استانا – جاستار قالاسى. بۇل ءسوزدىڭ جانى بار, ويتكەنى بۇگىنگى تاڭدا 16 جاستان 35 جاسقا دەيىنگى ەلوردالىقتار سانى جاعىنان بارىنەن كوپ بولىپ وتىر. تاعدىرىن باس قالامەن توعىستىرعان جاستار ءۇشىن ەلوردا اكىمدىگى بىرقاتار جوبالاردى ىسكە قوسقان. سونىڭ ءبىرى – جاستاردىڭ قولجەتىمدى باسپانا الۋىنا كومەكتەسەتىن «ەلوردا جاستارى» تۇرعىن ءۇي باعدارلاماسى. استانا قالاسى اكىمدىگى مەن «وتباسى بانك» وسى باعدارلامانىڭ قارجىلىق قورىن مولايتۋ ءۇشىن 1 ميلليارد تەڭگەدەن قاراجات بولەدى.
باس قالاعا ارمان قۋىپ كەلگەن جاستاردىڭ باس قايعىسى پاتەر ماسەلەسى بولار؟! ال قالا باسشىلىعى جاستار ءۇشىن بار جاعدايدى جاساپ قويعان. استانادا ءۇيلى بولۋ ءۇشىن قولجەتىمدى باعدارلامالار سانى جىل سايىن ارتىپ كەلەدى. سولاردىڭ ءبىرى – «ەلوردا جاستارى» يپوتەكالىق باعدارلاماسى. بۇل – قالالىق اكىمدىك پەن «وتباسى بانكتىڭ» بىرلەسكەن جوباسى. باسپانالى بولعىسى كەلەتىن استانالىق جاستار ءۇشىن «ەلوردا جاستارى» تۇرعىن ءۇي باعدارلاماسى ىسكە قوسىلادى. وسى تۋرالى بانكتىڭ استاناداعى فيليالىنىڭ باسشىسى جانسۇلتان ماتاەۆ تولىققاندى مالىمەت بەردى.
– «ەلوردا جاستارى» باعدارلاماسىن جۇزەگە اسىرۋعا وسىعان دەيىن «وتباسى بانك» 2,1 ملرد تەڭگە, استانا قالاسىنىڭ اكىمدىگى جەرگىلىكتى بيۋدجەتتەن 2,5 ملرد تەڭگە قاراجات بولگەن بولاتىن. بيىل تاراپتاردىڭ ارقايسىسى تاعى 1 ملرد تەڭگەدەن بولمەك. وسىلايشا باعدارلامانى قارجىلاندىرۋعا باعىتتالعان قاراجاتتىڭ جالپى كولەمى 6,6 ملرد تەڭگەگە تەڭ بولادى دەپ جوسپارلانىپ وتىر, – دەيدى بانك فيليالىنىڭ باسشىسى.
ونىڭ ايتۋىنشا, بولىنەتىن يپوتەكالىق نەسيەنىڭ جوعارعى شەگى 18 ملن تەڭگە شاماسىندا قالماق.
– پۋل قۇرىلعاننان كەيىن ونىڭ قاتىسۋشىلارى «وتباسى بانكتەن» يپوتەكالىق نەسيە الۋعا جولداما الادى. بانك باعدارلاما قاتىسۋشىسىنىڭ تولەم قابىلەتىن تەكسەرىپ, جىلدىق مولشەرلەمەسى 5 پايىزبەن (جتسم 5,2%-دان باستاپ) جەڭىلدەتىلگەن يپوتەكالىق نەسيە بەرەدى. العاشقى جارنا – 10%. ەلوردالىق جاستارعا بەرىلەتىن يپوتەكالىق نەسيەنىڭ ەڭ جوعارعى سوماسى – 18 ملن تەڭگە, مەرزىمى – 25 جىلعا دەيىن. ونىڭ كومەگىمەن العاشقى نەمەسە ەكىنشى نارىقتان, سونداي-اق, «قازاقستان تۇرعىن ءۇي كومپانياسى» اق-تىڭ كەپىلدەمەسىمەن ۇلەستىك قاتىسۋ شارتى بويىنشا سالىنىپ جاتقان تۇرعىن ءۇي ساتىپ الۋعا بولادى, – دەدى ج.ماتاەۆ.
