
مادەنيەت جانە اقپارات ءمينيسترى, ۇلتتىق كوميسسيا توراعاسى ايدا بالاەۆا قاتىسۋشىلارعا پرەزيدەنت قاسىم-جومارت توقاەۆتىڭ قۇتتىقتاۋىن وقىپ بەردى. مينيستر ەلدىڭ الەۋمەتتىك-ەكونوميكالىق دامۋىندا ايەلدەردىڭ ۇلەسىن باعالاپ, وتباسى قۇندىلىعىن نىعايتۋداعى رولىنە توقتالدى.
ەلوردالىق ايەلدەر باسقا وڭىرلەرمەن سالىستىرعاندا ساياسي جانە قوعامدىق بەلسەندىلىگىمەن ەرەكشەلەنەدى. بۇل تۋرالى استانا قالاسى اكىمىنىڭ ورىنباسارى ەسەت بايكەن ايتىپ بەردى.
– ەلوردانىڭ جەتىستىگى ايەلدەرمەن تىعىز بايلانىستى. ەكونوميكالىق قىزمەتتەگى ايەلدەردىڭ ۇلەسى 51 پايىزدى قۇرايدى. ونىڭ ىشىندە 100 مىڭنان استام ايەل ونەركاسىپ كاسىپورىندارىندا جۇمىس ىستەسە, 90 مىڭعا جۋىعى بيزنەس سۋبەكتىلەرىن باسقارادى. 75 مىڭنان استام ايەل مەديتسينا مەن ءبىلىم سالاسىندا جۇمىس ىستەيدى. استانا قالاسىندا مەملەكەتتىك جانە الەۋمەتتىك قىزمەت سالاسىندا ايەلدەردىڭ ۇلەسى ارتىپ كەلەدى. ماسەلەن, الەۋمەتتىك قىزمەت سالاسىنداعى باسشىلىق قىزمەتتىڭ 80 پايىزىن ايەلدەر اتقارادى, – دەدى قالا اكىمىنىڭ ورىنباسارى.
Amanat پارتياسىنىڭ حاتشىسى, ۇلتتىق كوميسسيا مۇشەسى شولپان كارينوۆا پارتيا مۇشەسىنىڭ 65 پايىزى ايەلدەر ەكەنىن ايتتى. پارلامەنت ماجىلىسىندەگى پارتيا فراكتسياسىنىڭ قۇرامىنداعى دەپۋتاتتىڭ 17,7 پايىزىن جانە ماسليحاتتارداعى دەپۋتاتتىڭ 22,4 پايىزىن ايەلدەر قۇرايدى.
«سامۇرىق-قازىنا» اق كورپوراتيۆتىك باسقارۋ بويىنشا باسقارۋشى ديرەكتورى عيبرات اۋعانوۆ, قازاقستانداعى ادام قۇقىقتارى جونىندەگى ۋاكىل ارتۋر لاستاەۆ, قازاقستانداعى بۇۇ تۇراقتى ۇيلەستىرۋشىسى ميكاەلا فريبەرگ-ستوري, استاناداعى ەقىۇ باعدارلامالار كەڭسەسى باسشىسىنىڭ ورىنباسارى يۋري فەنوپەتوۆ فورۋمعا قاتىسىپ, ەل دامۋىنداعى ايەل ءرولىن ءسوز ەتتى.
فورۋم اياسىندا TEDX فورماتىنداعى موتيۆاتسيالىق كەزدەسۋ ءوتتى. وندا ۇلتتىق كوميسسيا توراعاسىنىڭ ورىنباسارى ءلاززات سۇلەيمەن «قازاق ايەلى – ەل بىرلىگىنىڭ كەپىلى» تاقىرىبىندا ءوز ويىن ورتاعا سالدى. پرەزيدەنتتىڭ عىلىم جانە يننوۆاتسيا ماسەلەلەرى جونىندەگى كەڭەسشىسى كۇنسۇلۋ زاكاريا, ق.جۇبانوۆ اتىنداعى اقتوبە ۋنيۆەرسيتەتىنىڭ رەكتورى لاۋرا قاراباسوۆا, «ىرىسكەلدى قاجى» مەشىتىنىڭ باس يمامى نۇرلان يمام, «ArtLab» شىعارماشىلىق ويلاۋدى دامىتۋ مەكتەبىنىڭ نەگىزىن قالاۋشىسى مارينا دەركاچ ءوز تاجىريبەسىمەن ءبولىسىپ, قاتىسۋشىلاردىڭ سۇراعىنا جاۋاپ بەردى.
