كاتاردىڭ ۇلدارى, فرانتسۋزدىڭ قىزدارى
كاتاردىڭ ۇلدارى, فرانتسۋزدىڭ قىزدارى استانادا ستريتبولدان وتكەن الەم چەمپيوناتىندا جەڭىسكە جەتتى.
كوشە باسكەتبولىنىڭ كورىگىن قىزدىرعان الەم بىرىنشىلىگىنە تورتكۇل دۇنيەنىڭ وتىز ەلىنەن سپورتشىلار قاتىستى. ەرلەر جانە ايەلدەر اراسىندا وتكەن جارىستا 40 كوماندا باق سىنادى.
شيرەك فينالعا ەرلەر اراسىندا سلوۆەنيا-برازيليا, يتاليا-گرۋزيا, ارگەنتينا-كاتار جانە جاڭا زەلانديا-ۋرۋگۆاي كوماندالارى شىققان ەدى. ال وسىلاردىڭ اراسىنان جارتىلاي فينالعا برازيليا مەن يتاليا, كاتار جانە جاڭا زەلانديا قۇرامالارى ءوتتى. كاتار جاڭازەلانديالىق كوماندانى ايقىن باسىمدىقپەن جەڭىپ, فينالعا جولداما السا, ەكىنشى جارتىلاي فينالدا يتاليا كومانداسىن ءبىر-اق ۇپاي باسىمدىقپەن جەڭىپ شىقتى.
فينالدا كاتارلىق جىگىتتەر برازيليا سپورتشىلارىنان ايلاسىن اسىرسا, قولا جۇلدە ءۇشىن بولعان ويىندا يتاليا قۇراماسى جەڭىسكە جەتتى.
الەم چەمپيونى اتانعان كاتار قۇراماسى قازاقستان كومانداسىن شيرەك فينالعا شىعارماي قويعان ەدى.
ايەلدەر اراسىنداعى ويىندار دا تارتىستى ءوتتى. شيرەك فينالدا ۆەنگريا-يسپانيا, فرانتسيا-نيدەرلاندى, اقش-قىتاي, جاڭا زەلانديا-چەحيا قۇرامالارى كەزدەستى. جارتىلاي فينالعا يسپانيا, فرانتسيا, اقش جانە چەحيا كوماندالارى ءوتتى. اقش قۇراماسى ءتۋرنيردىڭ ءسوزسىز فاۆوريتتەرى اتانىپ, فينالعا شىقتى.
يسپانيا-فرانتسيا كوماندالارى اراسىنداعى جەكپە-جەك ءبىر ۇپاي ايىرماشىلىقپەن فرانتسۋزداردىڭ پايداسىنا شەشىلدى. فرانتسيا مەن اقش كوماندالارىنىڭ اقتىق كەزدەسۋىندە فرانتسۋز سپورتشىلارى 21-12 ەسەبىمەن جەڭىپ شىقتى. ءۇشىنشى ورىن ءۇشىن بولعان ويىندا يسپاندىقتار چەحيا كومانداسىنان باسىم ءتۇستى.
عالىم قوجابەكوۆ