قارتتار كۇنى قالامىزداعى «مەحكولوننا-56» جشس-عا قاراستى «ورمان» مەيرامحاناسىندا كەزىندە وسى مەكەمەدە جۇمىس ىستەگەن زەينەتكەرلەر باس قوستى.
جينالعان 20-دان اسا قارت ارىپتەس داستارقان باسىندا ەڭبەكتەن قول ۇزبەگەن ەڭسەلى شاقتارى جايىندا اڭگىمەلەسىپ, قوسىلا ءان شىرقاپ, ارقا-جارقا بولىپ تارقاستى. قالالىق «ارداگەر» مۋزىكالىق حورىنىڭ جەتەكشىسى گالينا اكسەنوۆا «ءبىز قارتتىقتىڭ ەمەس, قارتتاردىڭ مەرەكەسىن تويلاپ جاتىرمىز. مۇنداي كەزدەسۋلەر – ەگدە تارتقان ادامدار ءۇشىن ۇلكەن قۋانىش» دەيدى. بۇل مەكەمەدە جۇمىس ىستەگەن الپىس شاقتى ارداگەر بار. ءبارى ءبىر جەردە تابان اۋدارماي 25 جىلدان باستاپ 50 جىلعا دەيىن ەڭبەك ەتكەن.
«مەحكولوننا-56» مەكەمەسىنىڭ بۇرىننان ىستەپ كەلە جاتقان باسشىسى بولات قۋانىشەۆ زەينەتكەر بولسا دا, ءالى كۇنگە دەيىن ءوزى باسقارىپ وتىر. وتىرىسقا كەلگەن قارتتاردىڭ كوبى – زامانداس ارىپتەستەرى. «جىلىنا ءبىر كەلەتىن مەرەكەدە وسىندا ەڭبەك ەتىپ, زەينەتكە شىققان قارتتاردى جيناپ, ەلەپ-ەسكەرىپ, قۇتتىقتادىق. بۇل – ءبىزدىڭ مىندەتىمىز. دەنساۋلىعى جاراماي كەلە الماي قالعاندارى دا نازاردان تىس قالمادى. ۇيلەرىنە بارىپ, سىيلىقتارىن تابىستادىق» دەيدى ول.
