ەرتەڭ قىتايدا قازاقستان ءتۋريزمى جىلى رەسمي تۇردە باستاۋ الادى
28 جانە 29 ناۋرىزدا بەيجىڭدە قىتايداعى قازاقستان ءتۋريزمى جىلىنىڭ رەسمي اشىلۋى وتەدى, دەپ حابارلايدى astana-akshamy.kz.
2024 جىلدىڭ قىتايداعى قازاقستان ءتۋريزمى جىلى بولىپ جاريالانعانى قاسىم-جومارت توقاەۆتىڭ 2023 جىلى قىتايعا رەسمي ساپارى بارىسىندا بەلگىلى بولدى. قازىرگى تاڭدا بەيجىڭگە قازاقستاننىڭ رەسمي دەلەگاتسياسى كەلىپ جەتتى. ونىڭ قۇرامىندا پرەمەر-ءمينيستردىڭ ورىنباسارى, سىرتقى ىستەر ءمينيسترى مۇرات نۇرتىلەۋ, تۋريزم جانە سپورت ءمينيسترى ەرمەك مارجىقپاەۆ, سونداي-اق اكىمدىكتەردىڭ, «Kazakh Tourism» ۇلتتىق كومپانياسىنىڭ, «اتامەكەن» ۇكپ-نىڭ وكىلدەرى مەن 150-دەن استام مادەنيەت قايراتكەرلەرى بار.
قازىرگى تاڭدا رەسمي ءىس-شارالار وتەتىن نىسانداردا قىزۋ دايىندىق بارىسى ءجۇرىپ جاتىر. كونفەرەنس زال مەن كونتسەرتتىك زالدار قوناقتاردى كۇتۋگە ازىرلەنىپ, ارتىستىك ۇجىمدار دايىندىقتارىن جۇرگىزىپ جاتىر. جىلدىڭ اشىلۋى اياسىندا بىرقاتار ءىس-شارا وتەدى. ولار تۋريزم جانە ينۆەستيتسيالاردى دامىتۋ بويىنشا قازاقستان-قىتاي فورۋمى, قازاقستان وبلىستارىنىڭ كورمەسى, ەتنواۋىلداعى مادەني ءىس-شارالار, سونىمەن قاتار گالا-كونتسەرت بولماق. ۇيىمداستىرۋشى – قازاقستان رەسپۋبليكاسى تۋريزم جانە سپورت مينيسترلىگى. ايتا كەتەيىك, فورۋمعا قاتىسۋشىلار قازاقستاننىڭ 17 وبلىسىنىڭ ستەندتەرىن تاماشالاي الادى. وندا ءاربىر ءوڭىردىڭ تۋريستىك نىساندارى كورسەتىلگەن. سونداي-اق فورۋم اياسىندا تۋريزم سالاسىنداعى مەملەكەتتىك ورگاندار مەن كومپانيالاردىڭ قاتىسۋىمەن ەكى پانەلدىك سەسسيا وتەدى.
ءبىرىنشى سەسسيا «قىتاي ساياحاتشىلارى ءۇشىن قازاقستانداعى ۇيىمداستىرىلعان تۋريزم مۇمكىندىكتەرى», ەكىنشى سەسسيا «تۋريستىك بيزنەستەگى ارىپتەستىك: قازاقستان-قىتاي اراسىنداعى ينۆەستيتسيالىق مۇمكىندىكتەر». وعان قوسا, فورۋم بارىسىندا «Kazakh Tourism» ۇلتتىق كومپانياسى مەن Messe Frankfurt Asia Holding وكىلدەرى اراسىندا ءوزارا تۇسىنىستىك تۋرالى مەموراندۋمعا قول قويىلادى. ءوز كەزەگىندە قازاقستان مادەنيەتىن گالا-كونتسەرتتە ونەر كورسەتەتىن ارتىستەر تانىستىرادى. ولاردىڭ قاتارىندا شىعارماشىلىق مۋزىكا جانە بي ۇجىمدارى, سونداي-اق روزا رىمباەۆا, ءالي وقاپوۆ, مايرا مۇحامەدقىزى, زارينا التىنباەۆا, «ۇلىتاۋ» توبى جانە باسقا دا جارقىن سوليستەر بار. گالا-كونتسەرتتە قىتايدىڭ ونەرپازدارى دا ونەر كورسەتەدى. وعان قوسا, دەلەگاتتار تىزىمىندە وليمپيادا چەمپيونى سەرىك ساپيەۆ, UFC سپورتشىسى شاۆكات راحمونوۆ پەن وليمپيادا جۇلدەگەرى قانات يسلام دا بار.