وتاندىق مەديتسيناعا تسيفرلىق تەحنولوگيالار قارقىندى تۇردە ەنگىزىلۋدە. سونىڭ ناتيجەسىندە ەلوردانىڭ ەمحانالارىندا حالىققا قىزمەت كورسەتۋ ساپاسى جوعارىلادى. ۇكىمەت باسشىسى اسقار مامين ەلورداداعى №10 ەمحاناعا بارىپ, مەديتسينالىق قىزمەت تۇرلەرىنىڭ ساپاسى مەن قولجەتىمدىلىگىن ارتتىرۋ جۇمىستارىنىڭ بارىسىمەن تانىستى. بۇل ەمحانا «100 مەكتەپ, 100 اۋرۋحانا» مەملەكەتتىك باعدارلاماسى شەڭبەرىندە سالىنعان بولاتىن.
اسقار مامين بالالارعا, ۇلكەندەرگە ارنالعان وڭالتۋ ءبولىمىن, امبۋلاتوريالىق حيرۋرگيا, قالپىنا كەلتىرىپ ەمدەۋ, مەديتسينالىق وڭالتۋ ورتالىقتارىن ارالاپ كوردى. وسى ورتالىقتاردا قاناتقاقتى جوبا رەتىندە دەنساۋلىق ساقتاۋ سالاسىنداعى سوڭعى تسيفرلىق تەحنولوگيالار ەنگىزىلگەن. بۇل – ناۋقاستاردىڭ كەلۋىن رەتتەۋ جانە ءبىرىنشى كەزەكتە شۇعىل مەديتسينالىق كومەك كورسەتۋ, ءدارى-دارمەكتەرمەن قامتاماسىز ەتۋدىڭ ينتەگراتسيالانعان اقپاراتتىق جۇيەسى, سونداي-اق ەلەكتروندى مەديتسينالىق تولقۇجاتتار كىرەتىن Triage-جۇيەسى. تۇرعىندارمەن كەرى بايلانىس ورناتۋ ءۇشىن دارىگەرلەردىڭ جۇمىس ساپاسىن باعالايتىن ءموبيلدى قوسىمشا ىسكە قوسىلعان. ەمحانانىڭ باس دارىگەرى گ.الپىسبەكوۆا تسيفرلاندىرۋ جۇيەسىن ەنگىزۋ ناتيجەسىندە ناۋقاستاردىڭ كەزەككە تۇرۋى 60 پايىزعا ازايعانىن ءمالىم ەتتى.
ەمحانانى ارالاپ بولعان سوڭ, ۇكىمەت باسشىسىنا العاشقى دارىگەرلىك-سانيتارلىق كومەك كورسەتەتىن مەديتسينالىق ۇيىمدار جەلىسىن قۇرۋ جوباسى تانىستىرىلدى. جالپى العاندا, شەتكەرى ايماقتارداعى تۇرعىندار ءۇشىن مەديتسينالىق كومەكتىڭ جوعارى قولجەتىمدىلىگىن قامتاماسىز ەتۋ ماقساتىندا بيىل نۇر-سۇلتان قالاسىندا 11 قوسىمشا مەديتسينالىق ۇيىمدار اشۋ كوزدەلگەن. ۇكىمەت باسشىسىمەن ىلەسىپ جۇرگەن دەنساۋلىق ساقتاۋ ءمينيسترى ەلجان ءبىرتانوۆ دارىگەرلەر قاۋىمىنا وتە جاعىمدى جاڭالىقتى جەتكىزدى. «ەلباسىنىڭ «الەۋمەتتىك قامقورلىق» اتتى الەۋمەتتىك شارالارىن ىسكە اسىرۋ اياسىندا 2019 جىلدىڭ 1 ماۋسىمىنان باستاپ ۋچاسكەلىك دارىگەرلەردىڭ جالاقىسى 224 مىڭ تەڭگەگە دەيىن, ورتاشا مەديتسينالىق قىزمەتكەرلەردىڭ ەڭبەكاقىسى 163 مىڭ تەڭگەگە دەيىن وسەدى» دەدى مينيستر.
