مەرەكە قارساڭىنداعى مەزىرەت
استانادا تۇڭعىش پرەزيدەنت كۇنىنە وراي الەۋمەتتىك اكتسيا باستالدى. ىزگى نيەتتەن تۋىنداعان شارا اياسىندا ەلوردامىزداعى 1000 وتباسىعا قايىرىمدىلىق كومەك كورسەتىلمەك.
قايىرىمدىلىق كومەك ازىق-تۇلىك جيىنتىعى جانە اقشالاي تولەم تۇرىندە دە ءازىرلەنگەن.
الەۋمەتتىك كومەك رەتىندە بەرىلەتىن ازىق-تۇلىك جيىنتىعى قۇرامىندا – 50 كەلى كارتوپ, 25 كەلى كۇرىش, 5 كەلى قانت جانە 5 ليتر كۇنباعىس مايى بار.
كەشە قالالىق جۇمىسپەن قامتۋ جانە الەۋمەتتىك باعدارلامالار باسقارماسى وكىلدەرى جۇك كولىگىنە تيەلگەن ازىق-ءتۇلىكتى كوپشىلىككە تاراتۋدى باستاپ كەتتى. كومەك كەرۋەنى 1 جەلتوقسانعا دەيىن جالعاسادى.
قايىرىمدىلىق كومەككە العاشقى يە بولعانداردىڭ ءبىرى ءجاميلا ناۋرىزباەۆا «وتباسىمدا بەس بالا بار. ەڭ ۇلكەنىم — ستۋدەنت. كىشكەنتايىم ەكى جاستا. تۇڭعىش پرەزيدەنت كۇنى قۇرمەتىنە دەپ ۇيىمىزگە ازىق-تۇلىك اكەلىپ بەردى. ءبىزدىڭ جاعدايىمىزدى ەسكەرىپ, وسىنداي قايىرىمدىلىق كورسەتىپ جاتقان قالا اكىمدىگىنە ريزاشىلىعىمدى بىلدىرەمىن» دەيدى كوڭىلى كوتەرىلىپ.
ەركەجان ساتىمبەك