قازاقستان پوليتسياسى كۇنى كاسىبي مەرەكەسىنە وراي استانا قالاسىنىڭ اكىمى ادىلبەك جاقسىبەكوۆ ەلوردالىق ءتارتىپ ساقشىلارىنا جاڭا 40 قىزمەتتىك كولىكتىڭ كىلتىن تابىس ەتتى.
قالالىق اكىمدىك الدىنداعى الاڭدا قاز-قاتار تىزىلگەن 40 پوليتسيا كولىگى كوزگە ەرەكشە تۇسەدى. كوك بەلدەمەسى بار كولىكتەردىڭ ماركاسى دا ءارتۇرلى. «پەجو 301», «شكودا وكتاۆيا» اۆتوماشينالارى قالا ىشىندەگى قاۋىپسىزدىك پەن ءتارتىپتى قامتاماسىز ەتسە, «سانگەنگ-كايرون» دجيپ كولىگى شەت جاقتاعى ۇڭعىل-شۇڭعىلى كوپ اۋماقتاردى باقىلاۋعا ارنالعان. ال, «پەجو 508» ماشيناسى رەسمي دەلەگاتسيانى الىپ جۇرۋگە, ولاردىڭ قاۋىپسىزدىگىن قورعاۋعا ارنايى مامانداندىرىلعان باتالونعا بەرىلەدى ەكەن.
سالتاناتتى شارانى اشقان ادىلبەك جاقسىبەكوۆ پوليتسيالاردى كاسىبي مەرەكەسىمەن قۇتتىقتاپ, قوعامنىڭ قاۋىپسىزدىگى سەنىپ تاپسىرىلعان ساقشىلارعا ۇلكەن جاۋاپكەرشىلىك جۇكتەلىپ وتىرعانىن اتاپ ءوتتى:
– مەملەكەت باسشىسى ءوزىنىڭ 5 ينستيتۋتسيونالدى رەفورمانى جۇزەگە اسىرۋ باعىتىنداعى «100 ناقتى قادام» باعدارلاماسىندا پوليتسيانى جاڭا ساپالى كەزەڭگە كوتەرۋ, قوعامدىق ءتارتىپتى قورعاۋ, قۇقىق بۇزۋشىلىققا قارسى تۇرۋ سىندى ماسەلەلەرگە قاتىستى بىرقاتار ماڭىزدى تاپسىرما بەرگەنى بەلگىلى. قىزمەتتىك اۆتوكولىكتەر پاركىن جاڭارتۋ – مەملەكەتتىڭ قۇقىق قورعاۋ ورگاندارى قىزمەتىنىڭ ساپاسىن ارتتىرۋعا باعىتتالعان سول كەشەندى شارالاردىڭ ءبىر بولىگى عانا. پوليتسيا قىزمەتىنە زاماناۋي تەحنولوگيالاردى ەنگىزۋ ارقىلى بۇل سالانى جاڭا دەڭگەيگە كوتەرۋدى ماقسات ەتىپ وتىرمىز. ءتارتىپ ساقشىلارى دا قازىرگى زامان تالابىنا ساي بولىپ, وزدەرىنە ارتىلعان مىندەتتى ابىرويمەن اتقارۋى ءتيىس, – دەدى ول.
قالا اكىمى ەلوردادا «تىنىس-تىرشىلىكتى قامتاماسىز ەتۋدىڭ كەشەندى جۇيەسى» اتتى اۋقىمدى جوبا جۇزەگە اسىرىلىپ جاتقانىن, سونىڭ اياسىندا الداعى ۋاقىتتا قالادا 15 مىڭ بەينەكامەرا ورناتۋ كوزدەلىپ وتىرعانىن جەتكىزدى.
بۇدان كەيىن ادىلبەك رىسكەلدىۇلى جاڭا پوليتسيا كولىكتەرىنە وتىرىپ كورىپ, ولاردىڭ تەحنيكالىق جاعدايىمەن تانىستى. استانا قالاسى ءىىد اكىمشىلىك پوليتسيا باسقارماسى باسشىسىنىڭ ورىنباسارى ەلجان چۋپەكوۆتىڭ ايتۋىنشا, قازاقستاندا قۇراستىرىلعان بۇل كولىكتەر قازىرگى زامان تالاپتارىنا ساي كەلەدى. وندا ىشكى ىستەر مينيسترلىگىنىڭ اقپاراتتىق بازاسىنان قاجەتتى جەدەل اقپاراتتى الۋعا بولاتىن جانە قوعامدىق ءتارتىپتى بۇزعان وقيعالار مەن جول قوزعالىسى ەرەجەلەرىن ساقتاماۋ دەرەگىن تىركەيتىن ارنايى قۇرىلعىلار ورناتىلعان. «ءبىزدىڭ اۆتوپاركتە قاۋىپسىزدىكتى قامتاماسىز ەتۋگە ارنالعان كولىكتەر جەتكىلىكتى. قالالىق اكىمدىكتىڭ قولداۋىمەن ولاردىڭ قۇرامى ءاردايىم جاڭارتىلىپ وتىرادى. بىلتىر دا پوليتسيا كۇنىنە وراي 40 اۆتوكولىك كىلتىن الدىق» دەيدى ەلجان قاليۇلى.
بۇل كولىكتەردىڭ ءبىر بولىگى – ۋچاسكەلىك ينسپەكتورلارعا, كەيبىرەۋى – جول-پاترۋلدىك پوليتسياعا, ەندى ءبىرى كامەلەتتىك جاسقا تولماعانداردىڭ ىستەرىمەن اينالىساتىن ينسپەكتورلارعا بەرىلمەك.
قىمبات توقتامۇرات
