قادىرى بولەك قالامگەر

جۋرناليستيكانىڭ مارتەبەلى ماماندىققا اينالۋىنا مۇرىندىق بولا بىلگەن الاشتىڭ اپتال ازاماتى, كلاسسيك جازۋشىمىز شەرحان مۇرتازا تۋرالى «مەنىڭ شەراعام» دەگەن تاقىرىپپەن ەسسەلەر جارىق كورە باستاعاندا ەلەڭ ەتە قالعانبىز. اۆتوردىڭ جازۋ ءستيلى مەن ءسوز ساپتاۋىنا قاراپ, قاراجاياۋ ەمەس, كەرىسىنشە, ادەبيەت الەمىندە وزىندىك ءۇنى مەن قولتاڭباسى بار قالامگەرلەر قاتارىنان ەكەنىن ىشتەي سەزىنگەنبىز. ۇلكەن اعاسىن ۇلىقتاعان كىشى اعامىزدى كورۋگە قۇمارتقانىمىز دا راس ەدى.

 كەيىن مىرزاتاي جولداسبەكوۆ اعامىز باسقاراتىن پرەزيدەنتتىك مادەنيەت ورتالىعىندا وتكەن ءبىر جيىندا سونىڭ ءساتى تۇسە كەتكەنى. شەراعانىڭ قاسىنان سىرت بولمىسى بولەكشە ازاماتتى اڭداپ, ونىڭ اعاسىنا دەگەن قۇرمەتى بويىنا سىيماي, ىزەتتىلىك تانىتا بەرۋى ءبىزدى دە ويعا قالدىردى. مامامىزدىڭ ناعاشى اپامىزعا «ماما» دەگەنىن العاش ەستىگەندەگىدەي, وسى ءبىر اقجارقىن اعانىڭ وزىنەن ۇلكەندەۋ اعاعا «ءسىز» دەپ سىزىلىپ, قۇرمەتتەپ, ءيىلىپ تۇرعانىن كورگەندە ەرىكسىز سۇيسىندىك. ۇلكەن تۇلعانى ۇلگى تۇتۋ, جاقسىعا ەلىكتەۋ جاستار ءۇشىن جات مىنەزگە اينالىپ بارا جاتقان مىنا زاماندا پاراساتى بيىك ادام عانا كىسىنى كىسىلىگىنە قاراپ باعالايتىنىن تۇيسىندىك. بۇعان كەيىنىرەك «شەراعامنىڭ شەرۋى» دەگەن اتپەن جارىق كورگەن رومان-ەەسسەسىندەگى «ۇلكەن كىسى ۇلەسى» دەپ اتالعان ۇزىك اڭگىمەسىن وقىعاندا انىق كوز جەتكىزگەندەي بولدىق.

«سول جولى بىرگە بولا الماي قالعان ۇلكەن كىسىنىڭ «اتى كىم ەدى؟» دەپ مەن دە سۇراعان ەمەسپىن, شەراعام دا ايتقان ەمەس. ايتسە دە, كەيىن الماتىعا كەلگەن سوڭ ماعان ورتالىقتان ويىپ تۇرىپ ءتورت بولمەلى ءۇي الىپ بەرەردە شەراعام «سول ۇلكەن كىسىنىڭ دە ۇلەسى بار» دەپ قۇلاققاعىس ەتكەن ەدى. «ول كىم ەدى؟» دەپ ول جولى دا سۇراعان جوقپىن. سەبەبى, ماعان شەراعامنان وتكەن ۇلكەن ادام جوق سياقتى بوپ كورىنەدى دە تۇرادى», – دەيدى اۆتور…

* * *

ءبىز اڭگىمە ەتىپ وتىرعان قالامگەر, تۇلعا تۋرالى جازىپ جۇرگەن تۇلعا, بۇل – «ەگەمەن قازاقستان» گازەتىندە جانىن جالداپ, تاپجىلماي 36 جىل قىزمەت ىستەگەن جۋرناليست, جازۋشىلار وداعىنىڭ مۇشەسى, قازاقستاننىڭ ەڭبەك سىڭىرگەن قايراتكەرى ءادىل دۇيسەنبەك.

