«قازاقكونتسەرتتىڭ» استاناداعى قادامدارى
وتكەن قىستا بىرقاتار بۇقارالىق اقپارات قۇرالدارى الپىس جىلعا جۋىق تاريحى بار «قازاقكونتسەرت» بىرلەستىگىنىڭ جابىلعاندىعى جونىندە جاڭالىقتى تاراتتى.
سول كەزدە: «شارا جيەنقۇلوۆا, ماناربەك ەرجانوۆ, جامال وماروۆا, جۇسىپبەك ەلەبەكوۆ, رابيعا ەسىمجانوۆا, ماعاۋيا حامزين, نۇرسۇلۋ تاپالوۆا, روزا باعلانوۆا سىندى قازاق ءان-كۇي جانە بي ونەرىنىڭ مايتالماندارى باستاۋىندا تۇرعان ىرگەلى ۇجىمنىڭ جۇمىسىن توقتاتقانى قالاي بولدى؟» دەپ, ويلانعانىمىز راس. جۋرناليستەر تاراپىنان ايتىلعان «بىرلەستىك تۇبەگەيلى جابىلماي, استاناعا كوشۋى مۇمكىن» دەگەن بولجام عانا كوڭىلىمىزگە دەمەۋ بولدى. بۇل ءسوز شىندىققا اينالعانىن ەستىگەن سوڭ, ەلوردا تورىندە قايتا قۇرىلىپ, «قازاقكونتسەرت» مەملەكەتتىك كونتسەرتتىك ۇيىمى اتاۋىن العان ۇجىمنىڭ تىنىس-تىرشىلىگىمەن تانىسۋعا اسىقتىق.
جالىنداعان جاستار تانىلادى
«قازاقستان» ورتالىق كونتسەرت زالىنىنىڭ نەگىزىندە جۇمىسىن جالعاستىرعان, الەمدەگى وزىق تەحنولوگيالىق جەتىستىكتەردى ەسەپكە الىپ, جابدىقتالعان, ساۋلەت ونەرىنىڭ بىرەگەي تۋىندىسى بولىپ سانالاتىن عيماراتتا ورىن تەپكەن ۇيىم الدىندا اۋقىمدى ماقساتتار قويىلىپ وتىر. باستى ماقسات – ارينە, ادەبي جانە سان سالالى ونەر تۋىندىلارىمەن كوپشىلىكتى قاۋىشتىرۋ. سول ارقىلى ۇيىمعا قاراستى ونەر ۇجىمدارى مەن جەكە ورىنداۋشىلاردى حالىققا تانىستىرۋ. بۇل تۇرعىدان العاندا, «قازاقكونتسەرت» مەملەكەتتىك كونتسەرتتىك ۇيىمى اتتارى ءالى تانىلا قويماعان جاس ونەرپازدارعا ۇلكەن سەنىم ارتىپ وتىر. ۇجىم قاتارىنا دا نەگىزىنەن سونداي ونەرپازدار قابىلدانعان.
ال تاريحى تەرەڭ, ءوزىنىڭ قالىپتاستىرعان داستۇرلەرى بار بىرلەستىككە كەلسەك, ول ەلورداداعى ۇيىمنىڭ الماتىداعى فيليالى بولىپ قالا بەرمەك. فيليالدى بۇرىنعىسىنشا بەلگىلى ءانشى, كومپوزيتور, قازاقستاننىڭ جانە قىرعىزستاننىڭ حالىق ءارتىسى التىنبەك قورازباەۆ باسقارىپ وتىر.
ونەر مايتالماندارىنىڭ ونەگەسى
عيماراتتى ارالاتىپ, سونداعى ونەر ۇجىمدارىمەن ءبىزدى ۇيىمنىڭ شىعارماشىلىق جونىندە ديرەكتوردىڭ ورىنباسارى ەرلان داكەنوۆ تانىستىردى. استاناداعى ۇيىمعا قاراستى ۇجىمدارعا دا اتتارى كوپشىلىككە تانىمال ونەر مايتالماندارى جەتەكشىلىك ەتۋدە ەكەن. ماسەلەن, «سوليستەر اكادەمياسى» مەملەكەتتىك وركەسترىنىڭ كوركەمدىك جەتەكشىسى – الەم ءارتىسى دەگەن اتاعى بار حالىقارالىق شىعارماشىلىق اكادەمياسىنىڭ اكادەميگى, قازاقستاننىڭ حالىق ءارتىسى, ەلىمىزدىڭ ەڭبەك ەرى ايمان مۇساقوجاەۆا. فولكلورلىق-ەتنوگرافيالىق انسامبل باسشىلىعىن تانىمال كۇيشى, كومپوزيتور, قر ەڭبەك سىڭىرگەن ءارتىسى سەكەن تۇرىسبەك قولعا الدى. ال «Forte-Trio» اتتى مەملەكەتتىك تريونى قر ەڭبەك سىڭىرگەن قايراتكەرى, پيانينوشى تيمۋر ۋرمانچەەۆ باسقارۋدا. بۇل ۇجىمدارعا قوسا ۇيىم قۇرامىندا كامەرالىق وركەستر, ەسترادالىق توپتار مەن جەكە ورىنداۋشىلار جۇمىس ىستەۋدە.
