مەن اعىلشىنشادان قاقپايمىن. قاسىمداعى تىلشىلەردىڭ دە «I love you!» دەگەننەن باسقاعا تىلدەرى كەلمەي-اق قويعان. سويتە تۇرا, ءبارىمىز اعىلشىندىق ارىپتەسىمىز دجوناتان نيۋۆەللدەن ۇيالىپ ءجۇرمىز. ءوزىمىز ونىڭ انا ءتىلىن مەڭگەرە الماعاندىقتان ەمەس, ەسىگىمىزدەن ەسىن شىعارا قۋعانىمىز ءۇشىن! قالاي دەيسىز عوي؟..
بىردە ول جىگىت استاناعا كەلگەندە «حالىقارالىق» دەگەن مارتەبەسى بار اۋەجايىمىزدان «قاتتى ساسىپ, بەتتى باسىپ, تۇرا قاشتى جالما-جان». ەلىنە جەتىپ العاننان كەيىن, «قازاقستاندىق ۇلتتاردىڭ» حالىقارالىق تىلدەن ماقۇرىمداۋ ەكەنىن بەتكە سالىق ەتىپ, الەۋمەتتىك جەلى ارقىلى الەمگە جار سالدى. اۋەجاي تەرمينالدارىنان قاتە جازۋلاردى كورىپ, ءوز كوزىنە ءوزى سەنبەپتى. ەندى بۇعان وزگە جۇرت سەنە مە ەكەن دەگەندەي, ءبىر سۋرەتتى عالامتورعا جاريالاپ كورگەن. سويتسە, تەلەتىلشى دجوناتاندى ءبىز راس قۋىپپىز. ءبۇي دەيدى ول: «قازاق ەلورداسىنىڭ «استاناعا حوش كەلدىڭىز!» دەگەندەرى – دۇرىس اۋدارما. ال, «Push» – «يتەر» دە, «Push off» – «بۇل جەردەن كەت» دەگەن ءسوز. بۇنداي جازۋدى اۋەجايدان سىرتقا شىعاتىن ونشاقتى ەسىكتەن بايقادىم. دەمەك, جولاۋشى «بۇل جەردەن كەت» دەگەندى قازاقستاننىڭ كەز كەلگەن ەسىگىنەن وقي الادى. باسقاسىن قايدام, ايتەۋىر, استانالىق اۋەجايعا جاڭا اۋدارماشى قاجەت دەپ ويلايمىن».
ءۇيباي-اي! ۇيات-اي! ماسقارا-اي!.. ەسىگىمدى لاستاپتى.
وپشىم, «وزىڭە قاراي», «وزىڭنەن كەرى» دەپ ءسوزدى كوبەيتىپ جۇرگەن اۋدارماسىماقتارىمىز سول دجوكەڭنىڭ تىلىنەن تىكەلەي تارجىمالاعاندا «تارت», «يتەر» عانا ەكەن عوي. ءبىر ءسوزدى ەكى ەتىپ, ەكى ءسوزدى ەكى ەسەلەۋدەن كورەتىن قۇقايىمىز – وسى!
اعىلشىن ارىپتەسىمنىڭ بازىناسى عالامتورعا شىعا سالىسىمەن, استانا اۋەجايىنىڭ پرەزيدەنتى قايرات جاۋحانوۆ قاتە جازۋلاردىڭ تۇزەتىلگەندىگىن بىلايشا حابارلاپ جاتتى: «استانا اۋەجايىنداعى جولاۋشىلار تەرمينالىنىڭ رەسىمدەلۋىنە اسا ۇلكەن كوڭىل بولگەنى ءۇشىن دجوناتان نيۋۆەلل مىرزاعا العىسىمدى بىلدىرەمىن!». بەۋ دە! قىزدى-قىزدىمەن «نيۋۆەلدى نوبەلگە ۇسىنۋ كەرەك!» دەمەگەنىنە شۇكىر. ەگەر اناۋ قاتەنى ەپتەپ اعىلشىن ءتىلىن وقىعان ءبىزدىڭ كورشى قىز كورە قالسا, وعان «ءپىشتۋ…» دەپ مۇرىن شۇيىرۋلەرى مۇمكىن. قازاقستاندىق قازاق بولعانى ءۇشىن عانا جازىقتى بولىپ قالار ەدى-اۋ, بايعۇس!
ول اۋەجايىمىزدىڭ تاعى ءبىر حيكاياسى بار. بيىلعى جازدىڭ باسىندا تابيعاتقا زالال كەلتىرگەنى ءۇشىن 13 ملن 600 مىڭ تەڭگە ايىپپۇلعا ءتۇسىپ قالعان. وسەك ەمەس, استانانىڭ اۆياتسيالىق كولىكتىك پروكۋرورى نۇرلان احمەتباەۆتىڭ ءوزى ايتىپ وتىر. «اۋە كەروسينى توگىلگەننەن كەيىن تەكسەرۋ جۇرگىزىلىپ, اۋەجايدىڭ ەكولوگيالىق زاڭنامانى بۇزعاندىعى انىقتالدى» دەيدى ول.
ءۇيباي-اي! ۇيات-اي! ماسقارا-اي!.. ەسىلىمدى لاستاپتى.
ەركەعالي بەيسەنوۆ
