جاقىندا تاۋەلسىزدىك سارايىندا ەرەكشە كورمە ءوتتى. ەرەكشەلىگى سول, وندا تەك قانا ۇلتتىق ونىمدەر جۇرتشىلىق نازارىنا ۇسىنىلدى.
«دامۋ» قورى ۇيىمداستىرعان كورمەگە رەسەي, پاكىستان, ازەربايجان, مالايزيا, تۇركيا, وڭتۇستىك كورەيا, پولشا, وزبەكستان ەلدەرىنەن 500-دەن اسا كومپانيا قاتىستى. سونداي-اق, ەلىمىزدىڭ تۇكپىر-تۇكپىرىنەن ازىق-تۇلىك, قۇرىلىس, جيھاز, توقىما ونەركاسىبى, اۋىل شارۋاشىلىعى سەكىلدى ءتۇرلى سالالاردى دوڭگەلەتىپ وتىرعان كاسىپكەرلەر باس قوستى.
«دامۋ» قورىنىڭ باستى ماقساتى – ەلىمىزدەگى شاعىن جانە ورتا بيزنەستى (شوب) دامىتۋ. ەندى وسى مىندەتتى ورىنداۋ ءۇشىن «دامۋ» قورى وزبەكستان جانە ازەربايجان مەملەكەتتەرىمەن بىرلەسىپ جۇمىس ىستەيتىن بولدى.
– شەتەلدىك ۇيىمدارمەن ىنتىماقتاستىق ورناتىپ وتىرعانىمىزدىڭ ءمانى زور. بۇگىن ءبىز ازەربايجاننىڭ شوب دامىتۋ اگەنتتىگىمەن جانە وزبەكستاننىڭ كاسىپكەرلىكتى قولداۋ جانە دامىتۋ مەملەكەتتىك قورىمەن بىرگە كەلىسىمگە قول قويدىق. بۇل كەلىسىم سەرىكتەستىگىمىزدىڭ نەگىزىن قالاپ, بىرلەسكەن باعدارلامالار مەن جوبالاردى ىسكە اسىرۋ ءۇشىن مۇمكىندىكتەر اشادى, – دەدى «دامۋ» قورىنىڭ باسشىسى گاۋھار بورىباەۆا.
ءوز كەزەگىندە وزبەكستاننىڭ مينيسترلەر كابينەتىنىڭ مۇشەسى ەكۋب وماروۆ بۇل كەلىسىمنىڭ ورنى ەرەكشە ەكەنىن ايتا كەلىپ, «Ulttyq ónim-2019» كورمەسى وزگە ەلدەرمەن قارىم-قاتىناس ورناتۋعا ۇلكەن سەپتىگىن تيگىزەتىنىن جەتكىزدى.
– ءبىز «دامۋ» قورىنىڭ قىزمەتىن جوعارى باعالايمىز جانە ورناتقان سەرىكتەستىگىمىزدەگى العاشقى قادامدار وسى كورمە اياسىندا جاسالعانىنا قۋانىشتىمىز. مەموراندۋم ءبىزدىڭ شاعىن جانە ورتا كاسىپكەرلىگىمىز ءۇشىن جاڭا مۇمكىندىكتەر اشادى, – دەدى ازەربايجان KOBIA شوب قولداۋ اگەنتتىگىنىڭ باسقارما توراعاسى ورحان مامەدوۆ.
