بالالار الاڭقايىنا باپ كەرەك
ءوزى تۇرىپ جاتقان اۋلاسى مەن ماڭايىنا بەيجاي قاراي المايتىن كەيبىر تۇرعىنداردىڭ قىراعىلىعىنىڭ ارقاسىندا قالامىزداعى كەيبىر كەمشىلىكتەر دەر كەزىندە انىقتالىپ, شارا قولدانىلىپ جاتادى. «حالىقتىق باقىلاۋ» ايدارى ارقىلى استانا قالاسىنىڭ كوممۋنالدىق شارۋاشىلىق قىزمەتكەرلەرىنىڭ نازارىن اۋدارۋعا باعىتتالعان حاتتاردىڭ كوبى بالالار الاڭقايىنىڭ تازالىعى مەن قاۋىپسىزدىگىنە قاتىستى بولىپ جاتادى.
پۋشكين كوشەسى, 7-ءۇيدىڭ تۇرعىنى ۆەنەرا بەحبۋدوۆا ەسىمدى تۇرعىن استانا قالاسى اكىمدىگىنىڭ سايتىنا بالالار اۋلاسىنىڭ بىرنەشە ايدان بەرى قوقىستان تازارماي جاتقانىن ايتىپ شاعىم جازىپتى. تۇرعىننىڭ ايتۋىنشا, شىلىم قالدىقتارى, شىنى سىنىقتارى ارالاس قوقىس سوناۋ ءساۋىر ايىنان بەرى جاتىر. «ءساۋىر ايىندا اۋلا جيناۋشىلار (كسك قىزمەتكەرلەرى بولۋى مۇمكىن رەد.) تۋرا بالالار وينايتىن الاڭقايعا قوقىس ءۇيىپ كەتتى. سودان بەرى ءبىر ايدان استام ۋاقىت ءوتتى, ەشكىم كەلىپ تازالاعان جوق. كسك-عا بىرنەشە رەت حابارلاسىپ ەسكەرتۋ جاسادىق. الايدا, ەش ناتيجە شىققان جوق» دەپتى شاعىم ايتۋشى.
الماتى اۋدانى اكىمىنىڭ اپپاراتى بۇل حاتقا 7 كۇننىڭ ىشىندە جاۋاپ جولداپتى. «قۇرمەتتى, ۆەنەرا! الماتى اۋدانى اكىمىنىڭ اپپاراتى تاراپىنان ءسىزدىڭ حاتىڭىز بويىنشا تەكسەرۋ جۇرگىزىلىپ, ناقتى شارالار قولدانىلدى. اۋلا قوقىستان تازارتىلىپ, ءۇي تۇرعىندارىنا قىزمەت كورسەتەتىن «تۇلپار» پيك-ءنىڭ باسشىلىعىنا اۋلانى دەر قوقىستان تازارتىپ تۇرۋ تۋرالى ەسكەرتۋ بەرىلىپ, ايىپپۇل سالىندى. پۋشكين كوشەسى, 7-ءۇيدىڭ اۋلاسى ۇنەمى باقىلاۋىمىزدا بولادى» دەلىنگەن جاۋاپ حاتتا.
قۇم سالعىش تۇگىل قوقىس جاشىگى جوق.
تاعى ءبىر حاتتا توزىعى جەتكەن بالالار الاڭقايى ءسوز ەتىلگەن. پەتروۆ, 5 مەكەنجايىنان حات جولداعان يۋليا يۋنينا ەسىمدى تۇرعىن بالالار الاڭقايىن قايتا جاراقتاندىرۋدى ءارى ول جەردە تۇرعان جالعىز اتكەنشەكتىڭ 1970 جىلدان بەرى قيراپ تۇرعانىن جازعان. «بالالار وينايتىن قۇم تۇگىلى قوقىس تاستايتىن جاشىككە جارىماي كەلەمىز» دەيدى ول.
الماتى اۋدانى اكىمى اپپاراتىنىڭ جاۋابى:
قۇرمەتتى يۋليا! پەتروۆ, 5 مەكەنجايى بويىنشا بالالار الاڭقايىن جاساقتاۋ جۇمىستارى 2017 جىلعا جوسپارلانعان. جوبا بويىنشا ول جەردە ويىن الاڭى, گيمناستيكا اۋلاسى جانە ورىندىقتارى بار قورشاۋلى الاڭقاي سالىنادى. قۇم توسەۋگە قاتىستى مىنانى حابارلايمىز: استانا قالاسىنىڭ سانيتارلىق تالاپتارىنا سايكەس تۇرعىن-ءۇي شارۋاشىلىعىنا جاۋاپتى
مەكەمەلەر 15 ءساۋىر – 15 قازان ارالىعىندا كەمىندە ءبىر رەت تازا قۇم توگۋگە مىندەتتى. ءوز ىسىنە سالعىرت قاراعانى ءۇشىن پيك «رادۋگا» مەكەمەسىنىڭ توراعاسى اكىمشىلىك جاۋاپكەرشىلىككە تارتىلدى. بۇگىندە الاڭقايعا قۇم توگىلدى.
