ومىرقۇل اينيازوۆ, ءانشى, قر ەڭبەك سىڭىرگەن قايراتكەرى
– ساحنالىق كيىمدەرىڭىز وزىڭىزگە وتە جاراسىمدى. ارنايى تىكتىرەسىز بە؟
ىڭكار, ديزاينەر
– جىلى لەبىزىڭىزگە راحمەت! ءيا, كيىمدى ارنايى تىكتىرەمىن. ويتكەنى, ءار ءانشىنىڭ وزىندىك ەرەكشەلىگى بولۋى كەرەك. سوندىقتان تالدىقورعان قالاسىنداعى «ار سالون» شەبەرحاناسىنىڭ ىسمەرلەرىنە تاپسىرىس بەرىپ تۇرامىن. حالىقتىڭ الدىنا شىعاتىن ونەرپازدىڭ كيىمى, ءسوزى, ءجۇرىس-تۇرىسى دا ەرەكشەلەنىپ تۇرعانى ءجون. بۇل – ساحنا مادەنيەتى, كورەرمەندى سىيلاۋ.
– ءداستۇرلى انشىلەردىڭ كوپشىلىگى حالىققا تەز تانىلۋ ماقساتىندا ەسترادالىق باعىتقا اۋىسىپ جاتادى. ءسىز دە ءسويتتىڭىز بە؟
ايجان, وقىرمان
– ءوز باسىم ءداستۇرلى اندەردى ەسترادالىق باعىتقا سالىپ ورىنداسام, تىڭدارماننىڭ كوبەيەتىنىن ءتۇسىندىم. دەگەنمەن, ءداستۇرلى اندەر باعالانبايدى دەپ وتىرا بەرمەي, قولىنان كەلەتىن ادامدار بۇل سالاعا ەلەۋلى ۇلەس قوسىپ جاتسا, حالىق قوشەمەتىنە بولەنەدى دەپ ويلايمىن. الايدا, كوپتەگەن ادامداردىڭ مۋزىكالىق دەڭگەيى داستارقان باسىندا ايتىلاتىن اندەردى عانا تۇسىنەتىن دەڭگەيگە تۇسكەن.
– كوپ ونەر يەلەرى استاناعا قونىس اۋدارىپ جاتىر. باس شاھارعا كوشىپ كەلۋ ويىڭىزدا جوق پا؟
دينارا, قالا تۇرعىنى
– الماتى جانە تالدىقورعان قالالارىندا ۇيلەرىم بار. باس قالاعا بولاشاقتا قونىس اۋدارىپ قالۋىمىز ءمۇمكىن. ويتكەنى, ەلوردامىز جىل ەمەس, كۇن ساناپ دامىپ جاتىر. قالا تازالىعىمەن, جاڭالىعىمەن ۇنايدى.
– بۇگىندە انشىلەردى اسىراپ وتىرعان – توي. ءسىز دە تابىستى تويدان تاباتىن شىعارسىز؟
نارتاي, ستۋدەنت
– جاسىراتىنى جوق, ەل-جۇرت قادىرلەپ تويىنا شاقىرىپ جاتسا, باس تارتپايمىن. تويلاردا ءان سالىپ ءجۇر دەپ, ءانشىلەردى كىنالاۋعا بولمايدى. ويتكەنى, انشىلەر گاسترولدىك ساپارلاردا بار شىعىندارىن وزدەرى كوتەرەدى. بىزدە بايلار, ۇلكەن شەنەۋنىكتەر دۇرىلدەتىپ توي جاساپ جاتادى. ولار شەتەلدەن انشىلەردى شاقىرادى. ول قانداي اتاقتى بولعانىنا قاراماستان كەلەدى. ءانىن ايتادى. سوسىن تيەسىلى اقشاسىن الادى دا كەتەدى. كوردىڭىز بە, قازاق انشىلەرى عانا ەمەس, اتاعى جاھانعا كەتكەن اتاقتىلاردىڭ وزدەرى دە تويعا كەلىپ ءان سالىپ, ناپاقا تاۋىپ ءجۇر. توي يەسى قىزىقشىلىعىندا جاقسى اندەر ايتىلسا دەيدى. سوندىقتان, شاقىرعان جەرگە نەگە بارماسقا؟
– اعا, ونەرگە دەگەن قىزىعۋشىلىعىڭىز قاي كەزدەن وياندى؟
مارا
– جاستايىمنان قۇلاعىما جىر-تەرمەلەردى ءسىڭىرىپ ءوستىم. اكەمنىڭ ءىنىسى وتەپبەرگەن اعام ونەرگە جاقىن بولدى. سول كىسىنىڭ ىقپالى دەسەم, ارتىق ايتقاندىق ەمەس. 4-5 جاسىمدا دومبىرا تارتۋدى ۇيرەنىپ الدىم دا, 5-6 جاسىمدا جىر-تەرمەلەردى جاتقا ايتتىم. مەكتەپتە بەس جىل باياننان ءدارىس الدىم.
