ورازا قابىل بولسىن!
ەرجان قاجى مالعاجىۇلى, قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي
مەيىرىمدى, راقىمدى اللانىڭ اتىمەن باستايمىن!
بارشامىزدى قاسيەتتى رامازان ايىنا امان-ەسەن جەتكىزگەن اللا تاعالاعا سانسىز شۇكىرشىلىك ايتامىز.
قۇرمەتتى مۇسىلمان باۋىرلار!
يمان بۇلاعىنان سۋسىنداي باستاعان حالقىمىز مۇباراك رامازاندا اللانىڭ راقىمىنا بولەنۋدى ءۇمىت ەتىپ, ساۋابى مول ىزگى امالداردى اتقارۋعا نيەتتەنىپ وتىر. سىزدەردى ءبىر اي بويى جالعاساتىن مۇسىلمانداردىڭ ۇلىق مەرەكەسى – رامازاننىڭ كەلۋىمەن قۇتتىقتايمىن!
اللا تاعالا ءوز مەيىرىمى ءارى كەڭشىلىگىمەن بەلگىلى كۇننىڭ, ءتۇن مەن ايدىڭ قادىرى مەن قاسيەتىن ءھام ارتىقشىلىعىن ارتتىرىپ قويدى. قاسيەتتى قۇراندا ايتىلعان رامازان ايىنىڭ ەرەكشەلىگى سول, بۇل مەزگىلدە جاسالعان كەز كەلگەن يگى ءىستىڭ, جاراتۋشىعا جاقىنداتاتىن جاقسى امالدىڭ ساۋابىن ساناۋ ءمۇمكىن ەمەس.
ورازا – اللا مەن ادامنىڭ اراسىنداعى رياسىز قۇلشىلىق, تەك راببىمىزدىڭ رازىلىعىن كوزدەيتىن ۇلىق عيبادات. ورازانىڭ تەڭدەسسىز ساۋابىن جاراتۋشى يەمىزدىڭ جاسىرىپ قويۋىندا ۇلكەن سىر بار. كوزبەن كورىپ, قولمەن ۇستاپ, تۇيسىكپەن ءتۇسىنىپ المايىنشا, كوپ نارسەگە سەنە بەرمەيتىن ادام بالاسىنىڭ ساناسىنا سالماق بولاتىن ساۋاپتى جاسىرۋدا ءبىز بىلە بەرمەيتىن دانالىق كوپ. بۇل – ۇلىق عيباداتتى كىرشىكسىز ورىنداپ, ۇلى ماقساتقا ۇمتىلۋعا جەتەلەيدى. حاديس-شارىپتە اللا تاعالا: «اۋزى بەرىك ادام ءىشىپ-جەۋىن مەن ءۇشىن دوعاردى. ورازا – مەنى مەن قۇلىمنىڭ اراسىنداعى عيبادات. وعان بەرىلەتىن سىيدى مەن عانا ولشەپ, مەن عانا بەرەمىن. اۋزى بەرىك قۇلىمنىڭ اشتىق پەن ءشولىركەگەننەن شىققان اۋزىنىڭ ءيسى مەن ءۇشىن ميسكتەن دە ارتىق» دەيدى. اللانىڭ ۋادەسى – حاق.
رامازان – رۋحاني جاڭارۋ ايى. جەردى مەكەن ەتكەن اڭ مەن قۇستىڭ, بارلىق تىرشىلىك يەسىنىڭ جىل مەزگىلدەرىندە جاڭارۋ, تۇلەۋ, وزگەرۋ ۇدەرىسىنەن وتەتىنى بەلگىلى. ال اللانىڭ ادام بالاسىنا بەرگەن شەكسىز نىعمەتى, تەڭدەسسىز سىيى سانالعان ورازا – تىكەندى جەرگە تابان تيگىزبەي, ساقتانىپ جۇرەتىنىمىز سەكىلدى, كۇناعا بەتپە-بەت كەلۋدەن ساقتايتىن, جان-دۇنيەمىزدى, مىنەز-قۇلقىمىزدى جاقسىلىققا تاربيەلەيتىن, رۋحاني تۇلەپ شىعاتىن قۇلشىلىق. اۋىز بەكىتۋدىڭ ادام ءومىرىن ىزگىلىككە باستايتىنىن بىلگەن پەندە ودان باس تارتۋى مۇمكىن ەمەس.
ورازا – سابىر مەكتەبى. ەلىمىز ەگەمەندىگىن الىپ, ەڭسەسىن تىكتەپ, رۋحاني قۇندىلىقتارىمەن قايتا قاۋىشقان سوناۋ 1991 جىلدارى رامازان ايى كۇننىڭ قىسقارعان, ءتۇننىڭ ۇزارعان, ياعني, ورازا ۇستاۋعا قولايلى قىس مەزگىلىنە تۇسپا-تۇس كەلدى. راسىندا دا, بۇل ەندى عانا يمانعا دەن قويعان حالقىمىزدىڭ دەڭگەيىنە ءدوپ كەلگەن مەزگىل ەدى. ەندى, مىنە, اللاعا شۇكىر, كەشەگى كەڭەس كەزىندە ۇزىلە جازداعان رۋحاني ءجىبىمىزدى «ءبىرىنشى تىلەك تىلەڭىز, ءبىر اللاعا جازباسقا» دەپ جىرلاعان باتاگوي بابالارىمىزدىڭ التىن ارقاۋىن جالعاۋعا مۇمكىندىك تۋدى. جۇرتىمىز يسلام قۇندىلىقتارىمەن قايتا قاۋىشىپ, رۋحاني قازىعىن قايتا اينالىپ تاپتى. جۇرەككە بەكىگەن سەنىمگە سەلكەۋ تۇسپەيدى. اسپان جەرگە اينالىپ تۇسەتىن ءشىلىڭگىر شىلدەگە تۇسپا-تۇس كەلگەن رامازاندا ورازا ۇستاۋعا كۇننىڭ اپتابى نەمەسە باسقا دا سەبەپتەر اسەر ەتپەيدى دەپ سەنەمىز. سەبەبى, يماننىڭ بال ءدامىن تاتقان جان اللانىڭ تەڭدەسسىز سىيىنان شەت قالعىسى كەلمەيتىنى حاق.
يمان جولى سابىرلىق پەن تاقۋالىقتى تالاپ ەتەدى. ورازا ناعىز, شىنايى تاقۋالىققا جەتەلەيدى. قۇراندا اللا تاعالا: «ەي, يمان كەلتىرگەندەر! كۇنالاردان ساقتانىپ, تاقۋالىققا جەتۋلەرىڭ ءۇشىن سەندەرگە بۇرىنعىلارعا پارىز ەتىلگەندەي ورازا پارىز ەتىلدى» («باقارا» سۇرەسى, 183-ايات) دەيدى.
قىمباتتى وتانداستار!
قاسيەتتى رامازان ايى قۇتتى بولسىن! ۇستاعان ورازالارىڭىز, دۇعا-تىلەكتەرىڭىز قابىل بولعاي! رامازان ايىندا جاساعان يگى ىستەرىڭىز ساۋاپتان جازىلىپ, اللا تاعالا ەلىمىزگە, جەرىمىزگە بەرەكە جاۋدىرعاي!