وتالعان اعاشتىڭ وبالى كىمدە؟
جاڭا جىل جاقىنداعان سايىن ەلوردالىق پوليتسيالار زاڭسىز اعاش كەسۋشىلەرمەن كۇرەستى كۇشەيتە تۇسۋدە. استانا اۋماعىندا بيىل 31 جەلتوقسانعا دەيىن قىلقان جاپىراقتى اعاشتاردى ارنايى رۇقسات قاعازسىز كەسۋ, تاسىمالداۋ, ساتۋدى انىقتاۋعا ارنالعان رەيدتىك شارالار جۇرگىزىلەدى.
تابيعاتتى قورعاۋ پوليتسيالارى «استانا ورمانى» مكك, «جاسىل ايماق» رمك جانە قالالىق ءىىد جەرگىلىكتى پوليتسيا قىزمەتىنىڭ وكىلدەرىمەن بىرلەسىپ, اسىرەسە, استانانى اينالدىرا قولمەن وتىرعىزىلعان جاسىل جەلەكتى ەرەكشە قورعاۋعا الدى. قالانىڭ ىشىندەگى قىلقان جاپىراق تۇقىمداس جاس تالدار دا باقىلاۋدا. ءتيىستى ماماندار ەلوردانىڭ ورتالىق بازارلارى مەن ساۋدا ورتالىقتارىندا ساتىلىپ تۇرعان شىرشالاردىڭ رۇقسات قاعازدارى بار-جوعىن دا تەكسەرىپ شىقتى.
جالپى, ەلىمىزدە شىرشالار ەركiن ساتىلىمعا شىعارىلمايدى. ساۋداعا جەرگىلىكتى جاسىل جەلەكتى ساتۋعا تىيىم سالىنعان. ەگەر كىمدە-كىم اعاشتى زاڭسىز وتاسا, جاسىل جەلەككە زيان كەلتىرسە, ول ادام اكىمشىلىك جاۋاپكەرشىلىك بىلاي تۇرسىن, قازاقستان رەسپۋبليكاسىنىڭ قىلمىستىق كودەكستىڭ 340-بابى بويىنشا قىلمىستىق جاۋاپكەرشىلىككە تارتىلادى. مەملەكەت تابيعاتتى قورعاۋ ءۇشىن وسىنداي قاتال جازا ەنگىزدى. ويتپەي شە؟ كەسىلگەن ءبىر اعاشتىڭ ورنىنا ون اعاش وتىرعىزۋعا تۋرا كەلەدى. ونىڭ سىرتىندا ءبىر جاس شىبىق جەتىلىپ, جايقالىپ ءوسۋ ءۇشىن وعان كەمىندە 15 جىل كەتەدى ەكەن. سوندىقتان ءاربىر ادام اينالانى شاڭ-توزاڭنان قورعاپ, قالاعا كورىك بەرىپ تۇرعان اعاشقا ايالاي قاراعانى دۇرىس. مامانداردىڭ ايتۋىنشا, بۇگىندە جاڭاجىلدىق مەرەكەگە جۇرتشىلىقتىڭ كوبى جاساندى شىرشانى تىككەندى قۇپ كورەدى. ال ەگەر ءبىر كۇندىك سايرانعا بولا تابيعي شىرشانى ىزدەيتىندەر رەسەيدەن الدىرتقانى ءجون نەمەسە ءىرى ساۋدا ورتالىقتارىندا ارنايى رۇقسات قاعازبەن ساتىلىپ جاتقان وسى ەلدىڭ اعاشتارىن ساتىپ العانى دۇرىس.
قىمبات نۇرعالي