ماڭىزدى جوبالار ماقۇلداندى
استانا قالاسىنىڭ اكىمدىگىندە «بيزنەستىڭ جول كارتاسى-2020» باعدارلاماسى شەڭبەرىندە قاراستىرىلعان جوبالاردى ۇيلەستىرۋ كەڭەسىنىڭ مۇشەلەرى جان-جاقتى ساراپتان وتكىزدى.
ەلوردا اۋماعى ۇلكەيگەن سايىن قوعامدىق كولىك قىزمەتىنە سۇرانىس ارتىپ كەلەدى. بۇرىنعى ەسكى اۆتوبۋستارىن جاڭاعا اۋىستىرعان «№2 اۆتوبۋس پاركى» جشس تەحنيكالىق قاۋىپسىزدىك ماسەلەسىن ساقتاۋعا باسا ءمان بەرىپ وتىر. سوندىقتان حالىق مۇقتاجىن وتەۋگە باعىتتالعان جوباسى ءبىراۋىزدان قولداۋ تاپتى. ال «اجەگ-استانا» سەرىكتەستىگى وندىرىسكە قاتىستى زاتتاردى تاسىمالداماق. بىراق, ولاردىڭ «كاماز» جۇك كولىگى رەسەيدىكى ەكەن. نەگىزى, بۇل اۆتوماشينا ءبىزدىڭ ەلدە دە شىعارىلادى. ۇيلەستىرۋ كەڭەسى وسى جاعىن ەسكەرتىپ, جوبانى قارجىلاندىرۋعا كەلىسىم بەردى.
«مير كرۋپ» سەرىكتەستىگى الداعى مەرزىمدە يندۋستريالدى پارك اۋماعىنان ماكارون ونىمدەرىن ازىرلەپ شىعارماقشى. بۇل ءوز كەزەگىندە سىرتتان تاسىمالداناتىن زاتتارعا بەلگىلى ءمولشەردە توسقاۋىل قوياتىنى داۋ-سىز. سونىمەن بىرگە ەلوردادا جاقىن ارادا پلاستيكالىق تەرەزەلەر جۇرتشىلىق قولىنا تيەتىن بولادى.
باردى ۇقساتا ءبىلىپ, ونى وتكىزۋ بۇگىنگى نارىقتىڭ باستى تالابى. سوندىقتان, ۇيلەستىرۋ كەڭەسىندە قارالعان قاعاز ءونىمىن دايىنداۋ جوباسى تالاپتان تابىلا الماۋى سەبەپتى, قايتا پىسىقتاۋعا جىبەرىلدى.
ءامىرحان الماعانبەتوۆ