ۇلتتىق مۋزەيدىڭ 10 جىلدىعىنا وراي «دالا كەسكىندەمەسى: رامىزدەر, بوياۋلار, بەينەلەر» كورمەسى ءوتىپ جاتىر.
كورمە ەكسپوزيتسياسىنا جالپى سانى 200-گە جۋىق كەسكىندەمەلىك شىعارما قويىلعان. ولاردىڭ اراسىندا ءابىلحان قاستەەۆ, اۋباكىر ىسمايىلوۆ, ورال تاڭسىقباەۆ, سالاحيتدين ايتباەۆ, ۇكى اجيەۆ, ايشا عالىمباەۆا, گۇلفايرۋز ىسمايىلوۆا, كاميل مۋللاشەۆ, اماندوس اقاناەۆ, ەربولات تولەپباي, الپىسباي قازىعۇلوۆ, اعىمسالى دۇزەلحانوۆ جانە تاعى باسقا كوپتەگەن قازاقستاندىق تانىمال قىلقالام شەبەرلەرىنىڭ تاماشا تۋىندىلارى بار. كورمە «قازاق كەسكىندەمەسىندەگى تاريحي سيۋجەتتەر», «تابيعات بەينەلەر – الۋان ءتۇرلى پەيزاجدىق موتيۆتەر», «قازاقستان ونەرىندەگى سۋرەتشى ايەلدەر», «قازىرگى زامانعى ونەر – جاڭا ەسىمدەر» سياقتى تاقىرىپتىق ايماقتارعا بولىنگەن.
كورەرمەن نازارىنا ۇزدىك كوركەمسۋرەت تۋىندىلارى, گوبەلەندەرمەن قاتار, ءداستۇرلى قولونەر, زەرگەرلىك جانە توقىماشىلىق ونەر بۇيىمدارى, مۋزىكالىق اسپاپتار ۇسىنىلدى. ەكسپوزيتسياداعى تۋىندىلاردىڭ باسىم بولىگى العاش رەت كورمەگە شىعارىلدى. مۋزەي قورىندا ساقتالعان بۇل قۇندى جادىگەرلەردىڭ بىرقاتارىنا كۇردەلى قالپىنا كەلتىرۋ جۇمىستارى جۇرگىزىلدى.
ەكسپوزيتسيانىڭ اشىلۋىندا باقىت قايىربەكوۆتىڭ «سۋ جولى» دەرەكتى ءفيلمى ۇسىنىلدى. قوبىز, دومبىرا ۇنىمەن كوركەمدەلگەن فيلمدە قازاقستان تابيعاتى كورسەتىلىپ, رەجيسسەر ولەڭدەرى دە وقىلادى.
كورمە وسى جىلدىڭ 31 شىلدەسىنە دەيىن جالعاسادى.
