كوميسسيا قۇرامى بەكىتىلدى
قالالىق ءماسليحاتتىڭ كەزەكتەن تىس ەلۋىنشى سەسسياسىنىڭ جۇمىسىنا دەپۋتاتتارمەن بىرگە اۋداندىق سايلاۋ كوميسسيالارىنىڭ وكىلدەرى قاتىستى.
كۇن تارتىبىندە ەكى ماسەلە قارالدى. ونىڭ العاشقىسى – ۋچاسكەلىك سايلاۋ كوميسسياسىنىڭ مۇشەلەرىن سايلاۋ. وسىعان وراي, استانا قالاسى ءماسليحاتىنىڭ اپپارات باسشىسى ۆەرا پىتەۆا بايانداما جاسادى. ول «قازاقستان رەسپۋبليكاسىنداعى سايلاۋ تۋرالى» زاڭعا سايكەس, سايلاۋ ۋچاسكەلەرىن قۇرۋ – قالا اكىمىنىڭ, ال سايلاۋ كوميسسيالارىن قۇرۋ قالالىق ءماسليحاتتىڭ وكىلەتتىلىگىندە ەكەندىگىن ەسكەرە كەلە, استانا اكىمىنىڭ شەشىمىمەن ەلوردادا جاڭا, №255 سايلاۋ ۋچاسكەسىنىڭ قۇرىلۋىنا بايلانىستى جاڭا ۋچاسكەلىك كوميسسيانى قۇرۋدىڭ قاجەتتىلىگى تۋىنداعانىن اتاپ ءوتتى. بۇل رەتتە قولدانىستاعى زاڭعا سايكەس, وسى سايلاۋ كوميسسياسىنىڭ قۇرامى تۋرالى ساياسي پارتيالار مەن قوعامدىق بىرلەستىكتەردەن جەتى ۇسىنىس كەلىپ تۇسكەن. ۋچاسكەلىك سايلاۋ كوميسسياسىنىڭ مۇشەلەرى وسىنشا ادامنان قۇرالۋى كەرەكتىگىن ەسكەرە وتىرىپ, كوميسسياعا جەتى ۇمىتكەر ۇسىنىلدى. دەپۋتاتتار بارلىق ءۇمىتكەرلەردىڭ ءتىزىمىن ءبىراۋىزدان قولدادى.
ودان ءارى ۆ.پىتەۆا ەكىنشى ماسەلەگە وراي استانا قالاسى ءماسليحاتىنىڭ سايلاۋ كوميسسياسىن قۇرۋ ماسەلەلەرى جونىندەگى كەيبىر شەشىمدەرگە وزگەرىستەر ەنگىزۋ تۋرالى ۇسىنىس ءبىلدىردى. بۇل رەتتە ول استاناداعى 32 سايلاۋ كوميسسياسىنان ءارتۇرلى سەبەپتەرگە بايلانىستى مىندەتتەرىنەن بوساتۋ تۋرالى ءوتىنىش كەلىپ تۇسكەنىن جەتكىزدى. حالىق قالاۋلىلارى تالقىلانعان ماسەلەلەر ماقۇلداندى.
گۇلبارشىن وكەشقىزى