العاش رەت ەلوردا تورىندە كەڭەس دۇيسەكەەۆتىڭ «استانا – باقىت ورداسى» اتتى اۆتورلىق كەشى ءوتتى. استانانىڭ 15 جىلدىعىنا ارنالعان كەشتە كومپوزيتور شىعارمالارىن ەلىمىزگە تانىمال ەسترادا جۇلدىزدارى ورىندادى.
بۇل – ونەرسۇيەر قاۋىم اسىعا كۇتكەن كەش. كومپوزيتور قايسىبىرەۋلەر سەكىلدى جىل سايىن شىعارماشىلىق ەسەپ بەرە بەرمەيدى, سوندىقتان بولار, جينالعان كوپشىلىك اۆتوردىڭ ۇزدىك اندەرىن ۇيىپ تىڭدادى.
شىعارماشىلىق كەشتى ەربولات احمەدياروۆ جەتەكشىلىك ەتەتىن وركەستر كەڭەس دۇيسەكەەۆتىڭ «استانا» سيمفونياسىمەن اشتى. «تاۋداي بيىك ازاماتى بولساڭ دا, ايتپا, بالام, بيىكپىن دەپ حالقىڭنان…». اكەنىڭ بالاعا ايتقان وسيەتى مەن سىرى ءوز تىڭدارمانىن تاپقالى قاشان. اۆتوردىڭ 80-جىلدارى ۇلىنا ارناپ جازعان «ويلان, بالام» ءانىن ەرىك جولجاقسىنوۆ تىڭدارمانعا جۇرەكپەن جەتكىزە ءبىلدى.
جالپى, كومپوزيتوردىڭ ماڭدايىنا تەك باس قالادا تۇرۋ جازىلعانداي. قازاقستاننىڭ العاشقى استاناسى قىزىلوردادا دۇنيەگە كەلىپ, سىر ءوڭىرىنىڭ باي فولكلورىنان سۋسىنداعان اعامىز بالالىق شاقتا الماتىعا قونىس اۋداردى. وسىندا ءبىلىم الىپ, مۋزىكاعا بەت بۇرىپ, اسىل جارىن جولىقتىردى. ازامات بولىپ قالىپتاسۋى الاتاۋدىڭ بوكتەرىندە وتكەن ونىڭ تالاي تانىمال اندەردى دۇنيەگە اكەلدى. ايتۋلى كەشتە «سالەم ساعان, تۋعان ەل!», «الماتىم», «تۋعان جەر», «التىن بەسiك – استانا» سەكىلدى پاتريوتتىق اندەرىن حالىق ىقىلاسپەن تىڭدادى.
ك.دۇيسەكەەۆ استاناعا قونىس اۋدارعالى شىعارماشىلىعىندا تىڭ سەرپىلىس بولعانىن ايتادى. وسى كەشتە ءبىراز جاڭا اندەرىنىڭ تۇساۋى كەسىلدى. «قايدا ءجۇردiڭ», «ەركەلەدiڭ سەن», «وكىنبە سەن», «اسىل انا», «عاشىقتار جىرى», «العاشقى ماحاببات», «قاراعىم-اي» سىندى حالىقتىڭ كوڭىلىنەن شىققان اندەرى شىرقالدى.
سيمفونيا, سوناتا, كانتاتا, رومانس, ميۋزيكل, حور كاپەللاسىنا ارنالعان شىعارمالاردىڭ 200-دەن اسا اندەردىڭ اۆتورى كەڭەس دۇيسەكەەۆ ەلوردامىزدىڭ 15 جىلدىق مەرەيتويىمەن تۇسپا-تۇس كەلگەن كەشىندە «الاشتىڭ ايبىنىنا اينالعان استاناعا قونىس اۋدارعانىما ەكى جىل بولدى. قازىر قازاق ۇلتتىق ونەر ۋنيۆەرسيتەتىندە وقىتۋشىمىن. شاكىرتتەر تاربيەلەپ جاتىرمىن. باس قالانىڭ مەرەكەسىنە وراي وتكىزىلگەن كەشتى ۇيىمداستىرۋعا مۇرىندىق بولعان استانا قالاسىنىڭ اكىمدىگىنە, مادەنيەت سالاسىنىڭ باسشىلارىنا ۇلكەن العىس ايتامىن» دەگەن تىلەگىن ايتتى.
گۇلميرا ايماعانبەت
