وزىق تەحنولوگيا – دامۋ كەپىلى

پرەزيدەنت قاسىم-جومارت توقاەۆ س.سەيفۋللين اتىنداعى قازاق اگروتەحنيكالىق ۋنيۆەرسيتەتىنە باردى. مەملەكەت باسشىسى وقۋ ورنىنىڭ ءبىلىم بەرۋ جانە عىلىم-زەرتتەۋ جۇمىستارىمەن تانىستى, سونداي-اق وقىتۋشىلارمەن, ستۋدەنتتەرمەن اڭگىمەلەستى.ۋنيۆەرسيتەت رەكتورى, نۇر-سۇلتان قالاسى ءماسليحاتىنىڭ دەپۋتاتى اقىلبەك كۇرىشباەۆ پرەزيدەنتكە مولەكۋليارلىق بيولوگيا مەن گەندىك ينجەنەريا­نىڭ زاماناۋي ادىستەرىن پايدالانا وتىرىپ شىعارىلعان اۋىل شارۋاشىلىعى داقىلدارىنىڭ جاڭا سورتتارىن كورسەتتى. 5 جىل ىشىندە جوعارى وقۋ ورنىنىڭ عالىمدارى بيداي مەن ارپانىڭ قۇرعاقشىلىققا ءتوزىمدى جاڭا سورتتارىن شىعاردى. قاسىم-جومارت توقاەۆقا بيوورگانيكالىق تىڭايتقىشتار ءوندىرۋ ۇدەرىسىندەگى جاڭا تەحنولوگيانىڭ قولدانىلۋى, ۆەتەريناريا جۇيەسىنىڭ تسيفرلاندىرىلۋى, جانۋارلاردى ەسەپكە الۋ ۇدەرىسى جايىندا مالىمەت بەرىلدى.
مەملەكەت باسشىسى جەردى پايدالانۋ پروتسەسىن باقىلاۋعا مۇمكىندىك بەرەتىن عارىشتان مونيتورينگ جاساۋدىڭ جانە جەردى قاشىقتىقتان زوندتاۋدىڭ زاماناۋي ادىستەرىمەن تانىستى. ستۋدەنتتەرمەن اڭگىمەلەسۋ بارىسىندا قازاقستان پرەزيدەنتى وزىق تەحنولوگيالاردى قولدانۋدىڭ وزەكتىلىگىن اتاپ ءوتتى.
– سىزدەر وتە ماڭىزدى جۇمىسپەن اينالىسىپ جاتىرسىزدار. روبوت تەحنيكاسى, تسيفرلاندىرۋ جانە جاساندى ينتەللەكت – قازىرگى زامان تالابى, اسىرەسە, دامىعان ەلدەردە. سوندىقتان بىزگە ارتتا قالىپ قويۋعا مۇلدەم بولمايدى, – دەدى مەملەكەت باسشىسى.
ستۋدەنتتەر پرەزيدەنتكە قولداۋ كورسەتكەنى جانە 2020 جىلدىڭ قاڭتارىنان باستاپ شاكىرتاقى كولەمىن 25 پا­يىزعا ارتتىرۋ جونىندەگى تاپ­سىرماسى ءۇشىن العىس ايتتى.