نيكولاي تيحونيۋك:
نيكولاي تيحونيۋك – كەزىندە استانا قالاسى اكىمىنىڭ ءبىرىنشى ورىنباسارى جانە سارىارقا اۋدانى اكىمى بولىپ, جاۋاپتى قىزمەتتەرىن اتقارىپ, ەلوردانى الاتاۋ باۋرايىنان ارقا توسىنە كوشىرۋ جۇمىستارىنىڭ بەل ورتاسىندا جۇرگەن ازامات.
بۇگىندە قر وڭىرلىك دامۋ ءمينيسترى ورىنباسارىنىڭ كەڭەسشىسى قىزمەتىن اتقاراتىن نيكولاي پەتروۆيچ – استانانىڭ تۋماسى. 1949 جىلى دۇنيەگە كەلگەن ازاماتتىڭ تاعدىرى تەك ەلوردامەن بايلانىستى. وسىندا تسەلينوگراد ينجەنەرلىك-قۇرىلىس ينستيتۋتىن ءبىتىردى. ونىڭ قۇرىلىس ماماندىعىن تاڭداۋى دە كەزدەيسوقتىق ەمەس.
– مەنىڭ بالالىق شاعىم تىڭ يگەرۋ جىلدارمەن تۇسپا-تۇس كەلدى. كۇللى كسرو قالانى بەس وبلىستىڭ باسىن بىرىكتىرگەن تىڭ ولكەسىنىڭ ورتالىعى ەتۋگە بارىن سالىپ جاتقان كەز ەدى. بۇرىنعى وبلىس ورتالىعىندا قىزۋ قۇرىلىس جۇمىستارى جۇرگىزىلدى. وعان دەيىن ءۇش قاباتتان بيىك عيمارات كورمەگەن باسىمىز سالىنىپ جاتقان ءزاۋلىم نىساندارعا قىزىعا قارايتىن ەدىك. العاش بوي كوتەرگەن تىڭ يگەرۋشىلەر سارايى – قازىرگى كونگرەسس-حولل كوزىمىزگە حان ورداسىنداي كورىندى. قۇرىلىسشى ماماندىعىن تاڭداۋىما دا وسى اسەر ەتتى, – دەيدى كەيىپكەرىمىز.
نيكولاي پەتروۆيچتىڭ العاشقى ەڭبەك جولى تسەلينوگراد اۋىل شارۋاشىلىعى ينستيتۋتىندا باستالعان. كەيىن ەلوردانىڭ قۇرىلىسىن سالۋعا بەت بۇرعان ول اۋەلى «قازاقسەلماش» زاۋىتىندا جۇمىس ىستەيدى. وسىدان سوڭ, شويىن قورىتۋ زاۋىتىنا اۋىسىپ, وسىندا تسەح باستىعى, باس ەنەرگەتيكتىڭ ورىنباسارى, زاۋىتتىڭ پارتكوم حاتشىسى بولدى. 1982 جىلدان باستاپ قالالىق پارتيا كوميتەتىنىڭ قۇرىلىس جانە قالا شارۋاشىلىعى ءبولىمىنىڭ مەڭگەرۋشىسى, 1986 جىلى تسەلينوگراد قالالىق اتقارۋ كوميتەتى توراعاسىنىڭ ءبىرىنشى ورىنباسارى, 1992-1999 جىلدارى ارالىعىندا بۇرىنعى اقمولا, قازىرگى استانا قالاسى اكىمىنىڭ ءبىرىنشى ورىنباسارى قىزمەتتەرىن اتقاردى.
استانانىڭ كىرپىشى العاش قالانعان كەزدەگى ەستەلىكتەرىمەن بولىسكەن ول بۇرىنعى وبلىس ورتالىعىنىڭ از ۋاقىت ىشىندە قۇلپىرىپ, ادام تانىماستاي وزگەرەتىنىن استە ويلاماعانىن ايتادى.
– مەن سامان ۇيدە تۋىپ-ءوستىم. قىسى قاتتى ارقانىڭ اۋا رايىندا وسى ماتەريالدان ارتىعى جوق-تىن. بۇرىن شاھار شاعىن بولدى. تۇرعىندار سانى از بولعاننان كەيىن ءبىر-بىرىمىزگە ءجۇزتانىس ەدىك. كوشەلەرىمىز بەن جولدارىمىز تار, ويدىم-ويدىم بولاتىن. سوندا دا ماعان تۋعان قالام تىم ىستىق ەدى, – دەيدى ول.
