«شابىتتىڭ» شىڭى
استانا اسپانىندا ءان بولىپ قالىقتاپ, ەسىلدىڭ جاعاسىندا بي بولىپ بۇرالىپ, ەلوردا تورىندە كۇي كۇمبىرلەتكەن «شابىت» شىعارماشىل جاستار فەستيۆالى بۇرناعى كۇنى مارەسىنە جەتتى. ون بەسىنشى مارتە ۇيىمداستىرىلعان بيىلعى بايراقتى باسەكەدە ەڭ باستى جۇلدە – قازاقستان پرەزيدەنتىنىڭ كۋبوگىن تسيرك ونەرىنىڭ شەبەرى مۇحتار وسەلباەۆ قانجىعالادى. وعان استانا قالاسىنىڭ اكىمى يمانعالي تاسماعامبەتوۆتىڭ ىقىلاس گۇلى سالتاناتتى جاعدايدا تاپسىرىلدى.
«شابىتقا» ون ءبىر ەلدەن قاتىسقان 500-گە تارتا ۇمىتكەر «كلاسسيكالىق مۋزىكا», «جۋرناليستيكا», «بەينەلەۋ ونەرى», «حالىق مۋزىكاسى», «تسيرك ونەرى», «بالەتتىڭ جاس ءارتىستەرى بايقاۋى» جانە «ءۇزدىك ادەبي شىعارما» اتالىمدارى بويىنشا باقتارىن سىنادى. قاتىسۋشىلاردىڭ قارىمىن ون مەملەكەتتەن شاقىرىلعان ونەر مايتالماندارى ساراپقا سالۋعا اتسالىستى. ونەر ورەندەرىنىڭ كەۋدەسىنە ءۇمىت وتىن تۇتاندىرىپ, شىعارماشىلىعىنا سەرپىلىس بەرگەن حالىقارالىق دودا وسىعان دەيىنگى تاريحىندا 14 مىڭعا تارتا شىعارماشىل جاستىڭ جىگەرىن جانىپ, جارقىن تالانتتارىن تانىتۋلارىنا مۇمكىندىك بەرگەن ەكەن. باس شاھاردا مادەنيەت پەن ونەر زيالىلارىنىڭ شوعىرىن قالىپتاستىردى.
فەستيۆالدىڭ سوڭعى كۇنىندە «شابىتتىڭ» شىڭىن باعىندىرعان جەڭىمپازدار ماراپاتتالدى. قىلقالام يەلەرىنىڭ اراسىندا توعجان تابىسبەك توپ جاردى. توعجاننىڭ قيالىنان تۋعان «كوشپەندىلەر» توپتاماسى كورەرمەن تاراپىنان دا زور قوشەمەتكە يە بولدى. ال تسيرك ونەرىنىڭ جاس مايتالمانى مۇحتار وسەلباەۆ بايقاۋدىڭ باس جۇلدەسىمەن قاتار, پرەزيدەنتتىك كۋبوكتىڭ يەگەرى اتاندى. ايگەرىم بەكەتاەۆانىڭ ەسىمى شوقتىعى بيىك جاس بالەت ءارتىسى رەتىندە ماراپاتتالسا, داريا كيسەلەۆا فورتەپيانو جانرى بويىنشا گران-پريگە يە بولدى. ۆوكالدان ازات مالىك باس جۇلدەنى الدى, سكريپكا اتالىمىنىڭ بيىگى احان مەيىربەكوۆكە بۇيىردى. الەكساندرا رامازانوۆا كلاسسيكالىق مۋزىكا جانرى بويىنشا ۇزدىك دەپ تانىلدى. ادەبيەت اتالىمىندا بالتابەك نۇرعاليەۆتىڭ باعى جاندى. ال ارىپتەستەرىمىزدىڭ اراسىنان راحات جاقسىبايدىڭ شىعارماسى وزىق شىقتى.
سالتاناتتى باسقوسۋدا كورەرمەن جۇلدەگەرلەردىڭ ونەرىن تاماشالادى.
اسحات رايقۇل