اككوردتار ۇنىمەن اتىراپتاعىلاردىڭ نازارىن استاناعا اۋدارعان «Astana Piano Passion» فەستيۆال-بايقاۋىنىڭ شىمىلدىعى جابىلدى. 16 مامىر كۇنى «قازاقستان» ورتالىق كونتسەرت زالىندا ءۇش مىڭعا جۋىق كورەرمەننىڭ قاتىسۋىمەن شارانىڭ سوڭعى گالا-كونتسەرتى ءوتتى. ونەرىمەن بايگەگە تۇسكەن جاس جەتكىنشەكتەردىڭ جەتكەن جەتىستىكتەرى جايلى قورىتىندى دا وسى كەش بارىسىندا ايتىلدى.
ەسكە سالا كەتەتىن جايت, الەمنىڭ 12 مەملەكەتىنەن كەلگەن 18 جاسقا دەيىنگى بالعىن پيانيستەر ءبىر اپتا بويى ءۇش توپقا ءبولىنىپ, باق سىناسقان. اۋەلگىدە ءبىرنەشە مارتە ىرىكتەۋ سىندارىنان وتكەننەن كەيىن ءدۇيىم جۇرت الدىندا جەكە ونەر كورسەتىپ, ءبىر قادامىن ارتقا تاستاعان ەدى. ەكىنشى سىناق كەزىندە ولار وركەستردىڭ سۇيەمەلدەۋىمەن ءتۇرلى تۋىندىلاردى وينادى.
ناتيجەسىندە, كىشى توپ بويىنشا رومان بوريسوۆ (رەسەي), نيكولاي ۆارلاموۆ (رەسەي), ۆلاديمير يۆانوۆ (رەسەي) جانە ەڭ جاس, سۇيكىمدى سايىسكەر قازاقستاندىق ءسانجارالى كوپباەۆ ەكىنشى ورىندى يەلەندى. ولارعا ءادىل قازىلار القاسى اتىنان دەنيس ماتسۋەۆ پەن ريو-دە-جانەيرو مۋزىكا اكادەمياسىنىڭ پروفەسسورى, Dell-Arte مادەني قورىنىڭ پرەزيدەنتى, برازيليادان كەلگەن قوناق ميريان داۋەلسبەرگ ماراپات بەلگىسى مەن سىيلىقتارىن تابىستادى. اتاپ ايتار بولساق, جەڭىمپازدارعا ديپلوم, اقشالى كونۆەرت, «بايتەرەك» كادەسىيى مەن استانا قالاسى اكىمى اتىنان ارنايى سىيلىق ۇسىنىلدى.
ورتا توپ بويىنشا اتى وزعانداردى ماراپاتتاۋ ءۇشىن بايقاۋدىڭ كوركەمدىك جەتەكشىسى دەنيس ماتسۋەۆ ورتاعا «استانا وپەرا» وپەرا جانە بالەت تەاترىنىڭ ديرەكتورى, مەملەكەتتىك سىيلىقتىڭ يەگەرى, كومپوزيتور تولەگەن مۇحامەدجانوۆتى شاقىرعان. بۇل جاستاعىلار بويىنشا ءۇشىنشى ورىن –ۋكراينالىق سايىسكەر ولەكسەي كانكەگە, ەكىنشى ورىن – سولتۇستىك كورەيادان كەلگەن يۋ پەل ميگە, ءبىرىنشى ورىن رەسەيلىك الەكساندر مالوفەەۆ پەن جاپون يۋكينە كۋروكيعا بۇيىردى.
ال, ۇلكەن توپتىڭ جەڭىمپازدارىن يرلانديا پاتشا مۋزىكا اكادەمياسىنىڭ, Shenandoah كونسەرۆاتورياسى مەن Showa مۋزىكالىق اكادەمياسىنىڭ پروفەسسورى دجون و-كوننور مەن رەسەيدىڭ ەڭبەك سىڭىرگەن ءارتىسى, پ.ي.چايكوۆسكي اتىنداعى ماسكەۋ مەملەكەتتىك كونسەرۆاتورياسىنىڭ پروفەسسورى ۆالەري پياسەتسكي ماراپاتتادى. ەرەسەكتەر اراسىنداعى ءۇشىنشى ورىندى – كورەيالىق سە يۋن چون مەن جاپونيالىق يۋ ناكامۋرا, ەكىنشى ورىندى – دانيالىق گۋستاۆ كروگ حانسەن پەكۋت پەن رەسەيلىك يليا باحتين, ال ءبىرىنشى ورىندى رەسەيلىك الەكساندر كۋتۋزوۆ يەلەندى.
يتاليالىق دجورجيو بوتولي تريونە مەن رەسەيلىك نيكولاي كۋزنەتسوۆ ارنايى ديپلوممەن ماراپاتتالدى.
