كەشە ەلباسى نۇرسۇلتان نازارباەۆ اقوردادا ەلگە ەڭبەگى سىڭگەن بىرنەشە وتانداستارىمىزعا مەملەكەتتىك ناگرادالاردى تاپسىردى. سىيلىققا ساياسات, ونەر, ءبىلىم, مەديتسينا جانە تاعى دا باسقا الەۋمەتتىك سالالاردا تەر توككەن ازاماتتار لايىقتى دەپ تانىلدى.
«ءبىز تاۋەلسىزدىگىمىزدىڭ 23 جىلىندا ىرگەلى مەملەكەت قۇرىپ, ەكونوميكانى قالىپقا كەلتىردىك. قازاقستاندى دۇنيەجۇزىنە تانىمال ەتتىك. الەۋمەتتىك جاعداي, ءبىلىم بەرۋ, عىلىم, ونەردە كوپتەگەن جەتىستىكتەرگە جەتتىك. وسىنىڭ ءبارىن ءبىزدىڭ حالىق جاسادى, بۇگىنگى جاقسى ءومىر ەل ازاماتتارىنىڭ ەرەن ەڭبەگىنىڭ ارقاسىندا. سىزدەر بىرلىگىمىزدى نىعايتىپ, بەرەكەمىزدى ارتتىرۋعا اتسالىسىپ كەلەسىزدەر. سوندىقتان بۇگىن وزدەرىڭىزگە تاپسىرىلاتىن مەملەكەتتىك ناگرادالاردىڭ ماڭىزى وتە زور» دەدى نۇرسۇلتان نازارباەۆ.
ەلباسى بۇل ماراپاتتىڭ ەل دامۋىنا ۇلەس قوسقان قازاقستاندىقتاردىڭ ەڭبەكتەرىنە بەرىلگەن مەملەكەتتىڭ باعاسى ەكەنىن اتاي كەلە, سىيلىقتى كۇللى قازاقستان بويىنشا ماراپاتتالىپ وتىرعان مىڭ جارىم ادامنىڭ بارىنە ءوز قولىمەن تاپسىرا المايتىنىن ايتتى.
پرەزيدەنت ەڭ الدىمەن «قازاقستاننىڭ ەڭبەك ەرى» اتاعىن ەلدى الەۋمەتتىك-گۋمانيتارلىق دامىتۋداعى جەتىستىكتەرى مەن مادەنيەتتى دامىتۋداعى ايرىقشا ۇلەسى ءۇشىن قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆاعا تاپسىردى. كەيىن «وتان» وردەنىنە قاسىم-جومارت توقاەۆ باستاعان بىرنەشە ازامات يە بولدى.
سونىمەن قاتار, ەلباسى ءى, ءىى, ءىىى دارەجەلى «بارىس», «پاراسات» جانە ءى, ءىى دارەجەلى «دوستىق» وردەندەرىن دە كەزەك-كەزەگىمەن تابىستاي وتىرىپ:
«سىزدەر ەلىمىزدىڭ بىرلىگىنە سىزات تۇسىرمەي, حالىقتىڭ ءال-اۋقاتىن جاقسارتۋعا ۇلەس قوسىپ جۇرسىزدەر. بۇل ناگرادالار – سىزدەردىڭ ەڭبەكتەرىڭىزگە بەرگەن مەملەكەتتىڭ باعاسى» دەپ ءسوزىن تۇيىندەدى.
نۇريسلام قۇسپانعالي
