پەتيتسيا – حالىقتىڭ ءوز تالابىن بيلىككە جەتكىزۋدىڭ جالعىز جولى. جۋىردا قازاقستاندىقتار پەدوفيلدەرگە ءولىم جازاسىن بەرۋ تۋرالى ۇندەۋ جاريالاپ, قول جيناي باستاعان ەدى. الايدا ءۇش كۇننەن كەيىن اتالمىش پەتيتسيا جابىلىپ قالدى.
استانالىق ادۆوكات ءلاززات احاتوۆا بارشا قازاقستاندىقتاردىڭ اتىنان «پەدوفيلدەرگە ءولىم جازاسى تاعايىندالسىن» دەپ قر پرەزيدەنتىنە اشىق حات جازىپ, پەتيتسيا جاريالاعانى بەلگىلى. وندا زاڭگەر ەلباسىدان پەدوفيلدەرگە ءولىم جازاسىن تاعايىنداۋدى زاڭمەن بەكىتۋدى سۇراعان ەدى. الايدا ءۇش كۇن وتپەي جاتىپ داۋىس بەرۋ مۇمكىندىگى جويىلدى. الەۋمەتتىك جەلىدە پەتيتسيانىڭ اۆتور تاراپىنان جابىق تۇرعانى تۋرالى پىكىرلەر كوبەيىپ كەتتى.
«پەدوفيلدەرگە ءولىم جازاسىن سۇراعان پەتيتسيانى شىققان كۇننەن باستاپ بىرەۋلەر قاداعالاۋعا العان سياقتى. بىرەسە جاۋىپ تاستايدى, ارتىنان ءبىرشاما ۋاقىتقا اشادى. تۋرا قازىر مەنىڭ اتىمنان جاۋىپ تاستادى. كىمگە كەدەرگى كەلتىردى ەكەن ول پەتيتسيا؟ پەدوفيلدەردىڭ بىرەۋى مە نەمەسە ءسابي تاعدىرىنا نەمقۇرايلى قارايتىن جۇرەگى جوق يمانسىزدار ما؟ سۇراق كوپ, جاۋابى بەلگىسىز. قول قويدىق دەپ جاتقاندار دا كوپ, بىراق پەتيتسيا جابىق تۇرعان سوڭ, جەتپەي جاتىر» دەيدى زاڭگەردىڭ ءوزى.
بەلگىلى بولعانداي, petitions247.com سايتىنا جاريالانعان پەتيتسيانى اشۋعا بىلىكتى باعدارلاماشىلار دا كومەكتەسكەن. وكىنىشكە قاراي, از ۋاقىتتان سوڭ قايتادان اۆتوماتتى تۇردە جابىلىپ قالا بەرەدى. ادۆوكاتتىڭ ءوزى بىرنەشە مارتە اشۋعا ارەكەت ەتكەنمەن, ارتىنشا بەلگىسىز سەبەپتەرگە بايلانىستى داۋىس بەرۋ مۇمكىندىگى جويىلدى.
جالپى, ەلىمىزدە پەتيتسيا ينستيتۋتى قانشالىقتى دەڭگەيدە جۇمىس ىستەيتىندىگىن وسىدان-اق بىلۋگە بولادى. ەستەرىڭىزدە بولسا, 2016 جىلدىڭ ماۋسىمىندا «قازاقستان-2050» جالپىۇلتتىق قوزعالىسى ەلىمىزدە رەسمي ونلاين-پەتيتسيا مەحانيزمىن ەنگىزۋ باستاماسىن قولعا العان بولاتىن. بۇل – مەملەكەتتىك بيلىك ورگاندارىنا جازباشا تۇردە ۇجىمدىق ءوتىنىش جولداۋعا بولاتىن قاراپايىم ءارى تەگىن ەلەكتروندى قۇرال. ءتىپتى كاسىبي زاڭگەرلەردەن قۇرالعان توپ ونلاين-پەتيتسيا ينستيتۋتىن قۇرۋ تۇجىرىمداماسىن دايىنداپ تا قويدى. ەگەر جۇزەگە اسسا, الەمدىك تاجىريبە كورسەتكەندەي, ازاماتتىق قوعام الدىنداعى بىرقاتار ماسەلەلەر جەدەل تۇردە شەشىمىن تابار ەدى. ماسەلەن, اقش-تا 2011 جىلى, ۇلىبريتانيادا وسىنداي ۇندەۋلەر 2016 جىلى رەسمي مويىندالعان. سوندىقتان ونلاين-پەتيتسيانى زاڭنامالىق دەڭگەيدە بەكىتىپ, حالىقتىڭ تالابىنا نازار اۋداراتىن ۋاقىت جەتكەن سياقتى.
