ۇلى جەڭىستىڭ 70 جىلدىعىنا وراي قازاقستان رەسپۋبليكاسىنىڭ ۇلتتىق بانكى نومينالى 500 تەڭگەلىك جانە نومينالى 50 تەڭگەلىك «proof» ساپالى ەسكەرتكىش مونەتالاردى اينالىمعا شىعاردى.
كۇمىستەن جاسالعان 500 تەڭگەلىك مونەتانىڭ سىرتقى بەتىندە الماتى قالاسىنداعى «28 گۆاردياشى-پانفيلوۆشىلار» ساياباعىنداعى «داڭق» مەموريالىنىڭ كەسكىنى كورسەتىلگەن. سونىمەن قاتار جەڭىس جىلىن بىلدىرەتىن «1945» جانە مونەتانىڭ سوعىلعان جىلىن بىلدىرەتىن «2015» دەگەن تاڭبالار ورنالاسقان. اينالدىرا قازاق جانە ورىس تىلىندە «ۇلى جەڭىسكە 70 جىل», «70 لەت ۆەليكوي پوبەدە» دەگەن جازبالار جازىلعان.
نەيزيلبەر قوسپاسىنان جاسالعان 50 تەڭگەلىك ەسكەرتكىش مونەتا دا ءدال وسى ۇلگىدە دايىندالعان. مونەتانىڭ جوعارعى بەتكى بولىگىندە قازاقستان ەلتاڭباسى بەينەلەنگەن. ودان وڭعا قاراي ۇلتتىق بانكتىڭ قىسقارعان اتاۋى ورنالاسقان. تومەنگى بولىگىندە مونەتانىڭ نومينالىن بىلدىرەتىن «50 تەڭگە» دەگەن جازبا جانە ونىڭ ەكى جاعىندا ۇلتتىق ويۋ-ورنەك ەلەمەنتى بەينەلەنگەن. مەملەكەتتىك تىلدەگى «قازاقستان ۇلتتىق بانكى» جازۋى اينالدىرا جازىلعان.
نومينالدىق قۇنى 500 تەڭگەلىك جانە 50 تەڭگەلىك ەسكەرتكىش مونەتالار قازاقستان رەسپۋبليكاسىنىڭ بۇكىل ايماعىندا كورسەتىلگەن قۇنىمەن تولەمنىڭ بارلىق تۇرلەرى بويىنشا, سونداي-اق, بانك شوتتارىنا ەسەپتەۋ ءۇشىن جانە اۋدارىم جاساۋ ءۇشىن قابىلدانۋعا مىندەتتى. قازاقستان رەسپۋبليكاسىنىڭ بارلىق بانكتەرىندە شەكتەۋسىز ۇساقتالادى جانە ايىرباستالادى.
تۇرماعانبەت كەنجەباەۆ