«ASTANA MUSICAL» الار اسۋ
جۋىردا گازەتىمىز ارقىلى باس قالادا «قازاقكونتسەرت» مەملەكەتتىك كونتسەرتتىك ۇيىمى جانىنان «Astana Musical» اتتى جاڭا تەاتر اشىلعانىن سۇيىنشىلەگەنبىز. قازاق كورەرمەنىنە ءالى دە تاڭسىق بولىپ كورىنەتىن باعىتتى تاڭداعان تەاتردىڭ دايىنداپ جاتقان العاشقى قويىلىمى جايلى دا جازعانبىز. سوندا ونەر ۇجىمى ءوزىنىڭ تۇساۋكەسەرىن «دوس-مۇقاسان» ءانسامبلىنىڭ رەپەرتۋارىنان الىنعان اندەردەن قۇرالعان ميۋزيكلمەن وتكىزەتىنى ايتىلعان. اقپاراتتى تولىقتىرا كەتەيىك, تۇڭعىش قويىلىم ايگىلى ءانسامبلدىڭ اندەرىنەن عانا ەمەس, وتكەن عاسىردىڭ الپىسىنشى-جەتپىسىنشى جىلدارداعى تانىمال تۋىندىلاردان تۇرادى. مۇنى بىزگە قويىلىمنىڭ قويۋشى رەجيسسەرى ەسلام نۇرتازين جەتكىزدى. سول جىلدارداعى جاستىقتىڭ لەبىن وسى زامانعا اكەلەتىن, عاشىقتىق سەزىمنىڭ قۋانىشى مەن مۇڭى سىندى ماڭگىلىك تاقىرىپتى ونەر ءتىلىندە سويلەتەتىن قويىلىمنىڭ پرەمەراسى قىركۇيەك ايىنىڭ اياعىنا, قازان ايىنىڭ باس كەزىنە جوسپارلانعان. وعان قىرىق شاقتى ءارتىس قاتىسپاق. اراسىندا ەلگى بەلگىلى ونەرپازدار دا كورىنىپ قالۋى ءتيىس.
اتقارىلار ءىس اۋقىمى
مەملەكەت باسشىسى نۇرسۇلتان نازارباەۆتىڭ «100 ناقتى قادام» ۇلت جوسپارىنىڭ 69-قادامىندا استانانى زەرتتەۋشىلەردى, ستۋدەنتتەردى, كاسىپكەرلەردى, بارلىق وڭىرلەردەن تۋريستەردى تارتاتىن ەۋرازيانىڭ ىسكەرلىك, مادەني جانە عىلىمي ورتالىعىنا اينالدىرۋ جونىندە ايتىلعان. ەلوردادا «قازاقكونتسەرت» مەملەكەتتىك ۇيىمىنىڭ قۇرىلۋى سوعان بىردەن-ءبىر جول اشادى. الدىمىزدا كەلە جاتقان «ەكسپو-2017» حالىقارالىق مامانداندىرىلعان كورمەنىڭ قارساڭىندا دا ۇيىمنىڭ اتقارار قىزمەتى ماڭىزدى بولماق. كورمە وتەتىن كۇندەرى ۇجىم ونەرپازدارىنا تۇسەتىن ۇلكەن جۇكتى دە بىزدىڭشە, شامالاۋ مۇمكىن ەمەس.
الەمدىك اۋقىمداعى شارانىڭ الدىندا دا, ودان كەيىن دە ۇيىمنىڭ اتقارار قىزمەتى كولەمدى بولماق. ونىڭ ءبارى دە استانانىڭ يمميدجىنە وڭ ىقپالىن تيگىزبەك.