بانك وكىلىنىڭ جانە اكىمدىكتىڭ بەرگەن مالىمەتىنە سايكەس, باعدارلامانىڭ شارتى تولىق بەكىتىلمەگەن, نەگىزى وزگەرىسسىز قالۋى ءتيىس.
«ەلوردا جاستارى» باعدارلاماسىن جۇزەگە اسىرۋعا وسىعان دەيىن «وتباسى بانك» 2,1 ملرد تەڭگە, استانا قالاسىنىڭ اكىمدىگى جەرگىلىكتى بيۋدجەتتەن 2,5 ملرد تەڭگە قاراجات بولگەن بولاتىن. بيىل تاراپتاردىڭ ارقايسىسى تاعى 1 ملرد تەڭگەدەن بولمەك. وسىلايشا باعدارلامانى قارجىلاندىرۋعا باعىتتالعان قاراجاتتىڭ جالپى كولەمى 6,6 ملرد تەڭگەگە تەڭ بولادى دەپ جوسپارلانىپ وتىر
– «ەلوردا جاستارى» باعدارلاماسى استانا قالاسى اكىمدىگىنىڭ تاراپىنان جۇرگىزىلىپ جاتقان باعدارلامانى قارجىلاندىرۋىن كۇتەدى. 2023 جىلعا اكىمدىك, جوعارىدا اتاپ وتكەنىمدەي, 1 ملرد تەڭگە ءبولىپ وتىر, ەندى بانك تاراپىنان تاعى 1 ملرد تەڭگە ءبولۋ جۇمىسى جۇرگىزىلىپ جاتىر. ال باعدارلاماعا وتىنىشتەردى قابىلداۋ ناۋرىز ايىنىڭ باسىندا باستالادى دەپ جوسپارلانىپ وتىر, – دەيدى بانك فيليالىنىڭ باسشىسى.
باعدارلامانىڭ تالاپتارى:
– ءوتىنىش بەرگەن ۋاقىتتا قاتىسۋشىنىڭ جاسى 35-تەن (قوسا العاندا) اسپاۋى ءتيىس;
– قاتىسۋشىنىڭ جانە ونىمەن بىرگە تۇراتىن وتباسى مۇشەلەرىنىڭ سوڭعى 1 جىل ىشىندە استانا قالاسىندا تۇراقتى تىركەۋى بولۋى قاجەت;
– قاتىسۋشىنىڭ «وتباسى بانكىندە» ساتىپ الاتىن باسپانا قۇنىنىڭ 10% مولشەرىندەگى العاشقى جارناسى بار دەپوزيتى بولۋى ءتيىس (سالىمنىڭ بار ەكەنى تۋرالى انىقتاما نەمەسە شوت بويىنشا ءۇزىندى كوشىرمە);
– سوڭعى 5 جىلدا باعدارلاماعا قاتىسۋشى مەن ونىڭ وتباسى مۇشەلەرىنىڭ قر اۋماعىندا ساتىپ الۋ قۇقىعىمەن جالدامالى تۇرعىن ءۇيى بولماۋى قاجەت;
– قاتىسۋشىنىڭ ءوتىنىش بەرگەن كەزىندە كەمىندە سوڭعى ءبىر جىل ىشىندە استانا قالاسىندا تاڭدالعان سالاسىندا رەسمي جۇمىس تاجىريبەسى بولۋى ءتيىس. ول زەينەتاقى شوتىنىڭ ءۇزىندى كوشىرمەسىمەن راستالادى;
– وتباسىنىڭ ءبىر مۇشەسىنە شاققانداعى سوڭعى 6 ايداعى تابىس 6 ەڭ تومەنگى كۇنكورىس دەڭگەيىنەن اسپاۋى قاجەت, ياعني 2023 جىلى بۇل سوما 243402 تەڭگەنى قۇرايدى (زەينەتاقى جارناسى, جەكە تابىس سالىعى جانە باسقا دا مىندەتتى جارنالاردى قوسپاعاندا);
– باعدارلاماعا ەرلى-زايىپتىنىڭ بىرەۋى عانا قاتىسا الادى.