– تاعى ءبىر سۇراق, ەڭ العاشقى ورىنداعان ءانىڭىز ەسىڭىزدە مە؟
– ەڭ ءبىرىنشى ورىنداعان ءانىم – نۇرتۋعان جىراۋدىڭ «قانەكي, ءتىلىم, سويلەشى» دەگەن تەرمەسى بولاتىن. اۋىلدا قوي كەزەكتە اتتىڭ ۇستىندە ءجۇرىپ احمەت جۇبانوۆتىڭ «اق كوگەرشىن» دەگەن ءانىن ايعايلاپ ايتاتىنمىن. جاتتاعان اندەرىمدى بىرىنەن سوڭ ءبىرىن ايتىپ قوي قايىراتىنمىن.
– «ەر-ازاماتتىڭ باعى – اسىل جارى» دەگەن اتا-بابالارىمىز. كەلىنشەگىڭىز قانداي جان؟
زەردە
– جاقسى ادام. «ەر جىگىتتىڭ اتىن جاقسى ات نەمەسە جاقسى ايەل شىعارادى» دەپ جاتادى. ول كىسى جامان بولسا, مەن وسىلاي جۇرمەس ەدىم عوي. كونسەرۆاتوريادا 2-كۋرستا جۇرگەندە ۇيلەندىم. ماماندىعى – مۇعالىم. مۋزىكا مەكتەبىندە ساباق بەرەدى, دومبىراشى.
– ءسىزدى تىڭدايتىن انشىلەر كوپ. ءسىز كىمدى تىڭدايسىز؟
ساياجان, تىگىنشى
– ءوزىمىزدىڭ جۇبانىش جەكسەنۇلى, قىدىرالى بولمانوۆ, مەدەۋ ارىنباەۆ, التىناي جوراباەۆا, بەيبىت سەيدۋاليەۆا سياقتى انشىلەردى تىڭدايمىن. عالىمجان جولداسباەۆ دەگەن جاس ءانشىنىڭ جىر, تەرمەلەردى ورىنداۋى ۇنايدى.
– بۇرىن ايتىلعان, قازىر ەشكىم ورىنداماي جۇرگەن, جوعالىپ بارا جاتقان اندەردى ىزدەۋ ادەتىڭىزدە بار ما؟
جۇلدىز, بيوتەحنولوگ
– ارينە, رەپەرتۋارىن تولىقتىرىپ وتىرمايتىن ءانشى ءانشى ەمەس. قورجىنىمدا «ءدۇرداراز», «اقجايناق», تۇرماعامبەت ءىزتىلەۋوۆتىڭ «ەل ءۇشىن تۋعان ەر بولساڭ», اقتانگەرەيدىڭ تەرمەسى «اينامكوز», «ساۋلەم-اي» اندەرى بار. جالپى بۇلاردىڭ ءبارى ەسترادالىق اسپاپتارمەن سۇيەمەلدەنگەنى بولماسا, ۇلتتىق بوياۋى ساقتالعان. سوناۋ بالا كۇنىمنەن حالىقتىق ءان مەن تەرمەلەردى ايتقاندىقتان شىعار, ءيىرىمدەرى مەن مانەرى قازاقى قالپىندا. جىراۋلار شىعارماشىلىعى تەلەگەي-تەڭىز. سوندىقتان, الداعى ۋاقىتتا دا جاڭا اندەر قاراپ, رەپەرتۋارىما ەنگىزەمىن.
– ونەر ادامدارىنىڭ بارلىعى شەتەلدە دەمالعاندارىن ايتىپ جاتادى. ءسىز دە باسقا ەلدە دەمالاسىز با؟
گۇل, مەدبيكە
– ەلىمىزدە تابيعاتى تاماشا, تالاي تاريحتى قويناۋىنا باسىپ جاتقان مەكەندەر جەتەدى. سوندىقتان جاز ايىندا وتباسىمىزبەن قازاقستاننىڭ كەرەمەت جەرلەرىن ارالاۋدى ءجون كورەمىز.
ەركەجان ساتىمبەك