ازداپ ءومىر جولىنا توقتالساق: 1942 جىلدىڭ 24 مامىرىندا قازىرگى تاراز قالاسىنىڭ جانىنداعى «جاس وركەن» اۋىلىندا دۇنيەگە كەلگەن. 1961 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە وقۋعا تۇسكەن. ءۇشىنشى كۋرستا جۇرگەنىندە اسكەري بورىشىن وتەۋگە شاقىرىلادى. ءسويتىپ, 1964–1967 جىلدار ارالىعىندا اسكەر قاتارىندا بولىپ, اۋە دەسانتىندا قىزمەت ەتەدى. بىرنەشە رەت پاراشيۋتپەن سەكىرگەن مورزەنى بەس ساۋساقتاي مەڭگەرگەن ءبىرىنشى سىنىپتى راديوتەلەگرافيست. ەلگە ورالعان سوڭ, قايتادان وقۋىن جالعاستىرعان بولاشاق جازۋشى ۋنيۆەرسيتەتتى 1969 جىلى ءبىتىرىپ, سول كەزدەگى «سوتسياليستىك قازاقستان» (قازىرگى «ەگەمەن قازاقستان») گازەتىنە قىزمەتكە تۇرادى.

اۋەلگىدە-اق ءادىل دۇيسەنبەك گازەت رەداكتسياسىنا جازۋشى بولسام دەپ كەلگەن. باسىلىمدا قىزمەت ەتە ءجۇرىپ, سول ارمانىن جۇزەگە اسىرۋعا بارىنشا كۇش سالادى.ءسويتىپ, قولى قالت ەتە قالعاندا كوركەم دۇنيەلەر جازۋمەن دە شۇعىلدانا باستايدى.

اسقار سۇلەيمەنوۆ «ارىستىڭ سۋىنان اكۋلا ىزدەپ جۇرەسىڭ» دەيتىن جازۋشى دۋلات يسابەكوۆ – جان دوسى. بۇگىندە ءادىلدىڭ مەرەيىن تاسىتىپ وتىرعان ەكى قىزى – جازيرا مەن ەلىگايدىڭ ەسىمىن وسى دۋلات دوسى قويسا, دۋلاتتىڭ ەگىز قىزى – ايمان مەن شولپانعا ات قويعان – ءادىل اعامىز.

ستۋدەنت كەزىنەن ءبىر جاتاقحانادا تۇرىپ, ىلعي دا وي ءبولىسىپ, پىكىر الىسىپ جۇرەتىن جازۋشى دوسىنىڭ الەمى, ارينە, بۇعان دا جات ەمەس ەدى. قالامداس سەرىگىنەن دۋلات تا سىر جاسىرماعان. قىسقاسى, بۇكىل سانالى جىلدارىن جۋرناليستيكاعا ارناسا دا, جازۋشىلىقتان قول ۇزبەۋىنە دۋلات دوسىنىڭ دا ىقپالى كوپ بولعان كورىنەدى.

گازەتتەگى جۇمىس كوپ جاعدايدا وزگە بىرەۋلەردىڭ اتىنان ماقالا دايىنداپ, حات قورىتۋدان باسقاعا مويىن بۇرعىزا بەرمەيتىنى ءمالىم. ايتسە دە, ءادىل اعامىز ءتۇن ۇيقىسىن ءتورت بولە ءجۇرىپ, باۋىر ەتى – بالاسىن ايالاعانداي, ادەبيەت الەمىنە بويلايدى. ءوزىنىڭ كوركەم شىعارمالارىن جازۋمەن بولادى. جازعان-سىزعانىن بايگەگە سالىپ, ادەبي كونكۋرستارعا دا قاتىسادى. ونىڭ قالامىنان تۋعان دۇنيەلەر بىرقاتار ۇجىمدىق جيناقتارعا ەنگەن. «اق كۇمبەز», «كوكجيەك», «جۇرەك جىلۋى», «تەرگەۋ ءالى بىتكەن جوق» سىندى كىتاپتارى جارىق كورگەن.

تالاي جىل تابان اۋدارماي گازەت رەداكتسياسىندا ەڭبەك ەتكەندىكتەن, بەرتىندە عانا ءوز اۋىلى – جازۋشىلىققا بەت بۇرا باستاعان قالامگەر دوسى تۋرالى دۋلات يسابەكوۆ بەرتىندە «شىدامدى الما كۇزدە پىسەدى» اتتى ماقالا جازعان. وندا اۆتور: «ازىرگە جارىق كورىپ, وقۋشى كوڭىلىنەن شىققان اڭگىمە, حيكاياتتارىن وي تارازىسىنا سالىپ قاراعاندا, ءادىلدىڭ جازعانىنان جازباعانى كوپ ەكەنىن اڭعاراسىڭ», – دەپ باعا بەرىپتى. وعان تولىق قوسىلۋعا بولادى.