«ەلوردا جاستارى» يپوتەكالىق باعدارلاماسىنا استانا قالاسىنىڭ مەملەكەتتىك قالالىق جانە رەسپۋبليكالىق مەكەمەلەرىنىڭ قىزمەتكەرلەرى عانا كەلەسى قىزمەت سالالارى بويىنشا قاتىسا الادى:
– دەنساۋلىق ساقتاۋ (مەديتسينا قىزمەتكەرلەرى, تەحنيكالىق جانە اكىمشىلىك پەرسونالدى قوسپاعاندا);
– ءبىلىم بەرۋ (پەداگوگ قىزمەتكەرلەر, تەحنيكالىق جانە اكىمشىلىك پەرسونالدى قوسپاعاندا);
– مادەنيەت (بەيىندى قىزمەتكەرلەر, تەحنيكالىق جانە اكىمشىلىك پەرسونالدى قوسپاعاندا);
– سپورت (سپورتشىلار مەن جاتتىقتىرۋشى-وقىتۋشىلار);
– الەۋمەتتىك سالا (بەيىندى قىزمەتكەرلەر, تەحنيكالىق جانە اكىمشىلىك پەرسونالدى قوسپاعاندا);
– جوو جانە عزي (وقىتۋشىلار مەن عىلىمي قىزمەتكەرلەر, تەحنيكالىق جانە اكىمشىلىك پەرسونالدى قوسپاعاندا);
– جۋرناليستەر (جۋرناليستەر, كوررەسپوندەنتتەر, پروديۋسەرلەر, بەتتەۋشىلەر, رەداكتورلار, رەجيسسەرلەر, دىبىس ينجەنەرلەرى, تەلە-راديو جۇرگىزۋشىلەرى, فوتوگرافتار, تەلەراديو حابارلارىن تاراتۋ ينجەنەرلەرى, گرافيكالىق جانە مۋلتيمەديالىق ديزاينەرلەر, تەلەراديو حابارلارىن تاراتۋ تەحنيكتەرى, اۋديو-بەينە وپەراتورلارى, تەلەكوممۋنيكاتسيا مونتاجەرلەرى, كونتەنت-مەنەدجەر, ساۋلەلەندىرۋشى, ۆەب-ديزاينەرلەر, مەديا جوسپارلاۋ مەنەدجەرى, مەديا تالداۋشى, SMM-مامان, تەحنيكالىق جانە اكىمشىلىك پەرسونالدى قوسپاعاندا);
– استانا قالاسىنىڭ كوممۋنالدىق كاسىپورىندارىنىڭ/مەكەمەلەرىنىڭ بەيىندى قىزمەتكەرلەرى (كمم, مكقك, شجق مكك, اكىمدىكتىڭ 100% قاتىسۋىمەن اق جانە جشس);
– قىزمەت سالاسىنا قاراماستان, استانا قالاسىندا «جەتىم بالالار» ساناتى بويىنشا تۇرعىن ۇيگە كەزەكتە تۇرعان 35 جاسقا دەيىنگى ازاماتتار.
– استانا قالاسى پوليتسيا دەپارتامەنتىنىڭ قىزمەتكەرلەرى (بەيىندى قىزمەتكەرلەر, تەحنيكالىق جانە اكىمشىلىك پەرسونالدى قوسپاعاندا);
– استانا قالاسى توتەنشە جاعدايلار دەپارتامەنتىنىڭ قىزمەتكەرلەرى (بەيىندى قىزمەتكەرلەر, تەحنيكالىق جانە اكىمشىلىك پەرسونالدى قوسپاعاندا).
وسى ساناتقا جاتاتىن تۇلعالارعا تۇرعىن ءۇي ساتىپ الۋعا جەڭىلدىكپەن يپوتەكالىق نەسيە الۋعا مۇمكىندىك بەرىلەدى. جوبا بويىنشا قارىز الۋشىلاردىڭ جاسى 35-تەن اسپاۋى كەرەك.
