قاراعاندىلىقتار قىمىزىمەن قىزدىردى
استانا قالاسىندا قالىپتاسقان يگى ءداستۇردىڭ ءبىرى – ەل ايماقتارىنىڭ اۋىل شارۋاشىلىق جارمەڭكەلەرى بولىپ وتىر. قالانىڭ ورتالىق الاڭىندا سەنبى-جەكسەنبى كۇندەرى وتەتىن ازىق-تۇلىك ساۋداسىنا ەلوردالىقتار ەرتە قامداناتىن بولىپتى. ولاي دەيتىنىمىز, جارمەڭكەگە كەلگەن حالىقتىڭ قاراسى تاڭەرتەڭنەن كەشكە دەيىن ۇزىلمەءيدى.
وتكەن دەمالىس كۇندەرى استانالىق تۇتىنۋشىلار قاراعاندى وبلىسىنىڭ جارمەڭكەسىنە جينالدى. بىردەن ايتقىمىز كەلەدى, كەنشىلەر ايماعىنىڭ تارتۋى تولايىم بولدى. قالا اكىمدىگى الدىنداعى كەڭ الاڭدا جاساقتالعان 85 ساۋدا شاتىرىنىڭ بارىندە كەزەكتە تۇرعان تۇتىنۋشىلاردى بايقادىق. الىستان كوز تارتقان ءۇش كيىز ءۇي جارمەڭكەنىڭ ءسانىن دە, ءمانىن دە اشا تۇسكەن.
جارمەڭكە بارىسىن استانا قالاسىنىڭ اكىمى ي.تاسماعامبەتوۆ پەن قاراعاندى وبلىسىنىڭ اكىمى ءا.قۇسايىنوۆ ارالاپ كورىپ شىقتى. جالپى, قاراعاندى وبلىسىنىڭ شارۋاشىلىقتارى 800 توننا اۋىل شارۋاشىلىق ونىمدەرىن اكەلگەن ەكەن. اسىرەسە, ەت ونىمدەرى كوپ بولعانىن اڭعاردىق. سونداي-اق, ءسۇت, نان تاعامدارى دا جەتىپ-ارتىلعانىن كوردىك.
قاراعاندىلىقتار جارمەڭكەنى مەرەكەگە اينالدىرىپ جىبەرگەندەي بولىپ كورىندى. ولاي دەيتىنىمىز, قاجەتىنشە ازىق-تۇلىگىن الىپ, كوڭىلدەرى كوتەرىلگەن استانالىقتار ءۇشىن «قىمىز جانە باۋىرساق فەستيۆالى» وتكىزىلدى. مۇندا بىرىمەن ءبىرى جارىسقان وبلىس اۋداندارى وزدەرىنىڭ قىمىزى مەن باۋىرساعىن حالايىققا ۇسىندى. قىمىزدىڭ قىزۋى, باۋىرساقتىڭ بۋى استانالىقتاردىڭ كوڭىلىن تىپتەن كوتەرىپ جىبەردى. سونىمەن قاتار جارمەڭكە بارىسىندا ۇيىمداستىرىلعان قاراعاندى ولكەتانۋ مۇراجايى مەن قولونەر شەبەرلەرىنىڭ كورمەسى دە كوپشىلىكتىڭ كوڭىلىنەن شىقتى.
وسىلايشا, ازىق-تۇلىك جارمەڭكەسىن مەرەكەگە ۇلاستىرا بىلگەن قاراعاندىلىقتارعا ەلوردالىقتار ريزا بولدى. ال الداعى دەمالىس كۇندەرى اقمولا وبلىسىنىڭ جارمەڭكەسىن كۇتەمىز.
عالىم قوجابەكوۆ