* * *

كەيدە ادام بويىندا تىلمەن ايتىپ جەتكىزگىسىز سەزىمدەر بولادى. ءاۋ باستا جۇمىرباستى پەندەنىڭ قولىنا قالام العىزعان دا سونداي قۇدىرەت پە دەرسىڭ. جازۋشى ءادىل دۇيسەنبەكتىڭ «شەراعامنىڭ شەرۋى» رومان-ەسسەسىن وقىعاندا ەڭ الدىمەن وسىنداي ويعا كەلەسىڭ.

بۇل كىتاپ جالپى العاندا قالامگەردىڭ تۇلعاعا شاكىرت كوزىمەن قاراعانداعى قۇرمەتىنەن تۋعان سياقتى. ال, ەكىنشى جاعىنان الىپ قاراساق, جازۋشىنىڭ جازۋشىنى ۇلىقتاۋى سياقتى بولىپ كورىنۋى دە مۇمكىن. نەسى بار, شەراعاعا قانداي قۇرمەت كورسەتسەك تە جاراسىمدى ەمەس پە؟ ونى اۆتور ءساتتى ورىنداي بىلگەن. كوڭىلى جاس بالادايىن جانىنىڭ تازالىعى ءار سويلەمىنەن اڭعارىلىپ تۇرادى. كىتاپتى وقىعاندا كەي تۇستارىندا ەرىكسىز جىمياسىڭ. كەيدە نامىسىڭ قايرالىپ, رۋح تۇلپارىنا مىنەسىڭ. ەندىگى ءبىر تۇستارى تەرەڭ ويعا باتىرادى. ويعا قالدىراتىنى, شىعارما ىشىندە وربىگەن ديالوگتار ۇستاز بەن شاكىرت اراسىنداعى ساباق ءتارىزدى. سۇراق-جاۋاپ تۇرىندەگى اڭگىمەلەرى دانالىق دارىستەرى دەرلىك. مۇندا ەل, جەر تۋرالى تانىمدىق ماعلۇمات تا مول. قازاقتىڭ دۇنيەتانىمى, ۇلتتىڭ پسيحولوگياسى تۇرعىسىندا قالتارىستى تۇستار قوپارىلىپ, اشىلعانداي دا بولادى. ەڭ باستىسى, وسى ءبىر مولدىرەپ تۇرعان كوركەم شىعارما ادام قانشا قايراتكەرلىك تانىتىپ, قايناعان قوعامنىڭ قاق ورتاسىندا جۇرسە دە, وعان قۇداي جانىن تازا ساقتاپ قالارلىق قاۋقار بەرەتىنىن دالەلدەپ تۇرعان سەكىلدى.

ايتپاقشى, اڭگىمەمىزدىڭ باسىندا ءبىز جازۋشى ءادىل دۇيسەنبەكتىڭ ۇزىن بويلى, كەلىستى كەلگەن كىسى ەكەنىن ايتتىق. سول بويىنداعى كۇش-قايراتتى بايقاعاندىقتان دا بولار, كىتاپ كەيىپكەرىنە اينالعان تۇلعا – شەرحان مۇرتازا اعامىز قالامگەردى «ارحاري» دەپ اتايدى ەكەن. وزىنەن ون جاس كىشى بولسا دا دوس تا, سىرلاس تا, شاكىرت تە, باۋىر دا بولا بىلگەن كىشى جازۋشىعا ۇلكەن جازۋشىنىڭ ارا-تۇرا «ارقاري, ارقارىم مەنىڭ» دەپ مەيىرلەنە ءتىل قاتۋىن ءبىز ەرەكشە سىيلاستىقتان تۋعان ەركەلەتۋ دەپ بىلدىك.

ءسىرا, بۇلايشا كەيىپكەرىنىڭ  قۇرمەتىنە بولەنۋ – ەكىنىڭ بىرىنە بۇيىرا بەرمەگەن باقىت. ولاي دەيتىنىمىز, بۇگىنگە دەيىن «مەنىڭ اۋەزوۆىم», «مەنىڭ ابايىم», «مەنىڭ جامبىلىم» سەكىلدى دۇنيەلەر جازىلعان بولسا دا, كوزى ءتىرى تۇلعا تۋرالى رومان جازىپ, ونى جاريالاۋ – تەك ءادىل دۇيسەنبەكتىڭ عانا قولىنان كەلگەن شارۋا.