ج.ماتاەۆتىڭ ايتۋىنشا, وسى تالاپتارعا سايكەس كەلمەيتىن قاتىسۋشىلار, سونداي-اق «وتباسى بانك» اق-تا تولەم قابىلەتىن راستاي الماعاندار باعدارلاماعا قاتىسا المايدى. ال تۇرعىن ءۇيدى العاشقى نەمەسە ەكىنشى نارىقتان الۋعا بولادى. تاڭدالعان باسپانا قۇنى 18 ملن تەڭگەدەن اساتىن بولسا, قاتىسۋشىلار جەتپەگەن قاراجاتتى ءوز اقشاسى ەسەبىنەن قوسا الادى. الەۋەتتى قارىز الۋشىلاردىڭ ءتىزىمىن جەرگىلىكتى اتقارۋشى بيلىك جاسايدى. باعدارلاماعا قاتىسۋعا zhilfond.kz سايتىندا بولجام بويىنشا بيىلعى ناۋرىز ايىنان باستاپ وتىنىشتەر قابىلدانادى.
جالپى 2021-2022 جىلدار ارالىعىندا باعدارلاماعا قاتىسۋعا 1179 ادام ءوتىنىش بەردى, ونىڭ ىشىندە تولەم قابىلەتىن راستاعان 184 جاس مامان باسپانالى بولدى, بەرىلگەن يپوتەكالىق كرەديت سوماسى – 3,12 ملرد تەڭگەگە جۋىق.
«ەلوردا جاستارى» باعدارلاماسى ارقىلى ءبىر ارمانى ورىندالعان استانالىق جانار بەكىشوۆا باسپانانى قالاي العانى تۋرالى ايتىپ بەردى.
– 2014 جىلدان باستاپ «وتباسى بانكتەگى» شوتىما اقشا جيناي باستادىم. بۇل باعدارلاما تۋرالى كارانتين كەزىندە, 2021 جىلى الەۋمەتتىك جەلىدەن كورىپ قالدىم. سول جىلى اۋەلى وڭتۇستىك استانامىزدا «الماتى جاستارى» دەگەن باعدارلاما شىعىپ جاتتى. «شىركىن, وسىنداي باعدارلاما ەلوردادا دا بولسا عوي» دەگەن ارمان بولدى. ارمانىم ورىندالىپ, كەيىننەن ءبىزدىڭ قالاعا دا كەلدى. قۇربىمنىڭ جەتەلەۋىمەن وسى باعدارلاماعا قاتىستىم. 7 كۇن ىشىندە باعدارلاماعا قۇجات تاپسىرىپ ۇلگەرۋىڭ كەرەك ەكەن. ءوزىم س.سەيفۋللين اتىنداعى قازاق ۇلتتىق اگرارلىق ۋنيۆەرسيتەتىندە وقىتۋشى بولىپ جۇمىس ىستەيمىن. باعدارلاماعا قاتىسۋشىلاردىڭ ىشىندە جوو جانە عزي قىزمەتكەرلەرى ساناتىنا كىردىم. ءبىر قىزىعى, 2014 جىلدان بەرى جيناپ جۇرگەن دەپوزيتتەگى قاراجاتىم باعدارلاماعا قاتىسار كەزدە تۋرا 1,8 ميلليونعا جەتىپ قالىپتى. «ەلوردا جاستارى» باستالعاننان كەيىن 1 ايدان سوڭ ناتيجە شىقتى. 10 كۇن ىشىندە «وتباسى بانكىنە» بارىپ, سەرتيفيكاتتى راستاۋ قاجەت بولدى. 2021 جىلدىڭ جەلتوقسان ايىندا سەرتيفيكاتىمدى الىپ, 2022 جىلدىڭ قاڭتارىنان باستاپ ءۇي ىزدەي باستادىم. ونلاين كەزەككە تۇرۋ قاجەت. 10 كۇن ۋاقىتىم بولدى. وسى ۋاقىتتىڭ ىشىندە سەرتيفيكاتتى راستاپ ۇلگەرمەسەم, ول رەزەرۆتە تۇرعان كەلەسى ادامعا كوشەدى ەكەن. ءۇي الۋعا 3 اي ۋاقىت بەرىلدى. ءسويتىپ, استانادان 20 ميلليونعا العاشقى نارىقتان 3 بولمەلى پاتەرىمدى الدىم, – دەدى ج.بەكىشوۆا.
اياۋلىم التىنبەك