استانانىڭ ون بەس جىلدىق مەرەيتويى قارساڭىندا جانە العاش رەت ۇيىمداستىرىلعان بۇل بايقاۋدىڭ ءوتۋ دارەجەسى جوعارى بولعانىنا ءشۇبا جوق. بايقاۋ-فەستيۆالدىڭ تاعى ءبىر ارتىقشىلىعى, ww.astana-app.kz سايتى ارقىلى تىكەلەي ەفيردە كورسەتىلىپ وتىرعان شارانىڭ بارىنشا اشىق جانە ءادىل وتكەندىگى. 10-16 مامىر ارالىعىندا بايقاۋدى الەمنىڭ ءار شالعايىنداعى 15 مىڭ كورەرمەن تىكەلەي جەلى ارقىلى تاماشالادى. ال ودان بولەك جالپى سايتقا كىرىپ, جەر ءجۇزىنىڭ ءار نۇكتەسىنەن 50 مىڭنان استام ادام بايقاۋ بارىسىن قىزىقتاپتى. وسىناۋ مادەني مەرەكەنىڭ اۋىز تولتىرىپ ايتارلىقتاي بيىك دەڭگەيىنە, وعان استانا اكىمدىگى بارىنشا قولداۋ كورسەتىپ, شەبەر ۇيىمداستىرۋشىلىق تانىتا ءبىلگەنىنە ريزاشىلىعىن بىلدىرگەن دەنيس ماتسۋەۆ سول كەشتىڭ تاعى ءبىر قاھارماندارىن ۇمىت قالدىرمادى. ولار – پەداگوگتار. سايىسقا كەلىپ, پيانينو تارتىپ, مۋزىكا ونەرىنىڭ ءتۇرلى مەكتەپتەرىن پاش ەتكەن بالالاردىڭ ۇستازدارى. قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى, قر حالىق ءارتىسى, مەملەكەتتىك سىيلىقتىڭ لاۋرەاتى ءجانيا اۋباكىروۆانى ورتاعا شاقىرعان دەنيس ماتسۋەۆ بايقاۋدىڭ ۇيىمداستىرۋشىلارى مەن قازىلار اتىنان ونەرپاز جاستاردى جەتەكتەپ اكەلگەن ۇستازدارىنا دا ارنايى سىيلىقتار مەن گۇل شوقتارىن تابىستادى.
كەش مۇنىمەن بىتكەن جوق. ۋادە ەتىلگەندەي, بايقاۋ فيناليستەرىنە كورسەتكەن جەتىستىكتەرىنە وراي جوعارى دارەجەلى حالىقارالىق فەستيۆالدەرگە قاتىسۋعا جولداما ۇسىنىلدى. ال, رەسەيلىك كىشكەنتاي عانا پيانيست نيكولاي ۆارلاموۆقا جەرگىلىكتى حالىق ونەرىنە بويلاپ, قازاق كومپوزيتورلارىنىڭ تۋىندىلارىن ۇزدىك ورىنداعانى ءۇشىن ارنايى سىيلىق بەرىلدى.
كەش سوڭىندا ءمالىم بولعانداي, «اstana Piano Passion» جاس پيانيستەردىڭ ءى حالىقارالىق بايقاۋىنىڭ گران-ءپريى ۇلكەن توپتىڭ جەڭىمپازى الەكساندر كۋتۋزوۆقا بۇيىردى. بۇل ماراپاتتى تابىستاۋ ءۇشىن ساحناعا استانا قالاسىنىڭ اكىمى يمانعالي تاسماعامبەتوۆ كوتەرىلدى.
«ءبىزدىڭ بايقاۋدا ۇتىلعان ەشكىم جوق. ءساتسىزدەر مۇلدەم جوق مۇندا. تەك قانا بىردەن بەرىلە سالاتىن ادامدار بولادى. ومىردە تاباندى ەڭبەكتىڭ بالاماسى جوق. ەڭبەك شەبەرلىككە, ال تاباندىلىق پەن تالانت داڭققا جەتەلەيدى. سوندىقتان, مەن ساحنادا تۇرعان جاس دوستارىما – سەندەر ءبارىڭ دە جەڭىمپازسىڭدار دەگىم كەلەدى» دەدى اكىم.
سونىمەن, وسى بايقاۋدىڭ ەڭ قىمبات كادەسى دەنيس ماتسۋەۆتىڭ ءرويالى الەكساندر كۋتۋزوۆقا ۇسىنىلدى.
بۇل كەشتىڭ ءار مينۋت, ءار سەكۋندى كورەرمەندى جالىقتىرعان جوق. جەڭىمپازداردىڭ كونتسەرتتىك باعدارلاماسىن ماتسۋەۆتىڭ ءوزى جۇرگىزدى. شىن ونەر يەسى قانشالىقتى اتاقتى بولسا, سونشالىقتى قاراپايىم, بالاداي پاك, تازا بولاتىنىنا كوز جەتكىزە تۇسكەندەي, ول جانىنا ەڭ جاس سايىسكەرلەر -ۆارۆارا كۋتۋزوۆانى, شۋان ەرن ءليدى جانە ءبىزدىڭ ءسانجارالى كوپباەۆتى وتىرعىزىپ الدى. ءبىر-بىرىنە ىمداپ, سىبىرلاپ وتىرىپ, وسى ءتورت جۇرگىزۋشى باعدارلامانى جاندىرا ءتۇستى.
ءبىر اپتاعا سوزىلعان «اstana Piano Passion» فەستيۆالىنىڭ قىزىعىنا قانباي قالعان جۇرت ىقىلاسىن جاسىرماعان. سوعان وراي حالىقارالىق بايقاۋدىڭ كەلەسى كەزەگى 2014 جىلى وتەتىنى ءمالىم بولدى.
ءنازيرا سايلاۋقىزى