«مۇحتاردى مۇحتار ەتكەن – اباي» دەمەكشى, كىتاپتا باياندالعانداي, بۇقارا حالىقتىڭ قاجىرلى قايراتكەرىنە, قالىڭ وقىرماننىڭ سۇيىكتى جازۋشىسىنا اينالعان شەرحان تۋرالى جازۋعا قۇمارتۋشى از بولماسا كەرەك. الايدا, كەيىپكەر بەينەسى كوركەمتىلدى شتريحتارمەن شەبەر سۋرەتتەلگەن مۇنداي روماندى جازىپ شىعۋ – ءادىل دۇيسەنبەكتىڭ عانا ماڭدايىنا جازىلىپتى. مۇنداعى ەڭ باستى قۇندىلىق – شىندىق. بۇعان اقيقاتتىڭ اقتاڭگەرى اتانعان شەراعانىڭ ءوزى كۋا.

ايتپاقشى, قالامگەردىڭ  وسى ءبىر ورنى بولەك تۋىندىنى جازۋدى قالاي قولعا العانى دا قىزىق. اۋەلگىدە ءبىرى – باسشى, ءبىرى – قوسشى بولىپ, ءبىر رەداكتسيادا قىزمەت ەتكەن ەكەۋى جۇمىس بابىمەن جامبىل وبلىسىنا ىسساپارعا بارىپتى. جانىنداعى ءجۋرناليسىنىڭ قىراعىلىعى, سەزىمتالدىعى, شىنشىلدىعى مەن ادالدىعى سۇيسىندىرسە كەرەك, رەداكتور كەلە-كەلە ونى جانىنان تاستامايتىن بولىپتى. ىسساپارعا شىقسا, ەرتىپ الادى. ەلگە تانىمال تۇلعانىڭ قاسىندا جۇرگەن سوڭ جۋرناليست, ارينە, ونىڭ قىر-سىرىن دا بىلە باستايدى. ەشكىمگە ۇقسامايتىن سويلەۋ مانەرى بار, ەلدەن بولەكشە  ءور مىنەزدى تۇلعامەن قاتار ءجۇرىپ, تالاي قىزىق وقيعالارعا كۋا بولادى. كاسىبى قالىپتاستىرعان داعدى بولسا كەرەك, اۋەلگىدە شەرحان مۇرتازانىڭ اۋزىنان شىققان ءتامسىل سوزدەر مەن قىزىقتى ءجايتتاردى ءتۇرتىپ الا جۇرگەن. «بەرتىن كەلە اعاما ءوزى تۋرالى كىتاپ جازعىم كەلەتىنىن ايتقانىمدا, شەراعام:«قايتەسىڭ, ونى, ارحاري!» دەپ, ونشا قولداي قويمادى», – دەيدى قالامگەردىڭ ءوزى بۇل تۋرالى. ايتسە دە, ءادىل اعانىڭ وسى تاقىرىپقا قىزىعۋى باسىلا قويمايدى. ءسويتىپ, ءتۇرلى ەسسەلەر جازىپ, ۇزىندىلەرىن باسپاسوزدە جاريالاي باستايدى. قالامداس ءىنىسىنىڭ بەتالىسىن بايقاعاننان كەيىن عانا شەرحان مۇرتازا كەلىسكەندەي, ۇندەمەيتىن بولعان كورىنەدى.

* * *

ءبىز اڭگىمە ەتىپ وتىرعان كىتاپتى جازۋ يدەياسى «ەگەمەن قازاقستان» اتتى قاراشاڭىراقتا تۋعان. ءبىر جىلدارى باسشى بولىپ كەلىپ, كەيىنگى جىلداردا نامىس كورمەي, قاراپايىم تىلشىلەر قاتارىندا قىزمەت ەتكەن (بۇل دا كىتاپتا ءساتتى سۋرەتتەلگەن) شەرحان مۇرتازامەن ءادىل دۇيسەنبەك ەكى مارتە قىزمەتتەس بولعان. بىراق, قانداي جاعدايدا بولسا دا, اعالى-ءىنىلى جانداردىڭ ءبىر-بىرىنە دەگەن كوڭىلدەرى سول قالپىندا قالعان. شەراعاڭ ۇلكەنمىن دەپ شالقايماعان, ءادىل اعامىز ءوز اعاسى الدىنداعى كىشىلىك كىسىلىگىنەن اجىراماعان.

