قازاقستان – يندونەزيا: ىنتىماقتاستىق ىڭعايىندا
نۇرسۇلتان نازارباەۆ:
– ەكىجاقتى دا, كوپجاقتى دا ىنتىماقتاستىقتى جانداندىرۋ ماڭىزدى. يندونەزيا – وڭتۇستىك-شىعىس ازياداعى نەگىزگى مەملەكەت. ءبىزدىڭ ەلىمىز دە وڭىرلىك قاۋىپسىزدىكتى نىعايتۋدا ەلەۋلى ءرول اتقارادى. ساۋدا-ەكونوميكالىق, كولىكتىك ءوزارا ءىس-قيمىلدى دامىتۋ, مادەني-گۋمانيتارلىق الماسۋلار ءۇشىن بىزدەردە ەشقانداي كەدەرگى جوق. بۇل ءۇشىن بارلىق جاعداي جاسالعان.
سۋسيلو يۋدويونو:
– مەنىڭ قازاقستانعا ساپارىم ىنتىماقتاستىقتى ودان ءارى جانداندىرۋعا باعىتتالعان. ءبىزدىڭ ەلدەرىمىزدىڭ ەكونوميكاسى قارقىندى دامۋدا. بۇل ەكىجاقتى سەرىكتەستىكتى تەرەڭدەتۋ ءۇشىن جاقسى نەگىز بولىپ تابىلادى. ءبىز ينۆەستيتسيالار, قاۋىپسىزدىك, ەنەرگەتيكا, ءبىلىم مەن مادەنيەت سالالارىنداعى ءوزارا ءىس-قيمىل ماسەلەسىن ودان ءارى تالقىلاۋعا دايىنبىز.
كەشە اقوردادا مەملەكەت باسشىسى نۇرسۇلتان نازارباەۆ يندونەزيا پرەزيدەنتى سۋسيلو بامبانگ يۋدويونومەن كەزدەستى.
قازاقستان مەن يندونەزيا اراسىنداعى ساۋدا-ەكونوميكالىق بايلانىس قارقىندى دامىپ كەلەدى. ەكى ەلدىڭ ساۋدا اينالىمى اعىمداعى جىلدىڭ قاڭتار – مامىر ايلارىندا 86 ملن اقش دوللارىن قۇراعان. يندونەزيا وڭتۇستىك-شىعىس ازيادا مۇناي مەن گاز, كومىر مەن التىن وندىرۋدە جەتەكشى ەل ەكەنىن ەسكەرسەك, ەكىجاقتى قارىم-قاتىناستىڭ قازاقستان ءۇشىن ماڭىزدىلىعى ايتارلىقتاي جوعارى.
رەسمي كەزدەسۋدە ەلباسى يندونەزيا پرەزيدەنتىنىڭ قازاقستانعا جاساعان ساپارى ەكى ەل اراسىنداعى ىنتىماقتاستىقتىڭ دامۋىنا سەرپىن بەرەتىنىن اتاپ ءوتتى. ءارى ازياداعى كوشباسشى مەملەكەتتەردىڭ ءبىرى – يندونەزيامەن بارلىق باعىتتار بويىنشا ەكىجاقتى بايلانىستى دامىتۋعا مۇددەلى ەكەندىگىمىزدى ءبىلدىردى. مەملەكەت باسشىسىنىڭ ايتۋىنشا, قازاقستان مەن يندونەزيا اراسىنداعى ىنتىماقتاستىقتى دامىتۋعا ەش كەدەرگى جوق, كەرىسىنشە, بارلىق جاعداي جاسالعان. «ءبىزدىڭ كەزدەسۋ ەكى ەل اراسىنداعى ديپلوماتيالىق قارىم-قاتىناستىڭ ورناعانىنا جانە يندونەزيانىڭ استانادا, قازاقستاننىڭ دجاكارتادا ەلشىلىگىنىڭ اشىلۋىنىڭ 20 جىلدىعى قارساڭىندا ءوتىپ وتىر. قازاقستانداعى يندونەزيانىڭ مادەنيەت كۇندەرى مەن ەلدەرىڭىزدەگى قازاقستاننىڭ مادەنيەت كۇندەرى ورتاداعى مادەني ىنتىماقتاستىقتىڭ ماڭىزدى بولىگى بولىپ تابىلادى» دەدى پرەزيدەنت نۇرسۇلتان نازارباەۆ. ال, ءوز كەزەگىندە سۋسيلو يۋدويونو قازاقستان مەن يندونەزيانىڭ ەكونوميكاسى جاقسى دامىپ كەلە جاتقانىن تىلگە تيەك ەتتى. «حالقىمىز ەكى ەل اراسىنداعى قارىم-قاتىناستىڭ دامىعانىن قالايدى. وتكەن جىلى ءسىز يندونەزياعا ءىس-ساپارمەن كەلدىڭىز, بيىل مەن قازاقستانعا ارنايى كەلدىم. بۇل ەكى ەلدىڭ بايلانىسىن دامىتا تۇسەدى دەگەن ويدامىن. ءبىز ينۆەستيتسيا, ەنەرگەتيكا, ءبىلىم بەرۋ, مادەنيەت سالالارىنداعى سەرىكتەستىكتى دامىتۋ ماسەلەلەرىن تالقىلادىق. ەكى ەلدىڭ ىنتىماعى ودان ءارى نىعايا ءتۇسكەنىن قالايمىن» دەدى يندونەزيا پرەزيدەنتى س. يۋدويونو.
ماڭىزدى باسقوسۋدا نۇرسۇلتان نازارباەۆ پەن سۋسيلو يۋدويونو ەلباسىنىڭ وتكەن جىلى يندونەزياعا مەملەكەتتىك ساپارى اياسىندا قول جەتكىزىلگەن ۋاعدالاستىقتاردى ىسكە اسىرۋ بارىسىن تالقىلادى. سونداي-اق, ەلەكتر ەنەرگەتيكاسى, تاۋ-كەن ونەركاسىبى, مۇناي-گاز سەكتورى, تەلەكوممۋنيكاتسيالار, ماشينا جاساۋ, تۋريزم جانە وزگە دە سالالارداعى باعىتتار تۋرالى اڭگىمە ءوربىدى.
گۇلميرا ايماعانبەت