ماۋسىم ايىندا ۇلتتىق كاسىپكەرلەر پالاتاسى مەن قر حالىق بانكى ءوزارا ىنتىماقتاستىق مەموراندۋمىنا قول قويعان بولاتىن. ناتيجەسىندە اتالمىش بانكتىڭ استانا وڭىرلىك فيليالىندا شاعىن جانە ورتا بيزنەس وكىلدەرىنە ارنالعان كەڭەس بەرۋ ورتالىعى اشىلدى. جوبا مازمۇنىن تالقىلاۋ ءۇشىن «دوڭگەلەك ۇستەل» ۇيىمداستىرىلىپ, وندا استانالىق كاسىپكەرلەر دە باس قوستى.
كاسىپكەرلىكپەن اينالىسقىسى كەلسە دە, نەدەن, قالاي باستاۋ كەرەكتىگىن بىلمەي جاتادى كەيبىرى. سوندايدا جاقىن دوسىڭنىڭ, كورشى-قولاڭنىڭ ەمەس, ءىستىڭ كوزىن بىلەتىن بىلىكتى ماماندارمەن اقىلداسقان ءجون. جوبانىڭ نەگىزگى ماقساتى دا سول – سۋ تەگىن بەرىلەتىن كەڭەستەردىڭ ارقاسىندا بيزنەسكە ەندى اياق باسقانداردى دۇرىس جولعا باعىتتاپ, كاسىپكەرلەرگە قولداۋ كورسەتۋ. بۇل ماڭىزدى ىسكە حالىق بانك مەنەدجەرلەرى دە ساقاداي ساي ەكەن. ولارعا وسىدان ءبىر اي بۇرىن مەملەكەتتىڭ كاسىپكەرلىكتى قولداۋ باعدارلامالارى بويىنشا ۇلتتىق كاسىپكەرلەر پالاتاسى ءدارىس بەرىپ وقىتىپتى.
«حالىققا وسىنداي مۇمكىندىكتەر جاسالۋدا. ەندى ولاردىڭ مىندەتى كەڭەس ورتالىعىنا كەلىپ, كاسىپكەرلىككە بايلانىستى كەز كەلگەن سۇراقتارىن قويۋ بولسا, ءبىزدىڭ مىندەتىمىز – ءتۇسىندىرۋ جۇمىستارىن تياناقتى جۇرگىزۋ. سونىمەن بىرگە, بۇگىننەن باستاپ كەلگەن كليەنتتەردىڭ سانىن, ءجيى قويىلاتىن سۇراقتاردى تىركەپ, اي سايىن مونيتورينگ جۇرگىزەمىز. بۇل قىزمەتكە سۇرانىس كوبەيگەن جاعدايدا ءدال وسىنداي تاعى ءبىر ورتالىق اشامىز. قىزىعۋشىلار از بولسا, دەمەك ءبىز ناسيحاتتى كۇشەيتۋىمىز كەرەك» دەيدى «قازاقستان حالىق بانكى» اق استانا وڭىرلىك فيليالىنىڭ ديرەكتورى نۇرلىبەك ەرجىگىتۇلى. ونىڭ ايتۋىنشا, جوعارىدا اتالعان ورتالىقتا «بيزنەستىڭ جول كارتاسى – 2020» باعدارلاماسى اياسىندا كاسىپكەرلەرگە كورسەتىلەتىن كومەك تۇرلەرى ايتىلىپ, وسى باعدارلاماعا قاتىسۋ شارتتارى, سەرۆيس قىزمەتتەرى جايلى تولىق اقپارات ۇسىنىلادى. «بجك – 2020» باعدارلاماسىنىڭ ءبىرىنشى جانە ءۇشىنشى باعىت شەڭبەرىندە كرەديتتەر بويىنشا سىياقى مولشەرىن سۋبسيديالاۋ, كەپىلدى كرەديتتەر مەن گرانتتىق قارجىلاندىرۋ تۋرالى دا مول اقپارات الۋعا مۇمكىندىك بار. سونداي-اق, كاسىپكەرلەرگە «دامۋ» كاسىپكەرلىكتى دامىتۋ قورىنىڭ وڭدەۋشى ونەركاسىپ سالاسىنداعى جەكە كاسىپكەرلىك سۋبەكتىلەرىن قولداۋ باعدارلاماسى مەن ايەلدەر كاسىپكەرلىگى سۋبەكتىلەرىن كەزەكتى كرەديتتەۋ تۋرالى تۇسىندىرىلەدى.
ايتا كەتەيىك, قازاقستان حالىق بانكى شاعىن جانە ورتا بيزنەستى قارجىلاندىرۋدىڭ وڭتايلى قىزمەتتەرىن ۇسىنىپ ءجۇر. بۇگىندە بۇل بانك «بيزنەستىڭ جول كارتاسى – 2020», «دامۋ ءوندىرىس ءىى» جانە «اگروبيزنەس – 2020» باعدارلامالارىنىڭ جۇزەگە اسۋىنا بەلسەندى تۇردە اتسالىسۋدا. تولىق اقپارات الۋ ءۇشىن «قازاقستان حالىق بانكى» اق ءاوف شاعىن جانە ورتا بيزنەسكە ساتۋ ورتالىعىنىڭ +7 7172 591 150 جانە +7 7172 591 183 بايلانىس تەلەفوندارىنا حابارلاسۋعا بولادى.
ءمادينا جاقىپ
