ەلباسى «قازاقستان رەسپۋبليكاسى تاۋەلسىزدىگىنىڭ جيىرما بەس جىلدىعىنا بايلانىستى راقىمشىلىق جاساۋ تۋرالى» زاڭعا قول قويعانى بەلگىلى. ورتالىق كوممۋنيكاتسيالار قىزمەتى الاڭىندا وتكەن جيىندا زاڭ اياسىندا ازاماتتاردىڭ قاي ساناتىنا كەشىرىم بەرىلەتىنى ءتۇسىندىرىلدى. بەلگىلى بولعانداي, بيىل 28 مىڭ ادامعا كەشىرىم بەرۋ جوسپارلانۋدا.
ايتا كەتەيىك, اتالمىش زاڭ ازاماتتاردىڭ الەۋمەتتىك وسال ساناتتارىنا راقىمشىلىق جاساۋدى كوزدەيدى. ولاردىڭ قاتارىنا كامەلەتكە تولماعاندار, جۇكتى ايەلدەر, كامەلەتكە تولماعان بالالارى نەمەسە مۇگەدەك بالالارى بار ايەلدەر, سونداي-اق كامەلەتكە تولماعان بالالاردىڭ جالعىز اتا-اناسى بولىپ تابىلاتىن ەر ادامدار, I, II جانە III توپتاعى مۇگەدەكتەر, ەلۋ جاستاعى جانە ول جاستان اسقان ايەلدەر, الپىس جاستاعى جانە ول جاستان اسقان ەر ادامدار, ۇلى وتان سوعىسىنىڭ قاتىسۋشىلارى مەن مۇگەدەكتەرىنە جانە ولارعا تەڭەستىرىلگەن ادامدار, اسكەري جانە ينتەرناتسيونالدىق بورىشىن ورىنداۋ كەزىندە قازا تاپقان اسكەري قىزمەتشىلەردىڭ جەسىرلەرى كىرەدى.
سونىمەن قاتار, زاڭ شەڭبەرىندە سوتتالعان ادامداردىڭ جەكەلەگەن ساناتتارى ءۇشىن جازا مەرزىمىنىڭ وتەلمەگەن بولىگىن ايىپپۇلمەن نەمەسە باس بوستاندىعىن شەكتەۋمەن اۋىستىرۋ نەمەسە ونى قىسقارتۋ ءراسىمىن قولدانۋ مۇمكىندىگى پايدا بولادى.
جيىندا راقىمشىلىق جاساۋ اكتىسى قولدانىلمايتىن ازاماتتار تۋرالى دا ايتىلدى. تەرروريستىك جانە ەكسترەميستىك قىلمىس جاساعاندار, رەتسيديۆيستەر; ءومىر بويىنا باس بوستاندىعىنان ايىرۋعا جازالانعان, سونداي-اق كەشىرىم جاساۋ تارتىبىمەن ءولىم جازاسى باس بوستاندىعىنان ايىرۋعا اۋىستىرىلعان ادامدار, بۇرىن راقىمشىلىق جاسالعان نەمەسە كەشiرiم جاسالعان جانە قايتادان قاساقانا قىلمىستار جاساعان ادامدار; قىلمىستىق توپتار قۇرامىندا قىلمىس جاساعانى ءۇشىن سوتتالعان, سونداي-اق قىلمىستىق زاڭدا بەلگىلەنگەن ءبىرقاتار وزگە دە قىلمىستار جاساعان ادامدار راقىمشىلىققا ىلىنبەيدى. جالپى, الداعى التى اي ىشىندە 28 مىڭعا جۋىق ادامعا كەشىرىم بەرىلەدى دەپ كۇتىلۋدە.
«تاۋەلسىزدىگىمىزدىڭ 25 جىلدىعىن اتاپ ءوتۋ قارساڭىندا مەملەكەت باسشىسى باستاما جاساعان راقىمشىلىق جاساۋ تۋرالى زاڭ جوباسى ازاماتتىق جانە ساياسي قۇقىقتار تۋرالى حالىقارالىق اكتىنىڭ قاعيداتتارى مەن بۇۇ-نىڭ قىلمىستىق سوت تورەلىگى سالاسىنداعى باسقا دا قۇجاتتارىن ىسكە اسىرۋدى جالعاستىراتىن مەملەكەتتىڭ جاڭا ساياساتىنىڭ جارقىن ۇلگىسى» دەيدى قر پارلامەنتى ءماجىلىسىنىڭ دەپۋتاتى قانات مۋسين.
گۇلميرا ايماعانبەت