ەل استاناسىنىڭ اقمولاعا كوشىپ كەلگەن كەزى نيكولاي پەتروۆيچتىڭ استانا قالاسى اكىمىنىڭ ءبىرىنشى ورىنباسارى قىزمەتىن اتقارۋىمەن تۇسپا-تۇس كەلدى. وسىنداي شەشۋشى ساتتە قالا اكىمدىگىنە سىن ۋاقىتى تۋدى. ەلورداعا العاشقى لەكپەن كوشىپ, كەلىپ جاتقان ورتالىق باسقارۋ مەكەمەلەرىنىڭ قىزمەتكەرلەرىن جايعاستىرۋ, تۇرعىنداردىڭ قالىپتى تىرشىلىگىن قامتاماسىز ەتەتىن جارىق, سۋ, جىلۋدىڭ ۇزىلمەۋىن قاداعالاۋ, سول كەزدە سىنعا كوپ ىلىگىپ كەتكەن كوشە, جولداردى جونگە كەلتىرۋ سىندى اۋقىمدى شارۋالار كۇتىپ تۇر ەدى.
– الايدا, ءاپ-ساتتە كوركەيىپ كەلە جاتقان شاھاردى كورگەندە, بار قيىندىقتى ۇمىتىپ كەتەتىنبىز. جالپى, ەلوردا – باعى وڭىنان تۋعان قالا.
كوز الدىمدا كوركەيگەن ەلوردا – كەشەگى مەنىڭ بالا كەزىمدەگى شاعىن شاھار ەمەس. جاستىق شاقتاي جايقالعان اسەم استانا. كەزىندەگى 300 مىڭ تۇرعىنى بار ەلوردانىڭ بۇگىندە كەرەگەسى كەڭىپ, حالقىنىڭ سانى 800 مىڭعا جۋىقتادى, – دەيدى نيكولاي تيحونيۋك.
بۇرىنعى استانا قالاسى اكىمىنىڭ ءبىرىنشى ورىنباسارى كەزىندە «استانا – جاڭا قالا» ارنايى ەكونوميكالىق ايماعىن دا باسقارعان. بۇل جاۋاپتى قىزمەتتى دە ول ۇلكەن قۇلشىنىسپەن اتقارىپ, ىسكەرلىگىمەن كوزگە تۇسەدى.
پرەزيدەنتتىڭ باستاماسىمەن قۇرىلىپ, قۇرىلىس ماقساتىنداعى الەم بويىنشا جالعىز ايماق بولعان «استانا – جاڭا قالادا» نيكولاي تيحونيۋكتىڭ كەزىندە كوپتەگەن ينۆەستيتسيالار تارتىلىپ, كوزدىڭ جاۋىن الاتىن كوركەم عيماراتتار بوي كوتەردى.
– ءبىز ءار قۇرىلىسقا نىسانىنا زاماناۋي ساپالى ماتەريالدار پايدالانىلۋىنا جانە ونىڭ ۋاقىتىلى سالىنۋىنا باستى ءمان بەردىك. بۇل جوبانى كورۋگە ىقىلاس بىلدىرگەن شەتەلدىكتەردىڭ قاتارى وتە كوپ بولدى. ءوزىمىز دە ەلورداعا ينۆەستيتسيا تارتۋ ماقساتىمەن كوپتەگەن ەلدەرگە بارىپ, ارنايى ايماقتى, ونداعى جوبالارعا جاسالاتىن جەڭىلدىكتەر جونىندە كەڭىنەن ايتىپ جۇردىك, – دەيدى ول.
تۋعالى بەرى, تەك ەلوردامەن بىرگە بىتە قايناسىپ كەلە جاتقان اتپال ازامات باقىتىن دا استانادان تاپتى. جان جارى ەكەۋى وسىندا ەلوردادا شاڭىراق كوتەرىپ, بالا ءسۇيىپ, نەمەرە كورىپ وتىر.
قىمبات توقتامۇرات