سول كىسىلىگى شىعار, ءاۆتوردىى وتىز التى جىل ءبىر ورىندا تابان اۋدارماي ەڭبەك ەتۋى. ايتپەسە, كەيىن ءبىزدىڭ سۇراپ-بىلگەنىمىزدەي, كەزىندە ءادىل دۇيسەنبەككە ءتۇرلى دەڭگەيدەگى جوعارى لاۋازىمدى قىزمەتتەرگە شاقىرتۋلار بولعان. ايتسە دە, «قىزمەتكەرمىن دەسەڭ, «تسك-دا» ىستە, ءجۋرناليستپىن دەسەڭ, «سق-دا» ىستە» دەيتىن زاماندا, شەنەۋنىك بولعاننان گورى, ەڭبەگى ادال جۋرناليست بولىپ «سق»-دا قالۋدى ول وزىنە مارتەبە ساناعان. وسىلايشا, 1969 جىلى ەسىگىن اشقان «ەگەمەن قازاقستاندا» ءادىل دۇيسەنبەك ءوزى زەينەتكەرلىك جاسىنا تولاتىن 2005 جىلعا دەيىن قىزمەت ىستەدى. «قاراشاڭىراق» اتتى كىتابىنىڭ باسىنداعى اۆتور سوزىندە «اكە ورنىنا – اكە, شەشە ورنىنا شەشەدەي بولدى» دەپ, وسى گازەتتى ءوزىنىڭ ىستىق ۇياسىنا بالايتىنى تۇسىنىكتى.

راسىندا دا, ءادىل دۇيسەنبەكتىڭ ەڭبەك كىتاپشاسىندا وسى ءبىر عانا مەكەمەنىڭ اتى جازىلعان. شەرحان مۇرتازانىڭ: «ساعان «سق» ەسكەرتكىش قويۋى كەرەك» دەيتىنى دە سوندىقتان بولسا كەرەك.

* * *

جازۋشى ءادىل دۇيسەنبەك – قادىرى بولەك قالامگەر. ونىڭ «قاراشاڭىراق», «تەرگەۋ ءالى بىتكەن جوق» دەگەن شىعارمالارى ءار جىلداردا جازۋشىلار وداعىنىڭ ءىشىنارا بايقاۋلارىندا جۇلدەلى ورىندار يەلەندى.

بۇگىنگى تاڭدا ءوزى قىزمەت ەتكەن قاراشاڭىراق – «ەگەمەن قازاقستان» گازەتىندە قولتاڭباسى قالعان قازاقتىڭ اياۋلى تۇلعالارى تۋرالى جازىپ جۇرگەن قالامگەر قازىر دە وزىنە ارتىلعان جاۋاپتى قىزمەتتى ابىرويمەن اتقارىپ كەلەدى. ونىڭ سىرتىندا باستاپقىدا «مەنىڭ شەراعام» دەگەن ەسسە تۇرىندە جارىق كورىپ, بەرتىندە «شەراعامنىڭ شەرۋى» دەگەن اتپەن رومان بولىپ تولىقتىرىلعان شىعارماسى ءالى دە جەتىلدىرىلۋ ۇستىندە. بۇل ورايدا, نوۆەللالار تۇرىندە باستالىپ, دەرەكتى رومانعا اينالعان, شىندىقتان ورىلگەن كوركەم تۋىندى جازۋشى-كەيىپكەرمەن بىرگە جاساپ, كەمەلدەنۋ ۇستىندە دەۋگە بولادى.

* * *

تالاي ءجۋرناليستىڭ قالامىن ۇشتاپ, اتىن باپتاپ, الامانعا قوسقان شەرحان مۇرتازانى تەرەڭ تانىپ, بىلە تۇسكىسى كەلگەندەر بۇگىن, ارينە, ءادىل اعامىزدىڭ كىتابىن ىزدەيدى. بىراق, ونى وقىعانداردىڭ شەراعادان دا جاڭا تۋىندى كۇتەتىنى داۋسىز. ول كۇتتىرگەن نارسە – ۇلكەن جازۋشىنىڭ ءوزىنىڭ قالامداس ءىنىسى تۋرالى تولعانىسى. بۇلاي دەيتىنىمىز, روماندا باياندالعانداي, شەراعا ءىنىسى تۋرالى بولاشاقتا جازام دەپ, وقىرماندى ەمەكسىتىپ قويعان. ءتىپتى, ءادىل ىنىسىمەن بىرگە وتكىزگەن كۇندەرى تۋرالى بولاشاقتاعى جازباسىنا «قورداي كەشتەرى», «ارىس ارۋلارى», «شاردارا شاعالالارى» دەگەن سىقىلدى تاقىرىپ قوياتىنىن دا ايتىپ سالعان ەكەن…

كىم بىلەدى, ونداي دۇنيەلەردى دە وقىپ قالۋىمىز بەك مۇمكىن.

