قر پارلامەنتى پالاتالارىنىڭ بىرلەسكەن وتىرىسىندا بەسىنشى سايلانعان پارلامەنتتىڭ ءتورتىنشى سەسسياسى 2 قىركۇيەك كۇنى رەسمي تۇردە اشىلدى. پارلامەنت سەسسياسىن مەملەكەت باسشىسى نۇرسۇلتان نازارباەۆ اشتى.
وتىرىسقا سەناتتىڭ 47 دەپۋتاتى, ءماجىلىستىڭ 107 دەپۋتاتى, قر ۇكىمەت مۇشەلەرى, جوعارعى سوت, كونستيتۋتسيالىق كەڭەس, ورتالىق سايلاۋ كوميسسياسى توراعالارى, قر پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ, ۇلتتىق باسقارۋشى كومپانيالاردىڭ باسشىلارى قاتىستى. ەلباسى ءتورتىنشى سەسسيادا بىرقاتار جاڭا دەپۋتاتتاردىڭ قازاقستان حالقى الدىندا بەرگەن انتىن قابىلدادى.
پرەزيدەنت ءتورتىنشى سەسسيا كەزىندە قاراستىرىلۋى قاجەت باسىمدىققا يە زاڭ جوبالارىن اتادى. ولاردىڭ قاتارىندا جەر قويناۋىن پايدالانۋ ماسەلەلەرى, اۋىل شارۋاشىلىق كەشەنىندە ونىمدىلىكتى ارتتىرۋ ءۇشىن سالىق زاڭناماسىنا وزگەرىستەر جيىنتىعىن ەنگىزۋ, اۆتونومدى ءبىلىم بەرۋ مەكەمەلەرىندە اكادەميالىق باسقارۋ جۇيەسىن جەتىلدىرۋ, حالىقتىڭ كوشى-قونى جونىندەگى زاڭ جوبالارى بار.
سونداي-اق, ەلباسى قازاقستاننىڭ دامىعان 30 ەلدىڭ قاتارىنا قوسىلۋىنا بايلانىستى مىندەتتەردى ىسكە اسىرۋ اياسىندا وزىق الەمدىك تاجىريبەنى ەسكەرە وتىرىپ, قۇرىلىمدىق رەفورمالار بويىنشا جۇمىستى جالعاستىرۋ قاجەتتىگىن ايتتى.
