ءيا, مەن دە بيىل 30 جاسقا تولدىم, ەلىممەن بىرگە تاۋەلسىزدىگىمنىڭ يگىلىگىن سەزىنىپ كەلەمىن. ەگەمەندىكتى, ەلدىكتى, ەلىمنىڭ قامقورلىعىن, جۇرتىمنىڭ بوستاندىعىن سەزىنىپ ءجۇرمىن. مەن قازاقتىڭ ەركە قىزىمىن, ويتكەنى مەنى ءوز پاناسىنا الىپ وتىرعان ءبىرتۇتاس ءور حالقىم بار. ءبىز ەركىن وستىك, بىرەۋگە تاۋەلدىلىك, جاسىبايلىلىق پەن جوقتىقتى بىلمەي وستىك. اش ءجۇرۋدىڭ, قۇلدىق پەن بوداندىقتىڭ نە ەكەنىن بىلمەيمىز. قايعىقاسىرەت, زورلىقزومبىلىق دەگەن ۇعىمدار مەنىڭ قۇرداستارىم ءۇشىن جات. مۇنىڭ بارلىعى – تاۋەلسىزدىكتىڭ ارقاسى.
تاۋەلسىزدىك استارىندا ۇلكەن ءمان بار ەكەنىن تۇسىنەمىن. بۇل ءسوزدى ءبىز اسپاندا نۇرىن شاشقان, جارقىراعان كۇندەي كورىپ جۇرسەك, كەزىندە بۇل ءسوزدىڭ قانداي ۇعىم, نەنى بىلدىرەتىنىن بىلمەي وتكەندەر دە بولعان. بىلگەندەرى ەگەمەندىكتى اڭساۋمەن وتكەن نەمەسە ونىڭ جولىندا قۇربان بولىپ كەتكەن. ارعى جاعىن ايتپاي-اق قويايىن, «اقتابان شۇبىرىندى» زامانىنان بەرگى زۇلماتتاردىڭ ءوزى قازاعىمنىڭ باسىنان وتكەرگەن ازابى از بولماعانىن كورسەتەدى. رەسەي يمپەرياسىنىڭ وتارلاۋ ساياساتى, ۇلت-ازاتتىق كوتەرىلىس, قولدان جاسالعان اشارشىلىق ناۋبەتى, ساياسي قۋعىن-سۇرگىن, ەكىنشى دۇنيەجۇزىلىك سوعىس, جەلتوقسانداعى جالىندى جاستارىمىز. مىنە, ەركىندىگىمىزدىڭ قۇنى وسى باعامدارمەن ولشەنەدى. جاراتقانعا شۇكىر, قازىر مەنىڭ اسپانىم اشىق, ءتورت قۇبىلام تەڭ, ەڭسەم تىك, قادامىم نىق! 30 جىلدا قول جەتكىزگەن 30 جەتىستىگىم دە بار! ولار ەلىمنىڭ ارقاسىندا جانە ەلىم ءۇشىن جاسالدى. مەكتەپتە دە, جوعارى وقۋ ورنىندا دا, شەتەلدە دە تەگىن ءبىلىم الدىم. قاراعاندى وبلىسى دەنساۋلىق ساقتاۋ باسقارماسى وبلىستىق تەرى-ۆەنەرولوگيالىق ديسپانسەرىندە, قاراعاندى مەديتسينا ۋنيۆەرسيتەتىنىڭ مەديتسينالىق كوللەدجىندە, قاراعاندى مەملەكەتتىك مەديتسينا ۋنيۆەرسيتەتىندە, استانا مەديتسينالىق ۋنيۆەرسيتەتىندە جۇمىس ىستەدىم. قازىر نۇر-سۇلتان قالاسى اكىمدىگىنىڭ №10 قالالىق ەمحاناسىندا ەڭبەك جولىمدى جالعاستىرىپ جاتىرمىن. ەل مەرەيىنىڭ ۇستەم, حالىق دەنىنىڭ ساۋ بولۋى ءۇشىن دەنساۋلىق ساقتاۋ سالاسىندا ايانباي ەڭبەك ەتىپ, تاۋەلسىزدىك تۇعىرىنىڭ بەكەم بولۋىنا وسى ەلدىڭ ازاماتى رەتىندە ءوز ۇلەسىمدى قوسا بەرەمىن. ال قۇرداستارىما ايتارىم: قاسىرەتتى دە قاسيەتتى تاۋەلسىزدىگىمىزدىڭ تۋىن نىق ۇستايىق!
ماۋسىم امانتاي, دارىگەر
