بيىل قازاقستاننىڭ حالىق جازۋشىسى, مەملەكەتتىك سىيلىقتىڭ لاۋرەاتى, قوعام قايراتكەرى فاريزا وڭعارسىنوۆانىڭ تۋعانىنا سەكسەن جىل تولدى. اقىننىڭ تۋعان جەرى – اتىراۋدا باستالعان مەرەكەلىك شارالار كورنەكتى اقىن ەلوردا الاتاۋدان ارقاعا قونىس اۋدارعاندا ۇلى كوشپەن بىرگە كەلىپ, ءومىرىنىڭ سوڭعى جىلدارىنا دەيىن تۇرعان باس شاھاردا جالعاسىن تاۋىپ, ءدۇبىرلى شاراعا ۇلاستى.
اقىنعا كوشە بەرىلدى
وسىدان ءتورت-بەس جىل بۇرىن فاريزا اپامىز تۇرعان ەسىلدىڭ سول جاعالاۋىنداعى ەڭسەلى ۇيگە ەسكەرتكىش تاقتا قويىلعان ەدى. ەندى, مىنە, ءدال وسى سول جاعالاۋدان اقىنعا كوشە بەرىلدى. الدىمەن يگى شارانىڭ باسى جاڭا كوشەنىڭ اشىلۋىنان باستاۋ الدى. وعان قالا اكىمىنىڭ ورىنباسارى باقتيار ماكەن جانە زيالى قاۋىم وكىلدەرى مەن الىس-جاقىننان كەلگەن قوناقتار قاتىستى.
العاشقى ءسوز كەزەگىن العان اكىم ورىنباسارى بۇگىنگى شارانىڭ ورنى بولەك ەكەندىگىنە توقتالدى.
– حالقىمىزدا «جاقسىنىڭ ەسىمى ەشقاشان ۇمىتىلمايدى» دەگەن جاقسى ءسوز بار. بۇگىن ءبىز قازاقتىڭ دانا قىزىن, دارا قىزىن ەسكە الىپ, ەلوردادا ەسىمى بەرىلگەن كوشەگە جينالىپ وتىرمىز. بۇل يگى ءىس – اپامىزدىڭ ارۋاعىنا دەگەن ۇلكەن قۇرمەت. جاس ۇرپاق بۇدان ونەگە الادى دەپ ويلايمىز. بالا كۇنىمىزدەن اقىن ولەڭدەرىن جاتتاپ وستىك. ول كىسىنىڭ ايتقان ورەلى سوزدەرى دە جۇرت جادىندا قالدى. پارلامەنت دەپۋتاتى بولىپ ەلدىك ىستەرگە دە ارالاستى. سوندىقتان فاريزا اپامىزدىڭ كوشەسى قۇتتى بولسىن! – دەدى ول.
كوشەنىڭ اشىلۋ لەنتاسىن باقتيار ماكەن مەن اقىننىڭ ۇلى الماس وڭعارسىنوۆ كەستى.
ودان كەيىن بەلگىلى جازۋشى, مەملەكەتتىك سىيلىقتىڭ لاۋرەاتى الدان سمايىل اقىننىڭ جان-جاعىن قوعامداستىرىپ جۇرەتىندىگىن ايتىپ, جىلى ەستەلىك ءوربىتتى.
– فاكەڭ جاي اقىن بولعان جوق, اقيقاتتىڭ اقىنى بولدى, ءومىر بويى شىندىقتى ايتىپ ءوتتى. شىندىقتى ايتۋدىڭ ءوزى ەرلىك. شىندىقتى ايتقان ادام اركىمگە جاعا بەرمەيدى. بىراق ول كىسى ەشكىمنىڭ كوڭىلىنە قاراماي ەلدىڭ مۇڭىن كۇيتتەپ ءوتتى. وعان دەگەن حالىقتىڭ ماحابباتى شەكسىز ەكەندىگىن اقىن دۇنيەدەن وزعاننان بەرى كورىپ كەلەمىز. فاريزا زامانىمىزدىڭ ابىزى اتانعان ءابىش كەكىلبايۇلىنىڭ تۋعان قارىنداسىنداي ەدى, كەيدە ەكەۋىن ەگىز كورەتىنبىز. ابەكەڭ ول كىسىنى ومىرباقي ەركەلەتىپ ءوتتى. شىن مانىندە, فاكەڭ – قازاقتىڭ قىزى بولا وتىرىپ, حالىقتىڭ ۇلى بولا بىلگەن ادام, – دەدى قالامگەر.
بۇدان كەيىن جيىلعان جۇرت ۇلتتىق پانتەونداعى فاريزا اپامىزدىڭ بەيىتىنە گۇل شوقتارىن قويىپ, دۇعا باعىشتادى. سودان سوڭ «Radisson Hotel Astana» قوناقۇيىنىڭ مەيرامحاناسىندا اقىن ارۋاعىنا اس بەرىلىپ, قۇران وقىلدى. بۇل تاعىلىمدى شاراعا قالا باسشىسى التاي كولگىنوۆ قاتىسىپ, ءسوز سويلەدى. سونىمەن بىرگە اياۋلى جانمەن ومىردە جاقىن سىيلاسىپ, ارالاسقان زيالى ازاماتتار دا ەستەلىكتەر ايتتى.
«اقىن اتىنداعى مۇراجاي اشسام دەيمىن»
ۇلتتىق اكادەميالىق كىتاپحانادا فاريزا وڭعارسىنوۆانىڭ «شىلدە» جانە «پولدنەۆنىي جار» اتتى قازاق جانە ورىس تىلدەرىندەگى كىتاپتارىنىڭ تانىستىرىلىمى بولدى.
