جاھاندى جايلاعان ىندەتتىڭ بەتىن ەكىنشى رەت قايتاردىق. الايدا الدىڭعى كارانتيننەن ساباق الىپ, بارلىق سانيتارلىق-پروفيلاكتيكالىق نورمالاردى قاتاڭ ساقتاۋ عانا ينفەكتسيا جۇقتىرۋدىڭ قايتا وسپەۋىنە كومەكتەسەتىنىن ەسكەرۋىمىز كەرەك. دارىگەرلەر كارانتيندى بىرتىندەپ الىپ تاستاۋ بوساڭسۋعا سەبەپ بولماۋى ءتيىس دەيدى. سوندىقتان تويلار مەن كوپشىلىكتىك ءىس-شارالاردى وتكىزۋگە ءالى دە تىيىم سالىنادى.
ەلوردانىڭ قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ كۇنى كەشە وتكەن «مەديتسينالىق ۇيىمدار قىزمەتىنىڭ قايتا ىسكە قوسىلۋى جانە ەمدەلىپ شىققانداردى وڭالتۋ شارالارى» اتتى بريفينگتە دەنساۋلىعىمىزعا مۇقيات بولىپ, ورتاق جاۋاپكەرشىلىكتى سەزىنۋگە, ءتيىستى سانيتارلىق-پروفيلاكتيكالىق نورمالاردى ساقتاۋ ينفەكتسيانىڭ تارالۋىن بولدىرماۋعا مۇمكىندىك بەرەتىنىن ەستە ساقتاۋعا شاقىردى.
– قازىرگى تاڭدا كۆي مەن پنەۆمونيادان زارداپ شەككەندەردى وڭالتۋدىڭ ءۇشىنشى كەزەڭى جۇرۋدە. ناۋقاستار جاتتىعۋ تەراپياسى, ماسساج, فيزيوتەراپيا سياقتى قالپىنا كەلتىرۋ كومەگىنىڭ كولەمى مەن ۇزاقتىعىن انىقتايتىن رەابيليتولوگ-دارىگەردىڭ كەڭەسىن الادى. بۇگىندە امبۋلاتوريالىق دەڭگەيدە مەديتسينالىق وڭالتۋ, اقپاراتتىق-كوممۋنيكاتسيالىق تەحنولوگيالار كومەگىمەن قاشىقتان مەديتسينالىق قىزمەتتەردى ۇسىنۋ ءۇشىن نورماتيۆتىك قۇقىقتىق اكتىلەر مەن ەمدەۋ حاتتامالارى جاسالۋدا. ناۋقاستارعا ارنالعان نۇسقاۋلىق جانە مەديتسينالىق قىزمەتكەرلەرگە تىنىس الۋدى قالپىنا كەلتىرۋ بويىنشا نۇسقاۋلىقتار جاسالىپ, بەكىتىلدى, – دەيدى ول.
ەمحانالار جۇمىسى جانداندى
ەلوردانىڭ بارلىق ەمحانالارى الدىن الا جازىلۋ بويىنشا جوسپارلى تۇردە قابىلداۋ جۇرگىزۋدى باستادى. دارىگەرلەر ەرەسەكتەر مەن بالالارعا پروفيلاكتيكالىق تەكسەرۋ جۇرگىزۋدە. سونىڭ ىشىندە سكرينينگ, جوسپارلى ستوماتولوگيالىق قىزمەتتەر, وڭالتۋ قىزمەتتەرى, مەديتسينالىق-الەۋمەتتىك قولداۋ, مەديتسينالىق-الەۋمەتتىك ساراپتاماعا مەديتسينالىق قۇجاتتاردى رەسىمدەۋ, پسيحولوگيالىق كومەك, كۇندىزگى ستاتسيونارلاردىڭ جۇمىسى, تاۋلىكتىك جانە كۇندىزگى ستاتسيونارلارعا جوسپارلى ەمدەۋگە جاتقىزۋعا جىبەرۋ قىزمەتتەرى بار. ءىس-شارالاردى جۇرگىزۋ بارىسىندا كۇشەيتىلگەن سانيتارلىق-ەپيدەميولوگيالىق نورمالار قاتاڭ ساقتالادى. ەمحانالار تاڭەرتەڭ ساعات 08:00-دەن 17:00-گە دەيىن جۇمىس ىستەيدى. سونداي-اق كوروناۆيرۋس ينفەكتسياسىنىڭ بەلگىلەرى بار ادامداردى قابىلدايتىن فيلتر-كابينەت جۇمىسى جالعاسۋدا. قازىرگى ۋاقىتتا قالادا تاۋلىگىنە 5,5 مىڭ زەرتتەۋ قۋاتى بار 9 پتر-زەرتحانا جۇمىس ىستەپ تۇر. ولاردا بارلىعى 305 مىڭنان استام زەرتتەۋ جۇرگىزىلدى.
