ەلوردادا «جاڭا مىڭجىلدىقتىڭ جاڭا استاناسى» اتتى كورمە ءوتتى. «استانا – تۇركى مادەنيەتىنىڭ استاناسى – 2012» جىلى اياسىندا وتكەن شارانىڭ ۇيىمداستىرۋشىلارى – قر مادەنيەت جانە اقپارات مينيسترلىگى مەن «قازاقستان حالقىنىڭ رۋحاني دامۋ قورى» اق.
«كەرۋەن» ساۋدا جانە ويىن-ساۋىق ورتالىعىنداعى «ارۋ ارت» گالەرەياسىنا قازاقستان, ازەربايجان, تۇركيا, باشقۇرتستان, سولتۇستىك كيپر, گاگاۋزيا (مولدوۆا), حاكاسيا جانە تاتارستاننان جينالعان 25 فوتوسۋرەتشىنىڭ تۋىندىسى قويىلدى. استانانى سان قىرىنان بەينەلەگەن فوتوسۋرەتشىلەر وزدەرىنىڭ تاجىريبە ورەسىندە وزگەشە تۋىندى جاساۋعا ۇمتىلعاندارىن بايقاتتى.
سۋرەتشىلەردى ماراپاتتاۋ سالتاناتىندا مادەنيەت كوميتەتىنىڭ توراعاسى تىلەۋعالي قىشقاشباەۆ بارلىق قاتىسۋشىلارعا مينيسترلىكتىڭ العىس حاتىن تابىستاپ, «كورمەدە استانانىڭ زاماناۋي قالپى مەن دامۋى, سونىمەن قاتار قالانىڭ حالىقارالىق ىسكەر جانە مادەني ورتالىق رەتىندە قالىپتاسۋ ءۇردىسى فوتوتۋىندىلار ارقىلى كورسەتىلدى» دەگەن لەبىزىن ءبىلدىردى.
«بۇل جوباعا قاتىسقانىما وتە قۋانىشتىمىن. بۇل ەلوردامىزدىڭ تۇركى تىلدەس ەلدەردىڭ استاناسى جىلى اياسىنداعى كوپ شارانىڭ ءبىرى عانا. دەگەنمەن, فوتوسۋرەتشىلەر ءۇشىن باس قوسىپ, تاجىريبە الماسۋعا, ورتاق جوبا شەڭبەرىندە ءبىر-ءبىرىمىزدى بىلە تۇسۋىمىزگە زور مۇمكىندىك بەرىلدى. باۋىرلاس ەلدەردەن كەلگەن ارىپتەستەرىممەن بىرلەسە جۇمىس جاساعان ماعان قىزىق, ءارى پايدالى بولدى» دەيدى استانالىق فوتوسۋرەتشى ارمات بەكتاس.
شىنار ءابىلدا