– جىل سايىن حالىقارالىق جانە رەسپۋبليكالىق كونكۋرستار مەن فەستيۆالداردى ۇيىمداستىرۋدى قولعا الماقپىز. سونىڭ ىشىندە ءشامشى قالداياقوۆ اتىنداعى حالىقارالىق ءان فەستيۆالى, «ۇلى دالا مۋزىكاسى» فەستيۆالى, ورتالىق ازيا ەلدەرىنىڭ تەاتر فەستيۆالى, جەكە ورىنداۋشىلار, پيانيستەر, سكريپكاشىلاردىڭ كونكۋرستارى, «ەلىم مەنىڭ», «تاۋەلسىزدىك تولعاۋى» رەسپۋبليكالىق كونكۋرستارى جانە وزگە دە بايقاۋلار بار. الەمدىك كلاسسيكالىق جانە قازىرگى زامانعى مۋزىكالىق ونەر جۇلدىزدارىنىڭ كونتسەرتتەرىن وتكىزبەكپىز. «ەكسپو-2017» كورمەسىن وتكىزۋ اياسىندا كلاسسيكالىق جانە ەسترادالىق مۋزىكا كونتسەرتتەرىن اپتا سايىن ۇيىمداستىرماقپىز. سونداي-اق, بالالارعا ارنالعان اپتا سايىنعى ابونەمەنتتىك سپەكتاكلدەر مەن كونتسەرتتەر, ۇلتتىق فيلمدەردىڭ تۇساۋكەسەرلەرى, مادەنيەت, سپورت جانە تۋريزم سالالارى بويىنشا حالىقارالىق كونفەرەنتسيالار, بريفينگتەر, كورمەلەر, دوڭگەلەك ۇستەل ماجىلىستەرى, تەاترلاندىرىلعان قويىلىمدار, شوۋ-باعدارلامالار جانە وزگە دە اۋقىمدى شارالاردى وتكىزۋ ۇيىم مىندەتىنە جاتادى, – دەيدى «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى سالتانات سەيدىمبەك.
باسەكەلەستىك ورتا قالىپتاسپاق
قاراپ وتىرساق, وسىنىڭ ءبارى از جۇمىستى قاجەت ەتپەيدى. ۇيىمنىڭ بۇل ەڭبەگى ارقىلى استانا مادەنيەتى جاڭا ساپاعا كوتەرىلەدى. ارينە, كوپ نارسە ونەرپازداردى كاسىبيلىگىنە بايلانىستى بولماق. ەگەر ءارتىستەر بيىك دەڭگەيدە ونەر كورسەتە بىلسە, ەلورداداعى وزگە ونەر ۇجىمدارى دا سونداي دارەجەگە كوتەرىلۋگە تىرىسادى. بۇل تۇرعىدان العاندا, «قازاقكونتسەرت» مەملەكەتتىك ۇيىمىنىڭ ونەرپازدارى ەلوردادا باسەكەلەستىك ورتا قالىپتاستىرماق.
ماسەلەن, وسى كۇندەرگە دەيىن «جاستار» تەاترى قويعان ميۋزيكلدەردى عانا تاماشالاعان ەدىك. ونىڭ كەيىنگىسى «موتسارت» قويىلىمى بولدى. وسى تۋىندى جامان شىقتى دەپ ايتپاسپىز, بىراق بىزگە «Astana Musical» تەاترى وسى جانرداعى قويىلىمداردى قالاي قوياتىنى قىزىق بوپ تۇر. بۇل ماسەلە ميۋزيكلدەردى قويۋ جونىنەن تاجىريبەسى بار «جاستار» تەاترى ۇجىمىن دا قىزىقتىرارى ءسوزسىز. دەمەك, قوس ۇجىم ءبىرى ەكىنشىسىنىڭ قويىلىمدارىن تاماشالاپ, كاسىبي تۇرعىدان وسەدى. بۇدان وسى ەكى تەاتر عانا ەمەس, مارتەبەلى ونەر ۇتادى. حالىققا كەرەگى دە جۇرەكتى تەبىرەنتەتىن شىنايى ونەر. ەندەشە, «قازاقكونتسەرت» مەملەكەتتىك ۇيىمىنا وسى ۇدەدەن كورىنۋىنە شىن جۇرەكتەن تىلەكتەستىك ءبىلدىرىپ, ەلوردادا جاڭا باستاعان قادامدارىنا ساتتىلىك تىلەيمىز!
امانعالي قالجانوۆ