ەلدى ەستى ۇرپاق قانا گۇلدەندىرەدى.
ەستى ۇرپاق وشاعى ورنىقتى,
ءتۇتىنى ءتۇزۋ, ىنتىماعى مەن
ىرىسى ۇندەسكەن وتباسىندا عانا ءوسىپ جەتىلەتىنى داۋسىز.
ەلباسى نۇرسۇلتان نازارباەۆ:
«وتباسىن نىعايتۋ جانە داستۇرلەردى ساقتاۋ – مەملەكەتتىلىگىمىزدى دامىتۋدىڭ كەپىلى.سوندىقتان دا ءبىز وتباسىنىڭ مەرەيىن بارىنشا ۇستەم ەتە بەرۋىمىز كەرەك» دەگەن ەدى.
پرەزيدەنت جارلىعىمەن جىل سايىنعى قىركۇيەك ايىنىڭ ەكىنشى جەكسەنبىسى وتباسى كۇنى بولىپ بەلگىلەنگەن. وتكەن جىلى بۇل مەرەكە ەلىمىزدە العاش رەت اتاپ ءوتىلدى. سونىمەن قاتار, «مەرەيلى وتباسى» ۇلتتىق بايقاۋىن ۇيىمداستىرۋ قولعا الىندى.
بۇل بايقاۋ قايماعى بۇزىلماعان قالىڭ قازاقتىڭ ىشكى تالابىمەن ۇندەسكەن ءتارىزدى. وتكەن جىلى, العاشقى بايقاۋدىڭ وزىنە ەلىمىزدە 1298 وتباسى سول بايقاۋعا قاتىسىپ, بارىن سالىپ باعىپتى…
وتباسى قۇندىلىعىن ارتتىرۋ, جاس ۇرپاقتى بيىك ازاماتتىق پەن زور ادامگەرشىلىككە باۋلۋ, ەلدەگى وتباسى ينستيتۋتىن نىعايتىپ, بىرلىك پەن تىرلىكتى بەرەكەلەندىرۋ ماقساتىن كوزدەگەن بيلىكتىڭ جاڭا باستاماسىن قۋانا قۇپتاعانى ەدى بۇل, راسىندا.
ىزگى ماقساتتى كوزدەگەن سول يگى باستاما بيىل دا جالعاسىن تاۋىپ وتىر. «مەرەيلى وتباسى» ۇلتتىق بايقاۋىن دايىنداۋ جانە وتكىزۋ جونىندەگى ۇيىمداستىرۋ كوميتەتى وتكەن ايدا 2015 جىلعى شاراعا قاتىسۋشى ۇمىتكەرلەردىڭ قۇجاتتارىن قابىلدادى. تالانتى مەن تابىسىمەن, ونەرى مەن ورەسىمەن وزگەلەرگە ۇلگى بولارمىز-اۋ دەگەن ۇكىلى ۇمىتپەن جەر-جەردە ازاماتتار بايقاۋعا قاتىسۋعا قۇلشىندى.
«وتانعا سۇيىسپەنشىلىك وتباسىنان باستالادى» دەگەن ەكەن فرەنسيس بەكون.
وتىن وشىرمەۋدى, شىراعىن سوندىرمەۋدى مۇرات ەتكەن جاندار باردا قازاق ەلى باقىت مەكەنىنە اينالا بەرەرى ءسوزسىز.