بۇل كىتاپقا اقىننىڭ تۇتاس ءبىر ءداۋىردىڭ يدەيالىق-كوركەمدىك بەينەسىن جان-جاقتى سومداعان تۋىندىلارى ەنگەن. جيناقتى ورىسشاعا اقىن, ادەبيەتتانۋشى تاتيانا فرولوۆسكايا تارجىمالاعان.
تانىستىرىلىمدا عالىم, قوعام قايراتكەرى مىرزاتاي جولداسبەكوۆ اقىن تۋرالى ەستەلىگىمەن ءبولىستى.
– ءابىش پەن فاريزانى ءبولۋ قيىن. ەكەۋى دە بولىنبەيتىن تۇلعا. مەن ەكەۋىمەن دە جۇبىمىز جازىلماي بىرگە ءجۇرىپ, تالاي ساپارلاس, دامدەس بولدىم. فاريزا قازاق قىزدارىنىڭ قامقورشىسى بولدى. سولاردىڭ جاعدايى مەن مۇڭ-مۇقتاجى دەگەندە جانىن شۇبەرەككە ءتۇيىپ, بار جۇمىسىن تاستاپ جۇرەتىن. اعا سىيلاي بىلەتىن, ادەپتى, تەكتى ەدى, – دەدى. بەلگىلى ادەبيەتتانۋشى ەرمەك امانشاەۆ تا اقىننىڭ شىعارماشىلىعى تۋرالى تولىمدى ءسوز قوزعادى.
سونىمەن بىرگە اقىننىڭ بالاسى الماس وڭعارسىنوۆ جاڭا كىتاپتىڭ جارىققا شىعۋىنا قولداۋ كورسەتكەن ازاماتتارعا العىسىن ايتىپ, بولاشاقتا اتقارىلاتىن جوسپارىمەن ءبولىستى.
– بىلتىر انامنىڭ ەستەلىك كىتابى شىقتى. ال بۇگىنگى ەكى كىتاپتىڭ جارىق كورۋىنىڭ تاريحى بار. وسى جيناقتى شىعارۋعا قولداۋ كورسەتكەن مەملەكەت باسشىسى قاسىم-جومارت توقاەۆقا ريزاشىلىعىمدى بىلدىرەمىن. جانە كومەك كورسەتكەن ازاماتتارعا العىس ايتامىن. نەگىزىندە, وتكەن عاسىردىڭ 70-80-جىلدارى اقىننىڭ جىر جيناقتارىن وقىرماندار ىزدەپ ءجۇرىپ وقىدى. قازىرگى جاستار ونى كوبىنەسە عالامتوردان وقيدى. وسى كىتاپتى دايىنداۋعا انامنىڭ جان دوسىنىڭ ءبىرى, اۋدارماشى تاتيانا فرولوۆسكايانىڭ سىڭىرگەن ەڭبەگى زور. وكىنىشكە قاراي, بۇل كىسىدەن ءبىر اپتا بۇرىن ايىرىلىپ قالدىق. انامىزدىڭ ەسىمىن ماڭگى ەستە ساقتاۋ ماقساتىندا ءبىراز جۇمىستاردى قولعا الدىم. مەن ءۇشىن ەڭ ماڭىزدىسى, كوكەيىمدە جۇرگەن ارمان – اقىن اتىنداعى مۇراجاي اشۋ. بۇل جۇمىستى ەكى جىل بۇرىن ەلوردادان باستاپ كەتتىم. مۇمكىندىك بولسا, بولاشاقتا اشىلادى دەپ ويلايمىن. سول ءۇشىن ءبىراز ەلدەردەگى بەلگىلى ادامداردىڭ مۋزەيلەرىن ارالادىم. وعان انامنىڭ تۇتىنعان زاتتارى مەن قولجازبالارىن قويعىم كەلەدى. سوندىقتان وسى ارمانىمدى جۇزەگە اسىرۋعا بار كۇشىمدى جۇمساپ جاتىرمىن, – دەدى ول.
سونداي-اق «جاستار» تەاترىندا الماتى مەن ماسكەۋدە قويىلعان جازۋشى-دراماتۋرگ روزا مۇقانوۆانىڭ «فاريزا» سپەكتاكلى جۇرتشىلىققا ۇسىنىلدى. باستى ءرولدى «دارىن» مەملەكەتتىك سىيلىعىنىڭ لاۋرەاتى نازگۇل قارابالينا سومدادى. قويىلىمدى تاماشالاۋعا ەلوردا باسشىسى التاي كولگىنوۆ قاتىسىپ, ءسوز سويلەدى:
– بۇگىن ەرەكشە كۇندە باس قوسىپ وتىرمىز. ويتكەنى اقىن, قوعام قايراتكەرى, حالقىنىڭ سۇيىكتى قىزى فاريزا وڭعارسىنوۆانىڭ 80 جاسقا تولعان مەرەيتويىنا ارنالعان «فاريزا» سپەكتاكلىنە جينالدىق. ەلباسى – تۇڭعىش پرەزيدەنتىمىز ول كىسىنى «قازاق پوەزياسىنىڭ پاديشاسى» دەپ ايتقان. بۇگىنگى ءىس-شارالار پرەزيدەنتىمىز قاسىم-جومارت توقاەۆتىڭ تاپسىرماسى بويىنشا جۇزەگە اسىرىلىپ وتىر.
فاريزا اپامىز – حالىقتىڭ ادامى. ول كىسى قالامنىڭ ۇشىمەن حالىقتىڭ جوعىن جوقتاپ, مۇڭىن ايتتى, – دەپ جينالعاندارعا ىزگى لەبىزىن ءبىلدىردى.
