جەڭىستىڭ 71 جىلدىعىنا وراي استانادا «ەرلىك ەشقاشان ۇمىتىلمايدى» ۇرانىمەن اكتسيا ءوتتى.
تاعىلىمدى ءىس-شارانى استانا قالاسى اكىمدىگىنىڭ قولداۋىمەن جاستار ساياساتى ماسەلەلەرى باسقارماسى مەن «رۋحاني قوعام الەمى» قوعامدىق قورى بىرلەسىپ ۇيىمداستىردى. ەرىكتى جاستار ۇلى وتان سوعىسىنا قاتىسقان 50 ارداگەر مەن تىل ەڭبەككەرلەرىنىڭ ءۇيىن ارالاپ, اتا-اجەلەرگە قاندى شايقاستا جاۋعا بەرىلمەي, بابا جەرىن قورعاپ قالعان ەرلىكتەرى ءۇشىن زور العىسىن ءبىلدىردى. مۇنىمەن قوسا ءار قارياعا ءۇش قوراپ سىي بەرىلدى. ونىڭ ىشىندە ۇيگە قاجەتتى ازىق-تۇلىك, جەمىس-جيدەك, كوكونىس, ءتاتتى-دامدىلەر, سونداي-اق, تۇرمىستىق تاۋارلار بار. «مۇنىڭ ءبارى جوق ەمەس, شۇكىر, بار عوي ۇيىمىزدە. بىراق سىزدەر اكەلگەن ءدام بولەك. ەرتەڭ اكەمىز داستارقان باسىندا شايدى راحاتتانا ءىشىپ, الما, كامپيتتى «ماعان وسىنىڭ ءبارىن جاستار اكەلگەن» دەپ قۋانىشپەن ەسكە الىپ جەيدى» دەيدى جانياز اتانىڭ قىزى. شالبول اۋلەتىنەن شىققان جانياز اتا كوستيۋمىنىڭ ءتوسى مەدالگە تولعان. 92 جاستاعى اقساقال زور دەنەلى, ناعىز باتىر كەيپىنەن اينىماعان, كەۋدەسىن تىك ۇستاپ, ءار ءسوزىن نىق سويلەيدى. «مەنى قۇرمەتتەپ, وسىنداي سىيلىق اكەلگەندەرىڭە راقمەت, اينالايىندار! امان جۇرىڭدەر! سىيلى بولىڭدار!» دەپ باتاسىن بەرىپ, «كەلەشەگىمىز جاستار وتانىن سۇيە ءبىلۋ كەرەك, ەڭبەكقور بولىپ, ءبىلىم الىڭدار! ءبىزدىڭ قيىندىقپەن ساقتاپ قالعان جەرىمىزدى ەشكىمگە بەرمەي يە بولىڭدار!» دەپ وسيەت ايتتى. ون كۇن بويى ەلۋ قاريانىڭ جاعدايىن بىلگەن جاستار, ارداگەرلەرگە قىزىقتىرعان سۇراقتارىن قويىپ, اتالاردىڭ ءوز اۋزىنان شەرلى جىلدار تاريحىنا قانىقتى.
ءمادينا جاقىپ
