استانا قالاسى تۇتىنۋشىلاردىڭ قۇقىقتارىن قورعاۋ دەپارتامەنتىنىڭ حابارلاۋىنشا, ماۋسىم ايىندا ساۋداعا تۇسكەن قاربىزدار قاۋىپتى.
ويتكەنى, نيتراتتارمەن ۋلانۋىمىز مۇمكىن. مامانداردىڭ ايتۋىنشا, ەرتە پىسەتىن سۇرىپتاردىڭ ءوزى شىلدە ايىنىڭ سوڭىنا قاراي ونەدى ەكەن. ال, تازا پىسكەن قاربىزدار تامىز ايىنىڭ سوڭىنان باستاپ قازان ايىنا دەيىن بولادى. بۇل ۋاقىتتا باقشا داقىلدارى تابيعي تۇردە جەتىلەدى.
قاربىز جانە قاۋىنداردى تاڭداۋ كەزىندە قاتەلەسپەس ءۇشىن ەڭ ءبىرىنشى زاڭسىز ۇيىمداستىرىلعان بازارلاردا ساۋدا جاساماۋ كەرەك. باقشا داقىلدارىن ساتۋعا ارنالعان ورىن قورشالعان جانە كۇن ساۋلەسىنەن, جاۋىن-شاشىننان قورعالۋى ءتيىس. قاربىزدار بيىكتىگى كەم دەگەندە 20 سانتيمەتر ارنايى سورەلەردە ساقتالۋى قاجەت. باقشا ءونىمىن جول شەتىندەگى ساۋدا ورىندارىنان ساتىپ الۋعا بولمايدى, ويتكەنى ولارعا اۆتوكولىك گازدارىنىڭ قۇرامىندا بولاتىن اۋىر مەتالدار تەز جينالادى ەكەن. كەسىلگەن قاربىزداردى دا ساتىپ الۋدان ساق بولىڭىز. ويتكەنى, قاربىزدى پىشاقپەن كەسكەن كەزدە ونىڭ سىرتقى بەتىندەگى لاس زاتتار ىشكى جۇمساعىنا وڭاي وتەدى.
قابىعىنىڭ بۇتىندىگىنە كوڭىل اۋدارىڭىز, ول سىزاتسىز, جارىقسىز, شۇڭقىرسىز بولۋ كەرەك. قاربىزداردى تاسىمالداۋ كەزىندە كوپ لاقتىرادى, سودان ءىشى بوساپ, اشقىلتىم تارتىپ كەتەدى. جالپى, قاربىز-قاۋىندى كەسەر الدىندا اعىندى سۋمەن جاقسىلاپ جۋعان ءجون. كەسىلگەننەن كەيىن توڭازىتقىشتا ءبىر تاۋلىكتەن اسىرا ساقتاماعان دۇرىس. قاربىزدى قابىعىنا دەيىن جەمەڭىز, سەبەبى, نيتراتتاردىڭ كوپ مولشەرى قابىعىنا جاقىن جانە تۇبىرىنە قاراي جينالادى. ساتۋشىدان ءونىمنىڭ قاۋىپسىزدىگىن راستايتىن قۇجاتتاردى دا سۇراۋدى ۇمىتپاڭىز.
قاربىزبەن ۋلانعان جاعدايدا ادام باسى قاتتى اۋىرىپ, جۇرەك اينيدى, قۇسىپ جانە ءىش وتەدى. كەيبىر جاعدايلاردا دەنە قىزۋى كوتەرىلەدى, دىرىلدەۋ جانە بۋىنداردىڭ سىرقىراۋى ورىن الادى.
اسىرەسە, ءبىر جاسقا دەيىنگى بالالار ۋلانۋعا بەيىم كەلەدى. بالا ەمىزەتىن انالارعا قاربىزدى بايقاپ جەۋ قاجەت. ۋلانىپ قالعان جاعدايدا, دارىگەرگە قارالىڭىز. دارىگەر كەلگەنگە دەيىن كوپ مولشەردە سۋ ءىشىپ, قۇسىپ تاستاۋعا قارەكەت قىلعان دۇرىس.
اسحات رايقۇل
