«استانا بالەت» تەاترىندا «قار پاتشايىمى» بالەتىنىڭ پرەمەراسى ءوتتى.
«قار حانشايىمىن» رەسەيدىڭ ەڭبەك سىڭىرگەن ونەر قايراتكەرى, تاتارستان رەسپۋبليكاسىنىڭ حالىق ءارتىسى گەورگي كوۆتۋن قويدى. دانيالىق جازۋشى گانس حريستيان اندەرسەننىڭ وسى اتتاس ەرتەگىسىنىڭ جەلىسىمەن قويىلعان عاجايىپ سپەكتاكل ماەسترو ارمان ورازعاليەۆتىڭ جەتەكشىلىگىندەگى سيمفونيالىق وركەستردىڭ سۇيەمەلدەۋىمەن ءوتتى.
بۇل ەرتەگى كومپوزيتور راديك ساليموۆ, كوستيۋم سۋرەتشىسى ءارى سۋرەتشى-ستسەنوگراف زلاتا تسيرتسەنس, جارىق سۋرەتشىسى الەكسەي ماركوۆ جانە «استانا بالەت» ارتىستەرىنىڭ قولداۋىمەن قويىلدى. بي ونەرىنىڭ قۇدىرەتىمەن ساحنادا بالا كەزدەن تانىس بەينەلەرگە جان بىتەدى. انتۋراجى وزگە قالىپتا بولعانىمەن, ولاردى تانۋعا بولادى. بالەتتە ەرتەگى كەيىپكەرلەرى جاڭا قىرىنان تانىلىپ, ساحنادا مۋزىكا, قيمىل, سان الۋان تىڭ بوياۋلاردىڭ ۇيلەسىمىنەن تۋعان عاجايىپ الەمگە تاپ بولاسىز.
– قازىرگى بالالار قورشاعان ورتانى جىلدام قابىلداپ, بويىنا سىڭىرەدى. ەرەسەكتەردىڭ مىندەتى – وسى الەمنىڭ اسەم تۇستارىن كورسەتىپ, كوركەمدىككە باۋلۋ. مەنىڭ ويىمشا, ەرتەگى – وسى الەمدى تانۋ جولىنداعى العاشقى ساتى. ءوز باسىم وسى ارقىلى عاجايىپ الەمدى ەلەستەتەمىن. مۇندا جاقسىلىق زۇلىمدىقتى جەڭىپ, ادىلدىك سالتانات قۇرادى, ادام بالاسىنىڭ بويىنداعى جامان ادەت, ءناپسى تىيىلىپ, اقىرى تۋرا جولعا قادام باسىپ, ماحاببات ءاردايىم سالتانات قۇرادى. مەنىڭ جاڭا ەرتەگىم وسى جايلى, – دەيدى گەورگي كوۆتۋن.
بي ءتىلىنىڭ قۇدىرەتىمەن بالا كەزدەن تانىس قار پاتشايىمى مەن گەردا جايلى ەرتەگىگە جان ءبىتىپ, ءوزىنىڭ سۇيىسپەنشىلىگىنىڭ ارقاسىندا ءىنىسىنىڭ مۇز باسقان جۇرەگىن ءجىبىتىپ, قار پاتشايىمىنىڭ ارباۋىنان اراشالاپ قالعان قايسار قىز جايلى قويىلىمدى تاماشالاي الامىز. ءىنىسىن ىزدەپ شىققان گەردا تالاي وقيعالاردى باسىنان وتكەرەدى. الدىنان كەس-كەستەپ شىققان تالاي كەدەرگىنى بۇزىپ-جارىپ, ەڭ اقىرى, زۇلىم سيقىرشىمەن شايقاستا دا جەڭىپ شىعادى. ءسويتىپ, گەردانىڭ ادال جۇرەگى بۇكىل قيىنشىلىقتان امان الىپ شىقتى.
– وسى عاجايىپ قويىلىمدا دوستارىنا الاڭداعان كەيىپكەردىڭ كۇيزەلىسى عالامات ءسان-سالتاناتقا ۇلاسىپ جاتادى. سەن دە بالەت كەيىپكەرلەرىمەن بىرگە بالا كەزدەن تانىس ەرتەگىنى ءوز باسىڭنان وتكىزگەندەي كۇي كەشەسىڭ. مەنىڭشە, بۇل قويىلىم ەرەسەكتەرگە دە, بالالارعا دا اسەر ەتىپ, قىستىڭ سۇرەڭسىز تىرشىلىگىنە ءبىر ساۋلە تۇسىرەدى. عاجايىپ مۋزىكا, اسەم كوستيۋمدەر مەن عالامات دەكوراتسيالار بالالارعا تۇسىنىكتى تىلدە ماڭگىلىك ادامي قۇندىلىقتار جايلى بايانداپ بەرەدى, – دەيدى تەاتر ءارتىسى ايدان قالجان.
سپەكتاكلدە جاقسىلىق زۇلىمدىقتى جەڭىپ, كورەرمەن قاۋىم عاشىق جۇرەكتە تىلسىم كۇش بارىنا كوز جەتكىزەدى. بۇل – شىنايى ماحاببات پەن دوستىق جايلى, مۇز قۇرساۋدى ءجىبىتىپ, زۇلىمداردىڭ ارباۋىنان اراشالاپ قالار ادالدىق پەن البىرت جۇرەك جايلى, سونىمەن بىرگە, اسىل ارماندار مىندەتتى تۇردە ورىندالاتىنى جايلى حيكايا. ەڭ باستىسى, باسىڭا ءىس ءتۇسىپ, بويىڭدى ۇرەي بيلەگەندە جانىڭا مەدەۋ بولار سۇيىكتى ادامىڭ تابىلارىنا سەنۋ كەرەك.
«قار پاتشايىمى» – وتباسىڭىزبەن بىرگە تاماشالايتىن, ءار ساحناسى قىزىقتى رەجيسسەرلىك جانە كوركەم شەشىمدەرگە باي قويىلىم. قيال-عاجايىپ حيكايانىڭ جۇرەكتى ەلىتىپ اكەتەر اتموسفەراسى اسەم كوستيۋم ءارى عاجايىپ دەكوراتسيالارمەن ۇيلەسىپ, كورەرمەن قاۋىمدى ناعىز تاڭعاجايىپ سيقىر مەن قيال الەمىنە جەتەكتەپ اكەتەدى. پرەمەرا قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ قولداۋىمەن وتكىزىلدى.