سونداي-اق, رەسپۋبليكا داڭعىلىندا ورنالاسقان 26-ءۇيدىڭ تۇرعىندارى دا بالالارىن اۋلاعا جىبەرۋگە قورقاتىندارىن ايتىپ حات جولداپتى. وندا 10 جىلدان بەرى ءجوندەۋ جۇمىستارى ءجۇرگىزىلمەگەندىكتەن, اۋلاداعى ويىنشىق اتاۋلى بالا ومىرىنە قاۋىپ توندىرەرلىك جاعدايعا تۇسكەنى باياندالادى. اسىرەسە, سىرعاناقتار مەن اتكەنشەكتەردىڭ ءحالى مۇشكىل. قوقىس جاشىگىنەن شىعاتىن كۇلىمسى ءيىستىڭ كەسىرىنەن تۇرعىندار بالالارىن قۇممەن ويناۋعا جىبەرە المايتىن جاعدايعا تۇسكەن. بۇل جاعدايدى اكىمدىك سايتىنا ءاليا قادىرباەۆا بايانداپ بەرگەن.
الماتى اۋدانىنىڭ اكىمى اپپاراتىنىڭ مالىمدەۋىنشە, بۇل ماسەلە دە قازىر شەشىمىن تاۋىپ وتىر. № 26 ءۇيدىڭ اۋلاسى قالپىنا كەلتىرىلىپ, شاعىن ارحيتەكتۋرالىق نىساندار تۇگەلدەي قالپىنا كەلتىرىلگەن. بالالار وينايتىن قۇم باسقا جاققا اۋىستىرىلدى.
جەرتولە مە, الدە كولشىك پە؟
اكىمدىك سايتىنا شارۋاشىلىق قىزمەتىنە كوڭىلى تولماي حابارلاسىپ جاتاتىندار بارشىلىق. ريزا نۇرعاليەۆا ەسىمدى تۇرعىن جەرتولەگە جينالىپ قالعان ساسىق سۋدىڭ تۇرعىنداردىڭ مازاسىن الىپ وتىرعانىن ايتىپتى.
«اۋەزوۆ كوشەسىندە ورنالاسقان 45-ءۇيدىڭ جەرتولەسى تۇرمىستىق قالدىقتار ارالاسقان بورسىعان سۋدان كوز اشپاي وتىر. قاشان بارساڭ دا جەرتولەمىز لىق تولىپ تۇرادى. وسى ماسەلە بويىنشا «109» قىزمەتىنە حابارلاسقان ەدىم. «109» قىزمەتى «سۇڭقار» پيك-نە حابارلاسسا, مۇنداعىلار جەرتولەدە ەشقانداي سۋ جوق. قۇپ-قۇرعاق» دەپ, جاۋاپ قاتىپتى. تازارتىپ قويعان شىعار دەپ قايتا بارسام ەشتەڭە وزگەرمەگەن. سول باياعى قولقانى قاباتىن ساسىق سۋعا لىقىپ تۇر. كوڭىل اۋدارۋدى سۇرايمىن!» دەپتى ريزا نۇرعاليەۆا.
تۇرعىن ءۇي ينسپەكتسياسى باسقارماسى بۇل شاعىمدى 4 كۇننىڭ ىشىندە قاراپ, جەرتولەسى سۋعا تولعان ءۇيدى تولىقتاي ءوز باقىلاۋىنا الىپ وتىر. باسقارمانىڭ مالىمەتىنشە, وقىس جاعداي كارىز قۇبىرىنداعى سورۋ جۇيەسىنىڭ ىستەن شىعۋىنان تۋىنداعان. بۇگىنگى تاڭدا اقاۋ رەتتەلىپ, جەرتولەنىڭ سۋىن سورعىزۋ جانە قوقىستان تازارتۋ جۇمىستارى جۇرگىزىلىپ جاتىر. ال كەمشىلىككە جول بەرگەن «سۇڭقار» مەكەمەسىنە ەسكەرتۋ جاسالعان.
كوشە اتاۋىنا قىراعىلىق قاجەت
كەيدە «حالىقتىق باقىلاۋ» ايدارىنا كوشەدەگى سىرتقى جارنامالار مەن بيلبوردتار, سونداي-اق, كوشە اتاۋلارىندا كەزدەسەتىن قاتەلىكتەرگە قاتىستى ارىز-شاعىمدار ءتۇسىپ جاتادى. مۇنداي قاتەلىكتەر, ارينە, قالا كوركىن بۇزاتىنى داۋسىز.
ماقسۇت ەسىمدى ءبىر تۇرعىن ىقىلاس دۇكەنۇلى بابامىزدىڭ اتىنا بەرىلگەن كوشەدەن ورەسكەل قاتەلىك تاۋىپ, «№10 ءۇيدىڭ قابىرعاسىنداعى ى.دۇكەنۇلى كوشەسى دەگەن اتاۋ ى.دۇكەنۇلى دەپ قاتە جازىلعان» دەپ سايتقا شاعىم قالدىرىپ, سۋرەتىن قوسا جىبەرگەن ەكەن.
قۇزىرلى مەكەمە دە شاعىمدانۋشىعا كوپكە سوزباي جاۋاپ بەرىپتى. جاۋاپ حاتتا «كۇرمەتتى, ماقسۇت كايراتۇلى! استانا قالاسى سارىارقا اۋدانى اكىمىنىڭ اپپاراتى, ءسىزدىڭ كوشە اتاۋىنىڭ قاتە جازىلعانى جونىندەگى ۇندەۋىڭىزدى قاراستىرىپ, اعىمداعى جىلى شىلدە ايىنىڭ 18-نە دەيىن «ينفورماتسيا كوممەرتسيا سترويتەلستۆو» جشس مەردىگەرلىك ۇيىمىمەن اتالعان اقاۋلار جويىلاتىڭدىعىن حابارلايدى» دەلىنگەن.
دايىنداعان: بۇركىت نۇراسىل
دەرەكتەر www.astana.kz سايتىنىڭ «حالىقتىق باقىلاۋ» بولىمىنەن ىرىكتەلىپ الىندى.
