ەلوردادا 1 تامىزدان باستاپ جىل سايىنعى «مەكتەپكە جول» رەسپۋبليكالىق اكتسياسى باستالعانى بەلگىلى. توعىز كۇننىڭ ىشىندە تۇرمىسى تومەن وتباسىلاردان شىققان 48 بالاعا 1 ميلليون 912 مىڭ تەڭگەنىڭ كومەگى كورسەتىلدى.
بيىلعى اكتسيانىڭ ۇرانى – «باقىتتى بالالىق شاق اۋماعى!». شارا اياسىندا تامىز ايىنىڭ سوڭىنا دەيىن «ءبىرىنشى رەت ءبىرىنشى سىنىپقا», «وتباسى وتباسىعا كومەكتەسەدى: بالانى مەكتەپكە جينايمىز», «بالالارعا بىرگە كومەكتەسەيىك» اتتى قايىرىمدىلىق شارالار ۇيىمداستىرىلادى.
سونىمەن قاتار, اكتسيا اياسىنداعى تاعى ءبىر قايىرلى ءىس, 20-21 تامىزدا قالالىق اكىمدىك الدىنداعى ورتالىق الاڭدا مەكتەپ فورماسىن, كەڭسە زاتتارىن, وقۋ ادەبيەتىن جانە باسقا دا زاتتاردى تومەندەتىلگەن باعامەن ساتىپ الۋعا بولادى.
ايتا كەتەيىك, «حان شاتىر», «سارىارقا», «مەگا» ساۋدا-ويىن-ساۋىق ورتالىقتارىندا, ورتالىق بازاردا, «شانحاي» بازارىندا جانە «جاننۇر» ساۋدا ورتالىعىندا تۇرمىسى تومەن وتباسىلارعا كومەكتەسۋ ءۇشىن كيىمدەر, مەكتەپكە كەرەك-جاراقتار جيناۋعا ارنالعان كونتەينەرلەر ورناتىلعان.
جالپى, 2016 جىلى تۇرمىسى تومەن وتباسىلاردان شىققان بالالاردى جاپپاي وقىتۋ قورىنا جەرگىلىكتى بيۋدجەتتەن 159 ملن 557 مىڭ تەڭگە ءبولىندى.