وسىدان ءبىر اي بۇرىن استانادا پلاستيك جيناۋعا ارنالعان 700-گە جۋىق كونتەينەر ورناتىلدى. العاشىندا 50 تۇرعىن ءۇي كەشەنىنە, ال جىل سوڭىنا دەيىن ەلورداداعى بارلىق 588 تۇرعىن ءۇي كەشەنىنە ورناتۋ جوسپارلانعان. كونتەينەر الاڭقايلارىنىڭ جالپى سانى 686 بولادى.
«استانا-تازارتۋ» مەكەمەسىنىڭ باس ديرەكتورى يۆان لاۆرينەنكونىڭ ايتۋىنشا, وتكەن جىلى وسىعان ۇقساس پيلوتتىق جوبا ىسكە قوسىلعان بولاتىن. ياعني, پلاستيك, قاعاز جانە شىنى جيناۋعا ارنالعان ءۇش كونتەينەر اۋلالارعا قاتار قويىلعان. بۇل ءوز كەزەگىندە قوقىستى سۇرىپتاپ جيناۋعا تاربيەلەيدى. دەگەنمەن, تۇرعىندار ءۇشىن قولايسىز بولعانى جاسىرىن ەمەس. سوندىقتان بۇل جۇيەنى بىرتىندەپ ەنگىزۋ قولعا الىندى.
جاسىراتىنى جوق, ەلىمىزدە جىل سايىن 600 ملن تونناعا جۋىق قوقىس تاستالادى ەكەن. بۇگىندە شاعىن قالالاردىڭ وزىندە 20 تونناعا جۋىق پلاستيكتەن جاسالعان شولمەكتەر قوقىسقا لاقتىرىلادى. تابيعات جاناشىرلارىنىڭ ايتۋىنشا, قوقىستىڭ تابيعاتتا بۇزىلۋ مەرزىمى وتە ۇزاق ۋاقىتتى الادى. ماسەلەن, كۇندەلىكتى ومىردە قولدانىپ جۇرگەن ءبىر رەتتىك قاعاز ىدىس – بەس جىل, قاڭىلتىر قالبىر – ءجۇز جىل, ال قاراپايىم پلاستيك شولمەك – بەس ءجۇز جىلدان كەيىن قۇرىسا, شىنى شولمەك ەشقاشان بۇزىلمايتىن كورىنەدى. ەلوردانىڭ ستراتەگيالىق جوسپارىندا قالدىق-تاردى ازايتۋ جانە تازارتۋ كوممۋنالدىق شارۋاشىلىقتىڭ باستى مىندەتى بولىپ بەلگىلەنگەن. ءدال قازىرگى كۇنى ءوندىرىس جانە تۇتىنۋ قوقىستارى بىرنەشە پايىزعا وسكەن. سوندىقتان الداعى ۋاقىتتا جويىلاتىن قالدىقتاردى ازايتۋ ماسەلەسى قاراستىرىلۋدا.
– «استانا -تازارتۋ» جشس قولعا العان جوبا جىلدىڭ سوڭىنا دەيىن جالعاسادى. ارناۋلى كونتەينەرلەرگە سالىنعان قوقىستار, ازىرگە ەلوردانىڭ قوقىس پوليگونىنا جولدانادى. بۇيىرتسا, 2017 جىلدىڭ II توقسانىندا ەلوردادا قوقىس قالدىقتارىن وڭدەيتىن زاۋىت ىسكە قوسىلعاننان كەيىن, سوندا جونەلتىلەتىن بولادى, – دەيدى استانا قالاسى تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ قالدىقتاردى باسقارۋ ءبولىمىنىڭ باسشىسى ميراس عايسين.
گۇلميرا ايماعانبەت
