سارىارقا اۋدانىنىڭ اكىمدىگى اۋداندىق ارداگەرلەر كەڭەسىمەن بىرىگىپ, ۇلى وتان سوعىسى مايدانگەرلەرى مەن تىل ەڭبەككەرلەرىنە تاماشا كەش سىيلادى. قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجاەۆانىڭ باستاماسىمەن وقۋ ورنى ورداسىندا وتكەن شارا بارىسىندا قارتتار كونتسەرت تاماشالاپ, ءبىر سەيىلىپ قالدى.
ۇلى جەڭىستىڭ 70 جىلدىعىنا ارنالعان كونتسەرتتە قاريالاردى قۋانتقان تاعى ءبىر ءراسىم جۇرگىزىلدى. اۋدان اكىمىنىڭ ورىنباسارى ساۋلە نۇرعوجينا مەن اۋداندىق ارداگەرلەر كەڭەسىنىڭ توراعاسى ەبەنعابباس احمەتوۆ ءسوز سويلەپ, تىل ەڭبەككەرلەرىنە مەرەيتويلىق مەدال تاپسىردى.
ءتۇرلى حالىقارالىق بايقاۋلاردىڭ لاۋرەاتتارى اتانعان ۋنيۆەرسيتەت ستۋدەنتتەرى قاريالاردى مۋزىكا الەمىنە جەتەلەدى. ودان كەيىن قارتتار داستارقان باسىنا جينالىپ, وتكەن-كەتكەندى ەسكە الىستى. كوپتەن بەرى ءبىرىن-ءبىرى كورمەگەن, بۇرىننان تانىس جاندار قاۋقىلداسىپ قالدى. ول جەردە ولاردىڭ كوڭىلىن استانا قالاسى مەملەكەتتىك اكادەميالىق فيلارمونياسىنىڭ ارتىستەرى كوتەردى.
كول-كوسىر قۇرمەتكە يە بولعان ۇلى وتان سوعىسى مايدانگەرلەرى مەن تىل ەڭبەككەرلەرى, ارداگەرلەر قاۋىمىنىڭ بەلسەندىلەرى اتىنان مويسەي گولدبەرگ پەن روزا اسىلبەكوۆا ءسوز سويلەپ, وسىناۋ كەش ءۇشىن ۇيىمداستىرۋشىلارعا العىستارىن جەتكىزدى.
امانعالي شميتۇلى