* * *

كەزىندە زامانداستارىنىڭ كوپشىلىگى بالالارىنىڭ بولاشاقتا شەن-شەكپەندى بولۋىن كوزدەپ, ورىس مەكتەپتەرىندە وقىتىپ جاتسا دا, ءادىل اعامىز سۇيىكتى جارى – داريعا جەڭگەمىزبەن بىرگە ۇلت مۇددەسىن اتتاماۋعا بەل بايلاعان. الماتىدا تۇرعان كەزدەرىندە ۇلكەن ۇلى ايدار مەن قىزدارى ەلىگاي, جازيرانى ويلانباستان قازاق مەكتەبىنىڭ تابالدىرىعىن اتتاتىپتى. بۇگىن دە سول ۇل-قىزدارىنان تاراعان نەمەرە-جيەندەرىن دە قازاقشا وقىتىپ جاتىر. ەڭ ۇلكەن نەمەرەسى ايبار – انگليادا. ۋنيۆەرسيتەتكە بيىل ءتۇستى. وسىلايشا, بالالارى ءوز انا تىلىندە ءبىلىم الىپ-اق ماڭدايى جارقىراپ, بيىكتەردەن كورىنىپ كەلەدى.

اعامىزدىڭ بويىندا جۋرناليستيكا ايدىنىندا ءجۇزىپ جۇرگەندەر ءۇشىن ۇلگى بولارلىق ەرەكشە قاسيەت بار. ول – ازاماتتىق ۇستانىمعا بەرىكتىك, ادالدىق, سوسىن كىشىپەيىلدىلىك پەن سىپايىلىق.

«شەراعامنىڭ شەرۋىندەگى»:

«ماعان نە جورىق مىندەتسىپ. شەراعام كىم, مەن كىم؟ ەكەۋمىزدىڭ ارامىز جەر مەن كوكتەي ەمەس پە؟ ول كىسى حالىق جازۋشىسى, مەملەكەت قايراتكەرى, ەل سىيلىعىنىڭ يەگەرى. ال, مەن قاتارداعى جۋرناليستەردىڭ ءبىرىمىن, جارايدى, جازۋشى دەگەن اتاعىم بار شىعار, بىراق جازعاندارىم اعامنىڭ كىتاپتارىنىڭ شيرەگىنە دە تۇرمايدى عوي. نەمەنەگە شىرەنەم. قايتا اعام قوراش كورمەي, جانىنا ەرتىپ جۇرگەنىنە قۋانبايمىن با؟» – دەگەن جولداردىڭ ءوزى قالامگەردىڭ ءوزى قۇرمەت تۇتقان تۇلعا الدىندا ءيىلىپ, ىزەت كورسەتۋگە ەشقاشان دا ارلانبايتىنىن كورسەتەدى. بۇل – ۇلكەن كىسىلىكتەن تۋعان كىشىلىك.

* * *

«مەنىڭ شەراعامنىڭ» اۆتورى, مىنە, وسىنداي تۇلعا ەكەن.

قىزىعى, جازۋشى جازۋشى تۋرالى جازىپ كەلەدى. الدىڭعى بۋىن اعالارىنىڭ اراسىنان وزىنە رۋحاني جاقىن تۇتسا كەرەك, تۇلعانىڭ بولمىسىن شىعارماسىنا تاقىرىپ ەتىپ الدى. ال بۇگىن وسى قالامگەردىڭ ءوزى 70-كە تولىپ وتىر. جۋرناليستيكاداعى كەيىنگى تولقىن – بىزدەر ەندى جازۋشى تۋرالى جازعان جازۋشى جايىندا قالام تەربەپ وتىرمىز. رۋحاني ساباقتاستىق, ءسىرا, وسىلاي بولاتىن شىعار…

ءنازيرا بايىربەك