– اكىمدىك مەديتسينا مەكەمەلەرىنە 600-دەن استام فلوۋمەتر, 500 وتتەگى كونتسەنتراتورى, 500 ارنايى كەرەۋەت, وكپەنى جاساندى جەلدەتۋ قۇرالدارى جانە كومپيۋتەرلىك توموگرافيا اپپاراتتارىن جەتكىزدى. شىلدە ايىندا ەكى اپتا ىشىندە قالاعا پنەۆمونيا, كوروناۆيرۋس جانە باسقا دا اۋرۋلاردى ەمدەۋدە قاجەت 110 توننادان استام ءدارى-دارمەك جەتكىزىلدى. بۇل جۇمىستاردى اكىمدىك تۇراقتى نەگىزدە جۇرگىزەدى, – دەدى باسقارما باسشىسى.
پنەۆمونيانىڭ بەتى قايتتى
ەلوردادا كوروناۆيرۋس پەن پنەۆمونيانىڭ تومەندەۋىنە بايلانىستى ناۋقاستاردى ەمدەيتىن ستاتسيونارلار بوساتىلۋدا. اۋرۋحاناعا جاتقىزىلعانداردىڭ سانى ءبىر جارىم ايدا 10 ەسە ازايدى. بۇگىندە نۇر-سۇلتان قالاسىنىڭ ستاتسيونارىندا كوروناۆيرۋس پەن پنەۆمونيادان 343 ادام ەمدەلۋدە.
كۆي انىقتالعان جۇكتى, بوساناتىن جانە بوسانعان ايەلدەرگە ۋاقىتىلى مەديتسينالىق كومەك كورسەتۋ ءۇشىن 18 ماۋسىمنان باستاپ 185 توسەككە ارنالعان №1 كقا-دا اكۋشەرلىك بلوگى جۇمىس ىستەيدى. بيىل 5 شىلدەدەن باستاپ اۋرۋحاناعا جاتقىزىلعان ناۋقاستاردىڭ سانى 4 مىڭنان 343 ادامعا نەمەسە 10 ەسە ازايدى. تيىسىنشە توسەك قورىنىڭ جۇكتەمەسى 99 پايىزدان 17,2 پايىزعا دەيىن كەمىدى. ستاتسيونارلارداعى كۆي راستالىپ, اۋرۋحاناعا جاتقىزىلعان ناۋقاستار سانى 2000-نان 137-گە دەيىن نەمەسە 14 ەسەگە, پنەۆمونيامەن اۋىرعاندار 1333-تەن 198-گە دەيىن نەمەسە 7 ەسە تومەندەدى.
پاندەميانىڭ ءورشۋى باسىلعانىنا بايلانىستى كۆي-مەن كۇرەسۋگە جۇمىلدىرىلعان دەنساۋلىق ساقتاۋ وبەكتىلەرىنىڭ سانى قىسقارۋدا. وسىلايشا, نەگىزگى قىزمەتىن قايتا باستاعان 6 دەنساۋلىق ساقتاۋ نىسانى كەزەڭ-كەزەڭىمەن جابىلدى. ەپيدەميولوگيالىق جاعداي اسقىنعان جاعدايدا, ولاردىڭ جۇمىسى جەدەل قالپىنا كەلتىرىلەدى. قازىرگى ۋاقىتتا 10 ستاتسيونار ىسكە قوسىلعان.
