مارينا ۆولنوۆا, بوكستان لوندون وليمپياداسىنىڭ قولا جۇلدەگەرى: ارمانىم – وليمپيادا التىنى
– مارينا, لوندون ءدۇبىرىنىڭ اياقتالعانىنا دا ءبىراز بولدى. ءوزىڭدى وليمپيادا جۇلدەگەرى رەتىندە سەزىنۋ باقىت شىعار؟
ورال, قالا تۇرعىنى
– ارينە, قۋانىشىمدا شەك جوق. وليمپيادادان العان اسەرىمدى سوزبەن ايتىپ جەتكىزە المايمىن. ءجۇلدەلى ورىنعا ىلىككەنىمدە ەڭ الدىمەن ماعان سەنىم ارتقان جانكۇيەرلەرىمدى جەرگە قاراتپاعانىما قۋاندىم. ءاربىر جانكۇيەردىڭ قولداۋىن وليمپيادا تورىندە سەزىندىم. بۇل جەڭىسىمە جەتەلەگەن دە – وسى جانكۇيەرلەردىڭ ىزگى نيەتى. جەكپە-جەك تۋرالى ايتاتىن بولسام, قولاعا قول جەتكىزۋدىڭ ءوزى وڭاي سوقپادى. قارسىلاستارىمنىڭ بارلىعى مىقتى بولدى.
– قازان-وشاققا قىرىڭىز بار ما؟
جايدارمان نۇركەنوۆا, ستۋدەنت
– ءۇي شارۋاسىنا ەبىم بار دەپ ايتا الامىن. بارلىق قىزدار سەكىلدى اس ازىرلەپ, ءۇي جيناۋ مەنىڭ دە قولىمنان كەلەدى. قىز بالا بولعاندىقتان, ءبىز دە ادەمىلىككە قۇشتارمىز, جانىمىز نازىك. بىراق, شارشى الاڭدا ەرەكشە وجەتتىك كەرەك. ال, نەگىزىنەن, وزگە قىزداردان ەش ەرەكشەلىگىم جوق.
– وليمپيادا جۇلدەگەرلەرىنە كەلەسى وليمپياداعا قاتىساسىز با دەگەن ساۋالدار ءجيى قويىلۋدا. ءبىرى بارمايتىنىن ايتسا, ەكىنشىسى برازيليادان التىن اكەلەمىن دەپ ۋادە بەردى. ءوزىڭىز كەلەسى وليمپيادا تۋرالى ويلانىپ كوردىڭىز بە؟
دانيار, دەنە تاربيەسى ءپانىنىڭ مۇعالىمى
– برازيلياداعى وليمپيادادا ءۇزدىك ناتيجەگە قول جەتكىزۋ – مەنىڭ ارمانىم جانە سوعان ۇمتىلامىن. وسى ارمانىمدى جۇزەگە اسىرۋعا قازىردەن باستاپ كىرىسىپ كەتتىم. ءويتكەنى, الەم ارەناسىندا قازاقستاننىڭ ابىرويىن اسقاقتاتۋدى باستى مىندەتىم دەپ بىلەمىن.
– بىلايعى ومىردە بوكستاعى شەبەرلىگىڭىزدى قولدانىپ كوردىڭىز بە؟
ديدار, كۇزەتشى
– جوق, قولدانىپ كورمەپپىن.
– مارينا, قارىنداسىم, جەڭىسىڭ قۇتتى بولسىن! ءوزىڭ سپورتقا قالاي كەلدىڭ؟
نۇرجان, قالا تۇرعىنى
– بوكستان بۇرىن مەن دزيۋدومەن اينالىسقام. الايدا, اۋىر جاراقات الىپ, بوزكىلەمگە شىعا الماي قالدىم. سودان بوكسپەن اينالىسىپ كورمەكشى بولدىم. نەگىزىنەن, بوكس ۇيىرمەسىنە جاي قىزىعۋشىلىقپەن, ءوز-ءوزىمدى قورعاۋ ءۇشىن قاتىسقانمىن. كەيىن جارىستاردان قۇر قايتپاي, جۇلدەلى ورالاتىن بولدىم. وسىلاي بوكسقا دەگەن شىن قىزىعۋشىلىعىم وياندى. دزيۋدوعا قاتىسىپ جۇرگەنىمدە ەشكىم قارسىلىق بىلدىرگەن جوق. ءبىراق بوكسپەن اينالىسۋىما انام ءۇزىلدى-كەسىلدى قارسى شىقتى. وتباسىمىزدا مەنەن وزگە ەكى اعام بار. اكەم مەن باۋىرلارىم مەنى قۋانا قۇپتادى. انامنىڭ قارسىلىعىنا قاراماستان, جاتتىعۋىمدى جالعاستىرا بەردىم. دەگەنمەن, كەيىننەن جارىستاردان ولجالى ورالا باستاعانىمدا انام دا كەلىسىمىن بەردى. قازىر انام – مەنىڭ ەڭ جاقىن جانكۇيەرىم.
– سپورتتان باسقا جانىڭىزعا نە جاقىن؟
ديانا يبراەۆا, جاس مامان
– سپورت مەنىڭ ءومىرىمنىڭ نەگىزگى بولىگىن قۇرايدى. سپورتتان قول بوساعان كەزدەرى كىتاپ وقيمىن. ولەڭ ايتقاندى جاقسى كورەمىن. سوسىن دوستارىممەن كەزدەسىپ, كوڭىل كوتەرەمىن.
– قازاق جىگىتىنە تۇرمىسقا شىعار ما ەدىڭىز؟
سانجار اسىلجانوۆ, بانك قىزمەتكەرى
– ارينە. ەڭ باستىسى, سول ادامنىڭ ساعان دەگەن كىرشىكسىز كوڭىلى, سانالى سەزىمى بولسا, بولدى.
– قولا مەدال يەگەرى اتانعاندا ءسىزدى ەڭ ءبىرىنشى كىم قۇتتىقتادى؟
ەراسىل جۇماشكە, وقۋشى
– باپكەرىم, ودان كەيىن اتا-انام. سودان كەيىن قۇتتىقتاۋلار تولاسسىز جاۋىپ جاتتى.
– تۇراقتى جۇمىسىڭىز بار ما؟
ايزات, ەسەپشى
– استانا قالاسىندا ىشكى ىستەر دەپارتامەنتىندە پولك ينسپەكتورى بولىپ قىزمەت ەتەمىن.